মানৱেন্দ্ৰ কুমাৰ দাসঃ বিশ্বত ভূ-স্বৰ্গ হিচাপে পৰিচিত কাশ্মীৰক লৈ চলিছে ভয়ংকৰ ষড়যন্ত্ৰ৷ তেনে এক ষড়যন্ত্ৰৰ তথ্য সম্প্ৰতি পোহৰলৈ আহিছে৷ কাশ্মীৰৰ শেহতীয়া পৰিস্থিতিক লৈ ৰমন শৰ্মা নামৰ সমাজকৰ্মী এগৰাকীয়ে তথ্য জনাৰ অধিকাৰ আইন (RTI)ৰ অধীনত লাভ কৰিছে এই বিস্ফোৰক তথ্য৷ তাকো এই তথ্য সদৰি কৰিছে খোদ ভাৰতৰ ৰাষ্ট্ৰীয় ঘাইপথ প্ৰাধিকৰণে৷
এক RTIৰ আবেদনৰ উত্তৰত প্ৰাধিকৰণে সদৰি কৰিছে যে যোৱা ৩ বছৰত কাশ্মীৰৰ ৫ খন জিলাত ১ লাখ ১০ হাজাৰতকৈও মূল্যৱান গছ কাটি পেলোৱা হৈছে৷ এই গছসমূহৰ ভিতৰত আপেল আৰু আখৰোটৰ গছৰ লগতে বহু লাখটকীয়া মছলাৰ গছো আছে৷ যিসমূহ গছ ধ্বংস কৰা হ’ল, সেই গছৰ আনুমানিক মূল্য প্ৰায় ১৫ কোটি টকা৷
উল্লেখযোগ্য যে অনুৰূপ ধৰণে দেশৰ ৰাজধানী দিল্লীতো যোৱা ৩ বছৰত ৭৭ হাজাৰতকৈও অধিক জোপা গছ ধ্বংস কৰা হৈছিল৷ দেশত উন্নয়ন আৰু পথ সম্প্ৰসাৰণৰ নামত যি হাৰত বনাৱৰণ ধ্বংস কৰা হৈছে তাক লৈ ন্যায়ালয়ে হস্তক্ষেপ কৰিব লগীয়া পৰিস্থিতি আহি পৰিছে৷ কিন্তু তাৰ পাছতো যেন আজি নীৰৱ-নিৰ্বিকাৰ হৈ ৰৈছে চৰকাৰ৷ উন্নয়নৰ অভিশাপত ধ্বংস হ’ব লাগিছে পাৰিপাৰ্শ্বিকতা৷
লগতে পঢ়ক দেশ সংকটত, সৰ্বত্ৰে বিক্ষোভ! তাৰ মাজতে ৰাজপথত চুম্বনৰত এহাল দম্পতী
কুৰি বছৰ পূৰ্বে ৪ লেন ৰাষ্ট্ৰীয় ঘাইপথৰ প্ৰসংগ আহিছিল৷ কিন্তু এতিয়া ৬ লেন আৰু ৮ লেনযুক্ত ৰাষ্ট্ৰীয় ঘাইপথৰ নিৰ্মাণ হ’ব লাগিছে৷ আৰু ইয়াৰ বাবে বিপদগ্ৰস্ত হৈ পৰিছে প্ৰকৃতি৷ ভাৰতৰ প্ৰাকৃতিক বৈচিত্ৰৰ ক্ষেত্ৰত উত্তৰ পূৰ্বাঞ্চল আৰু কাশ্মীৰৰ স্থান সদায় সুকীয়া৷ তৎসত্ত্বেও আজি অস্তিত্বৰ সংকটত দেশৰ প্ৰাকৃতিক বৈচিত্ৰ৷
