আন্তঃৰাষ্ট্ৰীয় ক্ৰিকেট পৰিষদে ২০২৮ত অনুষ্ঠিত হবলগীয়া আগন্তুক T20 বিশ্বকাপ প্ৰতিযোগিতাৰ ফৰ্মেটত এক উল্লেখযোগ্য পৰিৱৰ্তন আনিছে। অষ্ট্ৰেলিয়া আৰু নিউজিলেণ্ডত অনুষ্ঠিত হ’বলগীয়া এই বিশ্বকাপত মুঠ ২০টা দলে অংশগ্ৰহণ কৰিব। নতুন ফৰ্মেট অনুসৰি এইবাৰ Super8ৰ সলনি থাকিব Super10। লগতে ছেমি ফাইনেলত পোনপটীয়াকৈ যোগ্যতা অৰ্জন কৰিব দুটা দলে বিপৰীতে ছেমি ফাইনেলৰ আন দুটা স্থান নিৰ্ধাৰণ হ’ব এলিমিনেটৰ মেচৰ জৰিয়তে।
কেনেকুৱা হ’ব আগন্তুক T20 বিশ্বকাপৰ ফৰ্মেট?
প্ৰতিযোগিতাৰ আৰম্ভণিতে ২০টা দলক ৫টা গ্ৰুপত বিভক্ত কৰা হ’ব। প্ৰতিটো গ্ৰুপত থাকিব ৪টাকৈ দল। এই পৰ্যায়ত মুঠ ৩০খন মেচ অনুষ্ঠিত হ’ব। প্ৰতিটো দলে নিজৰ গ্ৰুপৰ আন তিনিটা দলৰ বিৰুদ্ধে এখনকৈ মেচ খেলিব। প্ৰতিটো গ্ৰুপৰ শীৰ্ষ দুটা দলে Super10 পৰ্যায়লৈ যোগ্যতা অৰ্জন কৰিব। পূৰ্বৰ বিশ্বকাপসমূহৰ Super8 পৰ্যায়ৰ সলনি এইবাৰ থাকিব Super10। এই পৰ্যায়ত যোগ্যতা অৰ্জন কৰা ১০টা দলক পুনৰ দুটা গ্ৰুপত ভাগ কৰা হ’ব। প্ৰতিটো গ্ৰুপত থাকিব ৫টাকৈ দল। Super10 পৰ্যায়ত প্ৰতিটো দলে নিজৰ গ্ৰুপৰ আন চাৰিটা দলৰ বিৰুদ্ধে খেলিব। ৰাউণ্ড-ৰবিন পদ্ধতিত মুঠ ২০খন মেচ অনুষ্ঠিত হ’ব Super10ত।
ছেমিফাইনেলত পোনপটীয়াকৈ যাব দুটা দল
নতুন ফৰ্মেটটোৰ আটাইতকৈ বৃহৎ পৰিৱৰ্তনটো হৈছে ছেমি ফাইনেললৈ যোগ্যতা অৰ্জনৰ নিয়ম। Super10ৰ দুয়োটা গ্ৰুপৰ শীৰ্ষস্থান অধিকাৰ কৰা দল দুটাই পোনপটীয়াকৈ ছেমি ফাইনেলত প্ৰৱেশ কৰিব। আনহাতে, দুয়োটা গ্ৰুপৰ দ্বিতীয় স্থানপ্ৰাপ্ত দল দুটাই বিপৰীত গ্ৰুপৰ তৃতীয় স্থানপ্ৰাপ্ত দলৰ বিৰুদ্ধে এলিমিনেটৰ মেচ খেলিব। এই দুখন নকআউট মেচত জয়ী হোৱা দল দুটাই ছেমি ফাইনেলৰ বাকী দুটা স্থান দখল কৰিব। এলিমিনেটৰ মেচৰ পিছত অনুষ্ঠিত হ’ব দুখন ছেমিফাইনেল। তাৰ পিছত বিজয়ী দুটা দলে ফাইনেলত মুখামুখি হ’ব। ছেমিফাইনেল আৰু ফাইনেল দুয়োখন মেচেই পৰম্পৰাগত নক আউট পদ্ধতিত অনুষ্ঠিত হ’ব।
ICCৰ এই নতুন ফৰ্মেটৰ ফলত প্ৰতিযোগিতা অধিক প্ৰতিদ্বন্দ্বিতাপূৰ্ণ হোৱাৰ সম্ভাৱনা আছে। বিশেষকৈ Super10 পৰ্যায়ত শীৰ্ষস্থান দখল কৰাৰ বাবে প্ৰতিটো দলৰ বাবে প্ৰতিখন মেচ অত্যন্ত গুৰুত্বপূৰ্ণ হ’ব। একে সময়তে এলিমিনেটৰ ব্যৱস্থা থকাৰ বাবে দ্বিতীয় আৰু তৃতীয় স্থানৰ বাবে হোৱা প্ৰতিদ্বন্দ্বিতাও অধিক ৰোমাঞ্চকৰ হোৱাৰ আশা কৰা হৈছে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
