অসম লাইভ২৪ঃ অষ্ট্ৰেলিয়াক চেন্নাইৰ ২২ গজত হৰুৱাই বিশ্বকাপৰ বাবে দৌৰ আৰম্ভ কৰিছো ৰোহিত শৰ্মাই। বিশ্বকাপত এইবাৰ অষ্ট্ৰেলিয়াৰ মুখামুখি হ’ব ভাৰত। ইতিমধ্যেই প্ৰতীক্ষাৰ প্ৰহৰ গণিছে ক্ৰিকেট অনুৰাগীয়ে। দেওবাৰে ফাইনেলত অষ্ট্ৰেলিয়াক হৰুৱাই ভাৰতে বিশ্বজয়ৰ সপোন দেখিছে। বহুতেই কৈছে এইবাৰ ফাইনেলত যদি হাৰে তেন্তে কাহানিও বিশ্বকাপ ভাৰতে জয় কৰিব নোৱাৰিব। এইবাৰ সকলোবোৰ পৰিকল্পনা ভাৱি চিন্তি লৈছে টিম ব্লুৱে। ছেমিফাইনেলৰ প্রথম একাদশত কোন কোন খেলুৱৈ থাকিব সেই বিষয়েও ভাৱিচিন্তি সিদ্ধান্ত লৈছে ৰাহুল দ্ৰাবিড়ে। ফাইনেলৰ বাবে কেইবাটাও বিশেষ পৰিকল্পনা কৰা হৈছে। প্ৰথম একাদশত ছেমিফাইনেলৰ খেলুৱৈসকলেই থাকিবনে অন্যান্য কোনো নতুন খেলুৱৈ থাকিব?
অষ্ট্ৰেলিয়াৰ বিৰুদ্ধে সাম্ভাব্য একাদশত কোন কোন থাকিব?
ৰোহিত শৰ্মাঃ দলৰ দৰে ভাৰতৰ অধিনায়কো ফৰ্মত আছে। কেৱল নেতা হিচাপেই নহয়, বেট হাতত লৈ ধাৰাবাহিকভাৱে ৰানো কৰিছে তেওঁ। ইনিংছৰ আৰম্ভনিতেই প্ৰতিপক্ষৰ বলাৰসকলক চাপত পেলাই দিব পৰা পাৰফৰমেন্স। ছেমিফাইনেলত নিউজিলেণ্ডৰ বিৰুদ্ধেও আগ্ৰাসী হৈ বেটিং কৰিছে ৰোহিতে। ফাইনেলত তেওঁৱেই অপেনাৰ হিচাপে থাকিব তাত কোনো সন্দেহ নাই।
শুভমন গীলঃ ডেংগুত আক্ৰান্ত হোৱাৰ পাছতো আকৌ উভতি আহি দলৰ হৈ ভাল পাৰ্ফৰমেন্স দেখুৱাইছে তৰুণ অপেনাৰগৰাকীয়ে। ইনিংছৰ আৰম্ভনিতে অধিনায়ক ৰোহিতৰ সৈতে তেঁৱো আগ্ৰাসী বেটিং কৰিছে। ছেমিফাইনেলত কিছু আঘাত পাইছিল শুভমনে। ফাইনেলৰ মূল একাদশত যে শুভমন গীল থাকিব তাত কোনো সন্দেহ নাই।
বিৰাট কোহলীঃ এদিনীয়া ক্ৰিকেটত ভাৰতৰ প্ৰাক্তন অধিনায়কে ৫০তম শতৰান কৰিছে। বিশ্বকাপতো ভাল প্ৰদৰ্শন দেখুৱাইছে কোহলীয়ে। পৈণত বেটিঙৰ ওপৰিও ধাৰাবাহিকভাৱে ৰানো কৰিছে। ফাইনেল কোহলীক বাদ দি জানো সম্ভৱ।
শ্ৰেয়ছ আয়াৰঃ বিশ্বকাপৰ শেষ চাৰিখন মেচত বহুকেইটা ৰান কৰিছে শ্ৰেয়ছে। তাৰপিছতেই দুইখন মেচত শতৰান। ভাৰতীয় দলৰ বেটিং অৰ্ডাৰত চাৰি নম্বৰতেই তেওঁ থাকে। স্বাভাৱিকভাৱেই দেওবাৰে শ্ৰেয়ছক বাহিৰত ৰখাৰ কথা নাহে।
