নেপালৰ নোটত সোমাল ভাৰতৰ সীমা, সীমা বিবাদৰ দিশে নেকি ভাৰত-নেপাল
ভাৰত আৰু নেপালৰ সীমা বিবাদৰ দিশে অগ্ৰসৰ হোৱাৰ ইংগিত। কিয়নো নেপালৰ নোট তথা টকাত প্ৰিণ্ট কৰা দেখা গৈছে ভাৰতীয় সীমা। ভাৰতৰ সীমা নেপালৰ ভুমিত অন্তৰ্ভুক্ত কৰাই দেশখনৰ নোট প্ৰিণ্ট কৰা দেখা গৈছে। যাৰ বাবে এতিয়া চৰ্চাৰ বিষয় হৈ পৰিছে এই নোটবোৰ।
ভাৰতৰ চুবুৰীয়া দেশ খনৰ শেহতীয়া নোটৰ সংস্কৰণত নতুন সীমাৰে সৈতে নেপাল দেখুওৱা হৈছে। যি সীমাত ভাৰতৰো সীমা অন্তৰ্ভুক্ত হৈ আছে। নেপালৰ কেন্দ্ৰীয় বেংকে প্ৰকাশ কৰিছে এই শেহতীয়া নতুন সংস্কৰণ।
নেপালৰ কেন্দ্ৰীয় বেংকে এবছৰৰ ভিতৰত ভাৰতৰ সৈতে বিবাদিত ভূখণ্ডসমূহ অন্তৰ্ভুক্ত কৰা সংশোধিত মানচিত্ৰখনক লৈ নতুন বেংকনোট ছপা কৰাৰ প্ৰস্তুতি চলাইছে বুলি মঙলবাৰে এক সংবাদ মাধ্যমৰ প্ৰতিবেদনত প্ৰকাশ পাইছে।
অনলাইন নিউজ পৰ্টেল নেপালখাবৰ ডট কমৰ উদ্ধৃতি দি বেংকৰ যুটীয়া মুখপাত্ৰ দিল্লীৰাম পোখাৰেলৰ উদ্ধৃতিৰে প্ৰকাশ কৰা অনুসৰি নেপাল ৰাষ্ট্ৰ বেংকে ইতিমধ্যে নতুন মানচিত্ৰৰ সৈতে বেংকনোট ছপা প্ৰক্ৰিয়া আগবঢ়াইছে, য’ত আছে কালাপানী, লিপুলেখ আৰু লিম্পিয়াধুৰা।
ইতিমধ্যে বেংকে নতুন নোট ছপা প্ৰক্ৰিয়া ফৰৱাৰ্ড কৰিছে বুলি উল্লেখ কৰি পোখাৰেলে কয় যে ছমাহৰ পৰা এবছৰৰ ভিতৰত এই কাৰ্য সম্পূৰ্ণ হ’ব। কিন্তু এই বাতৰি সন্দৰ্ভত পোখাৰেলৰ সঁহাৰি বিচৰাত বেংকৰ মুখপাত্ৰগৰাকীৰ ফালৰ পৰা কোনো ধৰণৰ মন্তব্য পোৱা নাযায়।
নেপালৰ তদানীন্তন প্ৰধানমন্ত্ৰী পুষ্পা কমল দাহাল ‘প্ৰচন্দ’ৰ নেতৃত্বত নেপালৰ মন্ত্ৰীসভাই ৩ মে’ত এই ভূখণ্ডসমূহ নেপালৰ অংশ হিচাপে দেখুওৱা নতুন মানচিত্ৰ অন্তৰ্ভুক্ত কৰি নতুন বেংকনোট ছপা কৰাৰ সিদ্ধান্ত গ্ৰহণ কৰিছিল।
কে পি শৰ্মা অলি নেতৃত্বাধীন চৰকাৰৰ দিনত ২০২০ চনৰ মে’ মাহত নেপাল চৰকাৰে নিজৰ ভূখণ্ডৰ ভিতৰত লিপুলেখ, কালাপানী আৰু লিম্পিয়াধুৰা অঞ্চল অন্তৰ্ভুক্ত কৰি নতুন ৰাজনৈতিক মানচিত্ৰ উন্মোচন কৰিছিল । ইয়াক নেপালৰ সংসদে সমৰ্থনো কৰিছিল। ইয়াৰ পিছত চৰকাৰে সকলো চৰকাৰী নথি-পত্ৰত ব্যৱহৃত পুৰণি মানচিত্ৰখন ভাৰতৰ আপত্তি থকা সত্ত্বেও নতুন মানচিত্ৰৰে সলনি কৰিছিল।
উল্লেখ্য যে, ভাৰতৰ পাঁচখন ৰাজ্য – ছিকিম, পশ্চিম বংগ, বিহাৰ, উত্তৰ প্ৰদেশ আৰু উত্তৰাখণ্ডৰ সৈতে নেপালৰ সীমা ১৮৫০ কিলোমিটাৰতকৈ অধিক সংলগ্ন হৈ আছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