প্ৰাপ্ত তথ্য অনুসৰি শ্ৰীনগৰ ৰিং ৰোড নিৰ্মাণৰ পৰিকল্পনা লৈছে ভাৰতৰ ৰাষ্ট্রীয় ঘাইপথ প্ৰাধিকৰণে৷ প্ৰস্তাৱিত ৰিং ৰোডৰ দৈৰ্ঘ হ’ব ৪২.১০ কিলোমিটাৰ৷ আৰু সেই প্ৰকল্পৰ বাবে প্ৰাৰম্ভিক ব্যয় নিৰ্ধাৰণ কৰা হৈছে ৯৩৯.৪১ কোটি টকা৷ অৱশ্যে এই ব্যয় ২০১৯ চনতে নিৰ্ধাৰণ কৰা হৈছিল৷ সম্প্ৰতি ব্যয় হ’বলগীয়া ধনৰ পৰিমাণ ১২০০ কোটি টকাৰো অধিক হ’ব বুলি খোদ ৰাষ্ট্ৰীয় ঘাইপথ প্ৰাধিকৰণৰ সূত্ৰই প্ৰকাশ কৰিছে৷ প্ৰস্তাৱিত এই প্ৰকল্পৰ ফলত ক্ষতিগ্ৰস্ত হ’ব কাশ্মীৰৰ ৫২ খন কৃষি প্ৰধান গাঁও৷
লগতে পঢ়ক সতীয়া কন্যাৰ সৈতে প্ৰেমৰ সম্পৰ্ক! আছে দুটাকৈ সন্তান এলন মাস্কৰ পিতৃৰ এৰ’ল মাস্কৰ
এই গাঁওসমূহত বসবাস কৰা লোকসকলৰ মূল কৃষি হৈছে ফলৰ উৎপাদন৷ মূলত আপেল আৰু আখৰোট অন্যতম প্ৰধান বাণিজ্যিক ফল৷ কিন্তু ৫২ খন গাঁৱত ১ লাখ ১০ হাজাৰকৈও অধিক আপেল আৰু আখৰোটৰ গছ ধ্বংস কৰা হ’ল৷ ইয়াৰ ফলত ৫২ খন গাঁৱৰ সহস্ৰাধিক পৰিয়াল ক্ষতিগ্ৰস্ত হৈছে৷ এই প্ৰকল্পৰ অধীনত পুলৱামা, বুৰগাম, বাৰমূলা, শ্ৰীনগৰ আৰু বান্দিপুৰা জিলা বেয়া ধৰণে ক্ষতিগ্ৰস্ত হ’ব৷ উল্লেখযোগ্য যে বিশ্বৰ ফলৰ বজাৰত কাশ্মীৰী আপেলৰ এক সুকীয়া পৰিচয় আছে৷ কিন্তু সেই পৰিচয়ো আজি সংকটৰ গৰাহত৷ কিয়নো খোদ চৰকাৰী কৰ্তৃপক্ষই পথ নিৰ্মাণৰ নামত ধ্বংস লক্ষাধিক গছ কৰিছে৷
ফল আৰু প্ৰাকৃতিক নৈসৰ্গিক পটভূমিৰ বাবে বিখ্যাত কাশ্মীৰ পৰ্যটনৰো এক অন্যতম কেন্দ্ৰ৷ ইতিমধ্যে অৰ্ধশতিকাজোৰা সন্ত্ৰাসবাদৰ জৰ্জৰিত হোৱা কাশ্মীৰত পৰ্যটকৰ সংখ্যাও চকুত লগা ধৰণে হ্ৰাস হৈছে৷ তাৰ পাছত আৰম্ভ হৈছে বন ধ্বংসৰ অভিযান৷ এনে প্ৰতিকূল পৰিৱেশত প্ৰকৃতিৰ ৰম্যভূমি কাশ্মীৰে ভূ-স্বৰ্গৰ মৰ্যাদা আৰু কিমান দিনলৈ ৰাখিব পাৰিব সেইটোৱো এতিয়া জটিল প্ৰশ্ন হৈ উঠিছে৷ হয়তো এতিয়াৰে পৰা কাশ্মীৰ থাকিব কিন্তু নাথাকিব আপেল আৰু আখৰোট৷ হয়তো প্ৰকৃতিৰ লীলাও এক ইতিহাসত পৰিণত হ’ব৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
