অসম লাইভ২৪ঃ দেশৰ প্ৰতি চাৰিটা শিশুৰ ভিতৰত এটি শিশু যৌন নিৰ্যাতনৰ স্বীকাৰ হয়। দেশত সৰ্বাধিক পকছো ধাৰাও যৌন নিৰ্যাতনকাৰীৰ ওপৰতেই প্ৰযোজ্য হৈছে। বছৰটোৰ শেষত দিয়া খাতিয়ানত পোহৰলৈ আহিছে এই ভয়ংকৰ তথ্য। পকছো ধাৰা লগোৱা সৰ্বাধিক অপৰাধীৰ তালিকাত আছে অসম, মহাৰাষ্ট্ৰ, পশ্চিমবংগ। ইউনিচেফ ইণ্ডিয়া আৰু এনফোল্ড প্ৰটেক্টিভে প্ৰকাশ কৰা যৌথ সমীক্ষাৰ তথ্য তুলি ধৰিছে উচ্চতম ন্যায়ালয়ৰ ন্যায়াধীশ ডিআই চন্দ্ৰচুড়ে।
সমীক্ষাত প্ৰকাশ পোৱামতে, পকছো ধাৰা সাধাৰণতে প্ৰতাৰণাৰ গোচৰৰ প্ৰমাণ পোৱাসকলৰ ৪৬.৬ শতাংশৰ ক্ষেত্ৰতেই নিৰ্যাতিতাৰ বয়স ১৬ ৰ পৰা ১৮ বছৰ। উচ্চতম ন্যায়ালয়ৰ ন্যায়াধীশে প্ৰকাশ কৰামতে এই ধৰণৰ গোচৰৰ ৰায় প্ৰদান কৰিবলৈ ন্যায়াধীশো সমস্যাৰ সন্মুখীন হয়। তেওঁ কয়, ‘নাৱালক আৰু নাৱালিকাৰ সম্পৰ্ক আৰু অপৰাধৰ ঘটনাৰ বিচাৰ কৰা জটিল কথা। ৰায় দিয়াটো জটিল।’
২০১৬ ৰ পৰা ২০২০ চনলৈকে মুঠ ৭,০৬৮ টা পকছো ধাৰাৰ ৰায় দিয়া হৈছে। সেই ঘটনাসমূহৰ ওপৰত চলাই থকা তদন্তত জড়িত অধিবক্তা স্বাগতা ৰাহা, শ্ৰুতি ৰামকৃষ্ণণে প্ৰকাশ কৰা মতে ১,৭১৫ টা ঘটনাতেই নিৰ্যাতিতা আৰু নিৰ্যাতনকাৰীৰ মাজত পূৰ্বে প্ৰেমৰ সম্পৰ্ক থকা বুলি প্ৰমাণিত হৈছে। এইধৰণৰ ঘটনা সৰ্বাধিক সংঘটিত হৈছে পশ্চিমবংগ, মহাৰাষ্ট্ৰ আৰু অসমত।
উল্লেখ্য যে উচ্চতম ন্যায়লয়ৰ মুখ্য ন্যায়াধীশে এই সমীক্ষা প্ৰকাশ কৰিছে ১০ ডিচেম্বৰত। সমীক্ষাত উল্লেখ থকা অনুযায়ী ৮৭.৯ শতাংশ নিৰ্যাতিতাই স্বীকাৰ কৰি লৈছে যে অভিযুক্তসকলৰ সৈতে নিৰ্যাতিতাৰ প্ৰেমৰ সম্পৰ্ক আছিল। আনহাতে বহুক্ষেত্ৰত দেখা গৈছে যে নাবালিকাৰ প্ৰেমৰ কথা জানি পৰিয়ালৰ লোকে বলপূৰ্বক বিয়া দিছে নাবালিকাক। আৰু এই বিয়াৰ পাছতেই নাৱালিকা যৌন আতিশায্যৰ বলি হৈছে। সমীক্ষকৰ দাবী, ১৮ বছৰৰ তলৰ দেশৰ বহু নাবালিকাই যৌন কাৰ্যকলাপ কৰিবলৈ নিজেই মান্তি হৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
