২০২২ বৰ্ষৰ জানুৱাৰী মাহত মাতৃ হৈছে অভিনেত্ৰী প্ৰিয়ংকা চোপ্ৰা। চেৰগেছিৰ মাধ্যমেৰে জন্ম হৈছে প্ৰিয়ংকা নিকৰ সন্তান মালতি মেৰি চোপ্ৰা জোনাছৰ। মালতিৰ জন্মৰ পাছতেই আৰম্ভ হৈছিল বিতৰ্কৰ। কিয় চেৰগেছিৰ মাধ্যমেৰে মাতৃ হ’ল প্ৰিয়ংকা? মালতিৰ জন্মৰ এবছৰ পাৰ হ’লেও এই বিষয়টোৰ চৰ্চা যেন কমা নাই। সন্তান জন্মৰ এই প্ৰক্ৰিয়া বহুদিন পূৰ্বেই আৰম্ভ কৰিছিল প্ৰিয়ংকাই। ৩০ বছৰ বয়সৰ পৰাই ডিম্বানুৰ সংৰক্ষণ কৰি গৈছিল প্ৰিয়ংকাই। ইফালে নিকৰ সৈতেই যে বিয়া হ’ব সেই কথা তেওঁ তেতিয়া কল্পনাই কৰা নাছিল।
এই সন্দৰ্ভত প্ৰিয়ংকাই কয়, ‘মই সন্তান ভালপাওঁ। মই সকলো সময়তে সন্তান এটাৰ পৰিকল্পনা কৰি আছিলো। সেয়ে ৩০ বছৰ বয়সৰ পৰাই মই ডিম্বানুৰ সংৰক্ষণ কৰি আছিলো।’ বহুতেই হয়তো জানে প্ৰিয়ংকাৰ মাক এগৰাকী স্ত্ৰী ৰোগ বিশেষজ্ঞা। মাতৃৰ পৰামৰ্শ মানিয়েই এই পদক্ষেপ লৈছিল প্ৰিয়ংকাই। প্ৰিয়ংকাই নিজেই এই কথা স্বীকাৰ কৰি কয়, ‘মই উচ্চাকাংক্ষী, কেৰিয়াৰত মই সফলতা বিচাৰিছিলো। কিন্তু সেই সময়ত মই মনৰ মানুহ কাকো পোৱা নাছিলো, যাৰ সৈতে মই সন্তানৰ পৰিকল্পনা কৰিম। সেয়ে মায়ে দিয়া পৰামৰ্শ মানিয়েই মই এই কাম কৰিছিলো।’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
