অতিকে শোকাৱহ, তীব্ৰবেগী ৰেলৰ খুন্দাত ৭ টাকৈ হাতীৰ অকাল মৃ***ত্যুৰ পাছতে ৰাজ্যত বাতিল বহু কেইখন ৰে’ল
অতিকে শোকাৱহ, ৰাজ্য কঁপাইযোৱা ভয়ংকৰ ৰে’ল দুৰ্ঘটনায়। তীব্ৰবেগী ৰেলৰ খুন্দাত অকালতে প্ৰাণ হেৰুৱালে ৭ টাকৈ বন্য হাতীয়ে। মধ্য অসমৰ এন এফ ৰে’লৱেৰ লামডিং সংমণ্ডলৰ অন্তৰ্গত যমুনামুখ-কামপুৰ অংশত দিল্লী অভিমুখী ছাইৰাং-নতুন দিল্লী ৰাজধানী এক্সপ্ৰেছৰ তীব্ৰখুন্দাত এইদৰে প্ৰাণ হেৰুৱাব লগীয়া হয় বনৰীয়া হাতীৰ জাকটোৱে।
ঘটনা সন্দৰ্ভত জানিব পৰা অনুসৰি, শনিবাৰে পুঁৱতি নিশা প্ৰায় ২:১৭ বজাত গুৱাহাটীৰ পৰা প্ৰায় ১২৬ কিলোমিটাৰ দূৰত্বৰ স্থানত সংঘটিত হয় এই ঘটনা। দুৰ্ঘটনাটোৰ ফলত ৭ টাকৈ হাতীয়ে অকাল মৃত্যুক সাৱতি লোৱাৰ লগতে ৰেলখনৰ ইঞ্জিন আৰু ৫টা ডবা লাইনচ্যুত হয়। অৱশ্যে এন এফ ৰেলৱেই এক বিবৃতিত কয় যে কোনো যাত্ৰী হতাহত বা আহত হোৱা নাই।
এন এফ ৰে’লৱেৰ চিপিআৰঅ’ কে কে শৰ্মাই কয় যে এই কাণ্ড এনে এটা স্থানত সংঘটিত হৈছে যিটো নিৰ্দিষ্ট হাতী কৰিডৰ নহয়। তেওঁ লগতে কয়, “লোকো পাইলটে হাতীৰ জাকটো পৰ্যবেক্ষণ কৰি জৰুৰীকালীন ব্ৰেক লগাইছিল। কিন্তু তথাপি এই শোকাৱহ দুৰ্ঘটনা সংঘটিত হয়।”
বঢ়মপুৰৰ বিধায়ক জিতু গোস্বামীয়ে কয় যে নিশাৰ ভাগত পাহাৰৰ পৰা মাজে মাজে তেনেদৰে হাতী নামি আহে, কিন্তু নিশাৰ এই দুৰ্ঘটনাৰ মুল কাৰণ হৈছে ঘন কুঁৱলী। কুঁৱলীৰ বাবে দৃশ্যমানতা হ্ৰাস পোৱাৰ বাবেই নিশ্চয় এই ঘটনা সংঘটিত হৈছে। বৰ্তমানে সেই অংশৰ মাজেৰে পাৰ হ’বলগীয়া ৰে’লসমূহ ডাইভাৰ্ট কৰা হৈছে, আনহাতে পুনৰুদ্ধাৰৰ কাম চলি আছে।
চিপিআৰঅ’ই জানিবলৈ দিয়া মতে, “আক্ৰান্ত ডবাসমূহৰ যাত্ৰীসকলক অস্থায়ীভাৱে আন ডবাত উপলব্ধ খালী বাৰ্থত প্ৰেৰণ কৰা গুৱাহাটীলৈ অনা হৈছে। ৰে’লখন গুৱাহাটী পোৱাৰ পিছতে ক্ষতিগ্ৰস্ত ডবাসমূহৰ যাত্ৰীসকলক ৰখাৰ বাবে অতিৰিক্ত ডবা সংযোজন কৰা হ’ব, পাছত ৰে’লখনে পুনৰ যাত্ৰা আৰম্ভ কৰিব।
ইতিমধ্যে সংমণ্ডলীয় মুখ্য কাৰ্যালয়ৰ বিষয়াসকলৰ সৈতে দুৰ্ঘটনা সাহায্য ৰে’ল ঘটনাস্থলীত উপস্থিত হৈছে। গুৱাহাটী ৰেলৱে ষ্টেচনত হেল্পলাইন নম্বৰো জাৰি কৰা হৈছে, ০৩৬১-২৭৩১৬২১ / ২৭৩১৬২২ / ২৭৩১৬২৩।
আনহাতে এই দুৰ্ঘটনাৰ পাচতে বহুকেইখন ৰেল বাতিল কৰা হৈছে। লগতে বহু কেইটা ষ্টেছনত আৱদ্ধ হৈ আছে বহু কেইখন ৰেল। উজনি-নামনিৰ কেইবাখনো ৰে’ল আৱদ্ধ বিভিন্ন ষ্টেচনত। যোগীজান ষ্টেচনত আৱদ্ধ লিডু-গুৱাহাটী ইন্টাৰচিটী এক্সপ্ৰেছ, বাংগালোৰ SF এক্সপ্ৰেছ আৱদ্ধ হোজাই ষ্টেচনত। লামডিং জংচনত আৱদ্ধ কন্যাকুমাৰী বিবেক এক্সপ্ৰেছ, ডিমাপুৰত আৱদ্ধ কামৰূপ এক্সপ্ৰেছ ,চাপৰমুখত কাষ্ণনজংঘা এক্সপ্ৰেছ, গুৱাহাটীত ডনিপ’ল ৰে’ল। বাতিল কৰা হৈছে ৰাজ্যৰাণী এক্সপ্ৰেছ, হাফলং অভিমুখী ভিষ্টাড’ম ৰে’ল,জনশতাব্দী এক্সপ্ৰেছ,ৰঙিয়া নিউ তিনিচুকীয়া এক্সপ্ৰেছ।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