লোকেশ ৰাহুলঃ ধাৰাবাহিকভাৱে ৰান লৈছে লোকেশ ৰাহুলেও। নেদাৰলেণ্ডৰ বিৰুদ্ধে তেওঁ শতৰান কৰিছে। উইকেটৰক্ষক হিচাপেও তেওঁ সকলোৰে নজৰ কাঢ়িবলৈ সক্ষম হৈছে। ছেমিফাইনেলতো ভাল প্ৰদৰ্শন দেখুৱাইছে লোকেশ ৰাহুলে। তেওঁ ভাৰতৰ মিডল অৰ্ডাৰৰ অন্যতম ভৰষা। ছেমিফাইনেলত ভাৰতৰ প্ৰথম একাদশত সহ-অধিনায়ক হিচাপে তেওঁ থাকিব।
সূৰ্যকুমাৰ যাদৱঃ বিশ্বকাপত এতিয়াও বৰ বিশেষ ৰান ল’ব পৰা নাই সূৰ্যই। বাৰে বাৰে দ্ৰুত আউটো হৈছে। সুযোগ পালে ফাইনেলত এই আক্ষেপ দূৰ কৰিব পাৰিব বুলি আশাবাদী সূৰ্যকুমাৰ। অষ্ট্ৰেলিয়াৰ বিৰুদ্ধে তেওঁ নামিব বেটিং অৰ্ডাৰৰ ছয় নম্বৰত। তেওঁকো ফাইনেল খেলিবলৈ দিয়াৰ সম্ভাৱনা আছে।
ৰবীন্দ্ৰ জাদেজাঃ হাৰ্দিক পাণ্ডিয়াই আঘাত পোৱাৰ পাছত ভাৰতৰ প্রথম একাদশত একমাত্ৰ অলৰাউণ্ডাৰ হৈছে ৰবীন্দ্ৰ জাদেজা। বেট আৰু বল হাতত লৈ ভাল ফৰ্মত আছে বাওঁহতীয়া জাদেজা। দলৰ ভাৰসাম্যৰ ক্ষেত্ৰত তেওঁৰ ভূমিকা বিশেষভাৱে গুৰুত্বপূৰ্ণ। বলাৰ জাদেজাক বাদ দি ফাইনেলৰ মূল একাদশ তৈয়াৰ নকৰে দ্ৰাবিড়ে।
কুলদীপ যাদৱঃ বেছ কিছু দিন ধৰি ভাল ফৰ্মত আছে কুলদীপ যাদৱ। বিশ্বকাপতো তেওঁ ব্যতিক্ৰম নহয়। ধাৰাবাহিকভাৱে তেওঁ উইকেট লৈছে। অষ্ট্ৰেলিয়াৰ বিৰুদ্ধে তেঁওৰ খেলক লৈ কোনো সংশয় নাই।
যশপ্ৰীত বুমৰাহঃ বেছ কিছু দিন ধৰি তেওঁ ভাল ফৰ্মত আছে। ভাৰতৰ বলিং আক্ৰমণৰ প্রধান মুখ বুমৰাহ। বিশ্বকাপ দলৰ তেওঁ অন্যতম বলাৰ। তেওঁক বাদ দি ফাইনেল খেলাৰ প্ৰশ্নই নাই। তেওঁৰ বিকল্পও নাই দলত। মেচত নামিব তেওঁ বেটিং অৰ্ডাৰ ৯নম্বৰত।
মহম্মদ ছামিঃ বিশ্বকাপৰ সপোনৰ দৌৰত মহম্মদ ছমিও আছে। তেওঁৰ ফৰ্মক লৈ সকলোৱেই আশাবাদী। নিউজিলেণ্ডৰ বিৰুদ্ধে ছেমিফাইনেলত ৭উইকেট লৈ দেশবাসীৰ দৃষ্টি কাঢ়িছে। এই মুহূৰ্তত তেওঁ দলৰ প্ৰধান ষ্ট্ৰাইক বলাৰ। মেচৰ যিকোনো পৰিস্থিতিত তেওঁ উইকেট ল’ব পাৰে। ফাইনেলত ছামি থকাৰ পূৰ্ণ সম্ভাৱনা আছে।
মহম্মদ ছিৰাজঃ চলিত বিশ্বকাপত বিশেষ পাৰ্ফৰমেন্স দেখুৱাব পৰা নাই ছিৰাজে। অৱশ্যে দলটোৰ এজন বেগী বলাৰ হিচাপে মূল একাদশত তেওঁ থকাৰ সম্ভাৱনা আছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
