Priyanka Chopra Speech: বহু যুৱকৰ হৃদয়ৰ স্পন্দন প্ৰিয়ংকা চোপ্ৰা। সামাজিক মাধ্যমত প্ৰিয়ংকাৰ আছে বহু হাজাৰ ফ’লোৱাৰ্চ। প্ৰায়ে প্ৰিয়ংকাৰ ফটো বা ভিডিঅ’ ভাইৰেল হৈ থাকে সামাজিক মাধ্যমত। এইবাৰ অভিনেত্ৰী প্ৰিয়ংকা চোপ্ৰাই অতি শক্তিশালী আৰু স্পষ্ট বাৰ্তা দিছে যে ঘৰুৱা কাম-কাজ আৰু ঘৰুৱা দায়িত্ব কেতিয়াও লিংগভিত্তিক হ’ব নোৱাৰে। শেহতীয়াকৈ ‘কান লায়ন্স’ৰ মঞ্চত গ্ল’বেল আইকন প্ৰিয়ংকাই স্পষ্টকৈ কৈছে যে ৰন্ধা-বঢ়া বা ঘৰ চাফা কৰাৰ দৰে কামবোৰ কেৱল মহিলাৰ দায়িত্ব বুলি কোৱা এই মানসিকতাক সলোৱাৰ সময় আহি পৰিছে।
আলোচনাত প্ৰিয়ংকাই জোৰ দি কয় যে দৈনন্দিন ঘৰুৱা কাম-কাজ আচলতে লিংগ বিষয় নহয়, বৰঞ্চ প্ৰতিজন প্ৰাপ্তবয়স্ক জীয়াই থাকিবলৈ প্ৰয়োজনীয় মৌলিক জীৱন দক্ষতা। লিংগ নিৰ্বিশেষে সকলোৱে এই কামবোৰ শিকিব লাগে। তেওঁ কয়, “ঘৰ চাফা কৰা বা ৰন্ধা-বঢ়া কৰাটো কেৱল নাৰীৰ কাম নহয়। এইবোৰ প্ৰাপ্তবয়স্ক হোৱাৰ সাধাৰণ লক্ষণ। লিংগৰ অজুহাতত নিজৰ কামবোৰ লুকুৱাই নাৰাখিব।”
অভিনেত্ৰীগৰাকীয়ে সমাজৰ মনোভাৱ সলনি কৰি ঘৰুৱা কামৰ আওপুৰণি ধাৰণাসমূহৰ বাহিৰলৈ যোৱাৰ প্ৰয়োজনীয়তাৰ ওপৰত গুৰুত্ব আৰোপ কৰে। তেওঁ যুক্তি দিছিল যে লিংগৰ ওপৰত ভিত্তি কৰি ঘৰুৱা কাম-কাজ ভাগ কৰাৰ কোনো যুক্তি নাই, কিয়নো এই দক্ষতাবোৰ দৈনন্দিন জীৱনৰ অংশ।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
