বিশ্বকাপ ফুটবলৰ জ্বৰৰ মাজতে বিশ্বখ্যাত পপ গায়িকা টেইলৰ ছুইফ্টে বিৱাশপাশত আৱদ্ধ হৈছে এগৰাকী আমেৰিকান ফুটবলাৰৰ সৈতে। এই সৌভাগ্যৱান খেলুৱৈগৰাকী হৈছে কেলচ। পিছে ট্ৰেভিছ কেলচে আমেৰিকাত অতিকৈ জনপ্ৰিয় আমেৰিকান ফুটবলৰহে তাৰকা। বৰ্তমান চলি থকা ফিফা বিশ্বকাপ আৰু ট্ৰেভিছ কেলচে খেলা আমেৰিকান ফুটবলৰ মাজত আছে যথেষ্ট পাৰ্থক্য। ফিফা বিশ্বকাপত খেলা খেলবিধক আচলতে Soccer বুলিহে কয়, সেয়া নিশ্চয় আপোনালোকে জানে। সেয়া যি কি নহওক সম্প্ৰতি সমগ্ৰ বিশ্বজুৰি জনপ্ৰিতাৰ শীৰ্ষত উপনীত হৈছে ট্ৰেফিছ-টেইলৰৰ বিৱাহৰ খবৰ। বিগত শুকুৰবাৰে নিউয়ৰ্কৰ বিখ্যাত মেদিচন স্কুৱেৰ গাৰ্ডেনত আড়ম্বৰপূৰ্ণভাৱে এই বিৱাহ অনুষ্ঠান অনুষ্ঠিত হয়।
কোন কোন উপস্থিত আছিল ট্ৰেভিছ-টেইলৰৰ এই বিৱাহ অনুষ্ঠানত?
পপ তাৰকা আৰু ফুটবলাৰৰ এই যুটিটোৰ বিৱাহ অনুষ্ঠানত হলিউড আৰু সংগীত জগতৰ বহু খ্যাতনামা ব্যক্তি উপস্থিত আছিল। অতিথিসকলৰ ভিতৰত গিগি হাদিদ, ব্ৰেডলি কুপাৰ, ডাকোটা জনছন, মাৰিস্কা হাৰগিটে আৰু পিটাৰ হাৰ্মান, এড ছীৰান আৰু চেৰী চিবৰ্ণ, হাইম ছিষ্টাৰ্ছ, এলি গোল্ডিং, বেনছন বুন, মাৰেন মৰিছ, কেলছি বেলেৰিনি, মিৰাণ্ডা লেম্বাৰ্ট, দ্য চিক্স, ব্ৰেড পেইছলি আৰু কিম্বাৰ্লি উইলিয়ামছ-পেইছলি, হিউ গ্ৰাণ্ট, কাৰ্লি ক্লছ আৰু জ’শুৱা কুশ্বনাৰ, জ’ই ক্ৰাভিট্জ, জেছন সুডেইকিছ, ইথান হক, জিমি ফেলন আৰু টমি হিলফিগাৰৰ দৰে বহু বিশিষ্ট অতিথি উপস্থিত আছিল। বিৱাহৰ পূৰ্বে পৰিয়ালৰ ঘনিষ্ঠ সদস্য আৰু বন্ধুসকলৰ উপস্থিতিত এক সৰু ডিনাৰৰো আয়োজন কৰা হৈছিল। অৱশ্যে এতিয়ালৈকে টেইলৰ ছুইফ্ট আৰু ট্ৰেভিছ কেলচে নিজৰ বিৱাহৰ কোনো ফটো বা আনুষ্ঠানিক পোষ্ট সামাজিক মাধ্যমত শ্বেয়াৰ কৰা নাই।
২০২৫ চনত হৈছিল বাগদান
টেইলৰ ছুইফ্ট আৰু ট্ৰেভিচ কেলছে ২০২৫ চনৰ ২৬ আগষ্টত এক যৌথ ইনষ্টাগ্ৰাম পোষ্টৰ জৰিয়তে নিজৰ বাগদানৰ কথা ঘোষণা কৰিছিল। সেই সময়ত তেওঁলোকে এক সুন্দৰ গাৰ্ডেনত প্ৰপ’জেলৰ ছবি অনুৰাগীসকলৰ বাবে শ্বেয়াৰ কৰিছিল। ‘দ্য জিমি এণ্ড নেথ শ্ব’ উইথ এমা’ অনুষ্ঠানত ট্ৰেভিচৰ পিতৃ এড কেলছে প্ৰকাশ কৰিছিল যে, বাগদানৰ প্ৰায় এমাহ পূৰ্বেই ট্ৰেভিচে টেইলৰৰ পিতৃ স্কট ছুইফ্টৰ ওচৰত বিৱাহৰ অনুমতি বিচাৰিছিল।
বিৱাহ অনুষ্ঠানত ১,১০০গৰাকী অতিথি, ১৮৯ কোটি টকা ব্যয়
এক প্ৰতিবেদন অনুসৰি, এই ৰাজকীয় বিৱাহত প্ৰায় ১,১০০ জন অতিথিক নিমন্ত্ৰণ জনোৱা হৈছিল। বিবাহ অনুষ্ঠানৰ বাবে প্ৰায় ১০ মিলিয়ন ডলাৰৰ পৰা ২০ মিলিয়ন ডলাৰ (ভাৰতীয় মুদ্ৰাত প্ৰায় ৯৪.৭২ কোটিৰ পৰা ১৮৯.৫২ কোটি টকা) ব্যয় হৈছে বুলি অনুমান কৰা হৈছে। মেদিচন স্কুৱেৰ গাৰ্ডেনত অনুষ্ঠিত এই আয়োজন বিশ্বৰ অন্যতম ব্যয়বহুল চেলিব্ৰিটি বিৱাহ হিচাপে পৰিগণিত হ’ব পাৰে।
টেইলৰ আৰু ট্ৰেভিছৰ প্ৰেম কাহিনী
ট্ৰেভিছ কেলচে পূৰ্বতে জনোৱা অনুসৰি, টেইলৰ ছুইফ্টৰ ‘এৰাছ ট্যুৰ’ কনচাৰ্টৰ এখন অনুষ্ঠানত তেওঁ নিজৰ ফোন নম্বৰ লিখা এটা ‘ফ্ৰেণ্ডশ্বিপ ব্ৰেচলেট’ টেইলৰক দিবলৈ চেষ্টা কৰিছিল।
যদিও সেই প্ৰচেষ্টাত তেওঁ সফল হোৱা নাছিল, তথাপিও ২০২৩ চনৰ জুলাই মাহত ‘নিউ হাইটছ’ পডকাষ্টত টেইলৰৰ প্ৰতি নিজৰ আগ্ৰহৰ কথা ৰাজহুৱাভাৱে প্ৰকাশ কৰিছিল। ‘পিপল’ৰ প্ৰতিবেদন অনুসৰি, তাৰ কিছুদিন পাছতেই দুয়োৰে মাজত নিয়মীয়াকৈ যোগাযোগ আৰম্ভ হয় আৰু পিছলৈ সম্পৰ্ক গভীৰ হয়। এই সম্পৰ্ক গঢ়ি উঠাত টেইলৰৰ মাতৃয়েও গুৰুত্বপূৰ্ণ ভূমিকা পালন কৰিছিল বুলি টেইলৰৰ ঘনিষ্ঠসকলে প্ৰকাশ কৰে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
