অসম লাইভ২৪ঃ ২০২৪ চনত শেষ হ’ব সপ্তদশ লোকসভাৰ ম্যাদ। আগন্তুক বৰ্ষতেই অনুষ্ঠিত হ’ব লোকসভা নিৰ্বাচন। সেয়ে ৰাজনৈতিকভাৱেও নতুন বছৰটো খুবেই গুৰুত্বপূৰ্ণ হ’ব। কেন্দ্ৰৰ শাসক দল বিজেপিসহ সকলো দলেই আৰম্ভ কৰিছে নিৰ্বাচনী কুছকাৱাচ। ৰাজনৈতিকভাৱে আগন্তুক বছৰত কি ঘটিব সেই বিষয়টোক নজৰ দি আছে দেশৰ ১৪০ কোটি জনতাই। নৰেন্দ্ৰ মোদীয়ে ২৪ চনত প্ৰধানমন্ত্ৰীৰ আসন ধৰি ৰাখিব পাৰিবনে? নে ৰাহুল গান্ধী প্রধানমন্ত্ৰীৰ আসনত বহিব? জ্যোতিষ গণনাই অন্যান্য বিষয়ৰ ওপৰিও ৰাজনৈতিক বিষয়তো বিশেষ গণনা চলাইছে। বিশেষকৈ ৰাহুল গান্ধীৰ জন্মছকৰ ওপৰত বিশেষভাৱে গণনা চলাইছে জ্যোতিষীয়ে।
কি আছে ৰাহুল গান্ধীৰ জন্মছকত?
১৯৭০ চনৰ ১৯ জুনৰ দুপৰীয়া ২ বাজি ২৮ মিনিটত দিল্লীত জন্মগ্ৰহণ কৰিছিল ৰাহুল গান্ধীয়ে। তেওঁ তুলা ৰাশিৰ জাতৰ। তেওঁৰ কোষ্ঠীত বিপৰীতমুখী বৃহস্পতিয়ে বৰ্তমান যি ৰাহুৰ ঘৰ আৰু সূৰ্যৰ নৱম ঘৰত থাকি মঙ্গল গ্ৰহৰ দিশত দৃষ্টি দি আছে। বৰ্তমান ৰাহুল গান্ধীৰ জন্মছকত ৰাহুৰ মহাদশাত বৃহস্পতিৰ অন্তৰ্দশা চলি আছে। যি ২৬ ডিচেম্বৰ ২০২১ ৰ পৰা আৰম্ভ কৰি জাৰি থাকিব ২১ মে ২০২৪ চন পৰ্যন্ত। জন্মছকত কেমদ্ৰুম যোগ আছে ৰাহুল গান্ধীৰ। এই অশুভ যোগৰ কাৰণেই তেওঁ লোৱা সিদ্ধান্তসমূহ বহুসময়ত ভুল প্ৰমাণিতও হৈছে।
২০২২ চনত ৰাহুল গান্ধীৰ নেতৃত্বত কংগ্ৰেছে ভাৰত জোড়ো যাত্ৰা আৰম্ভ কৰিছিল। এই যাত্ৰাৰ সুফল হিচাপে কৰ্ণাটক আৰু তেলেঙ্গানাৰ দৰে দক্ষিণ ভাৰতীয় ৰাজ্যসমূহৰ বিধানসভা নিৰ্বাচনত জয় লাভ কৰিছে কংগ্ৰেছে। ৰাহুল গান্ধীৰ জন্মছকত বিংশোত্তৰি দশাৰ প্রভাৱত এই সাফল্য লাভ কৰিছে ৰাহুলে। কিন্তু তাৰপিছতো ৰাজস্থান, মধ্যপ্ৰদেশ আৰু ছত্তিছগড়ত কংগ্ৰেছৰ শোচনীয় পৰাজয়তো ৰাহুল গান্ধীৰ জন্মছকৰেই প্রভাৱ বুলি জ্যোতিষীয়ে তথ্য দাঙি ধৰিছে।
লোকসভা নিৰ্বাচন ২০২৪ত কাৰ চৰকাৰ?
বৰ্তমান ৰাহুলৰ জন্মছকৰ পঞ্চম ঘৰত বহি ৰাহুৰ মহাদশাত চলিছে ভাৰ্গোত্তম বৃহস্পতিৰ অন্তৰ্দশা। জ্যোতিষ গণনাই দাবী কৰামতে ২০২৪ৰ লোকসভা নিৰ্বাচনত প্ৰচুৰ পৰিমানে পৰিশ্ৰম কৰিব ৰাহুল গান্ধীয়ে। তাৰ সুবাদতেই তেওঁ বিগত লোকসভা নিৰ্বাচনকৈ বেছি ভোট লাভ কৰিব। কিন্তু জ্যোতিষ গণনাই কৈছে যে এইবাৰো শেষৰক্ষা নহ’ব ৰাহুলৰ। বিগত লোকসভা নিৰ্বাচনৰ পৰা কিছু বেছিকৈ ভোট পালেও শেষ পৰ্যন্ত কংগ্ৰেছে বিশেষ কিছু কাৰণত উঠিব নোৱাৰিব। বিশেষকৈ সাংগঠনিক দুৰ্বলতাৰ কাৰণেই তেওঁলোকৰ দল পিছুৱাই যাব। অৱশ্যে দল হিচাপে কংগ্ৰেছে আগন্তুক লোকসভা নিৰ্বাচনত বিগত বাৰৰ তুলনাত ভাল ফলাফল দেখুৱাব। ৰাহুল গান্ধীৰ ভাগ্যত আগন্তুক বছৰত উল্লেখযোগ্য কোনো পৰিবৰ্তন নাই বুলিও জনাইছে জ্যোতিষীসকলে। আগন্তুক লোকসভা নিৰ্বাচনত জয় লাভ কৰাত কঠিন চেলেঞ্জৰ মুখামুখি হ’ব ৰাহুলৰ দল।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
