অসম লাইভ২৪ঃ ২০১৪ চনত লোকসভা নিৰ্বাচৰ পূৰ্বে সাধাৰণ জনতাৰ সৈতে মিলা মিচা কৰিবলৈকে ‘চায়ে পে চৰ্চা’ৰ দৰে কৰ্মসূচী হাতত লৈছে বিজেপিয়ে। এইবাৰ জনসংযোগৰ বাবে বিজেপিৰ চায়ে পে চৰ্চাৰ শুভাৰম্ভ কৰি দিলে বিৰোধী নেতা ৰাহুল গান্ধীয়েই। ৰাহুল গান্ধীয়ে হাতত চাহ লৈ মিলিত হৈছে সাধাৰণ জনতাৰ সৈতে। উত্তৰাখণ্ড ভ্ৰমণত থকা ৰাহুল গান্ধীয়ে কালিৰ দিনটোত কেদাৰনাথ ধামত উপস্থিত হৈছে। সোমবাৰে পুৱাই দৰ্শনাৰ্থীৰ সৈতে একেলগে দেখা গৈছে ৰাহুল গান্ধীক। অৱশ্যে ৰাহুলৰ এই ৰূপক শাসক দল বিজেপিয়ে সহজভাৱে ল’ব পৰা নাই। বিজেপিয়ে ৰাহুলৰ এই ছবি দেখা মাত্ৰকেই কটাক্ষমূলক মন্তব্য কৰিছে। হেলিকপ্টাৰত সোমবাৰে কেদাৰানাথত উপস্থিত হৈছে ৰাহুল। তেওঁত স্বাগত জনাইছে মন্দিৰৰ পুৰোহিতসকলে। ৰাহুলক এই যাত্ৰাত সংগ দিছে উত্তৰাখণ্ডৰ কংগ্ৰেছ কৰ্মীসকলে।
এই যাত্ৰাত ৰাহুলে পৰিধান কৰিছে নীলা ৰঙৰ টুপি, আৰু এটা জেকেট। এই যাত্ৰাকালত ৰাহুলে চাহৰ এখন দোকানত ৰৈ অন্য দৰ্শনাৰ্থীসকলক চাহ বিলাই আছিল। তেওঁ নিজ হাতে সকলোকে চাহ বিলাইছে ৰাহুল গান্ধীয়ে। তেওঁ নিজ হাতেৰে সকলোকে চাহৰ কাপ হাতত তুলি দিছে। তেওঁ নিজ হাতেৰে সকলোকে চাহৰ কাপ আগুৱাই দিয়া দেখি সেই বিশেষ দোকানৰ সন্মুখত ভিৰ কৰিছে সাধাৰণ জনতাই।
কংগ্ৰেছৰ সূত্ৰই জনোৱা অনুসৰি ৰাহুলৰ এই উত্তৰাখণ্ড ভ্ৰমণ ভাৰত জোড়ো যাত্ৰা কৰ্মসূচীৰ বৰ্ধিত অংশ। ইয়াৰ পূৰ্বে অমৃতসৰৰ স্বৰ্ণমন্দিৰলৈ গৈছিল ৰাহুল। তাতেই তেওঁ সেৱা কৰা কামতো নিজকে যুক্ত কৰাইছিল। সোমবাৰে পুৱাই ৰাহুলে নিজৰ ফেচবুক একাউণ্টত কেদাৰনাথ যাত্ৰাৰ কেইবাখনো ছবি পোষ্ট কৰিছে। ৰাহুলে এই ছবি পোষ্ট কৰি কেপশ্ব্যনত লিখিছে, ‘কেদাৰনাথ যাত্ৰাৰ সময়ত দৰ্শনাৰ্থীক চাহ দিলো।’ ৰাহুলে লগতে লিখিছে, ‘আজি আমি উত্তৰাখণ্ডৰ কেদাৰনাথ ধামলৈ গৈছিলো। তাতেই পূজা কৰিলো। হৰ হৰ মহাদেৱ।’
৫ ৰাজ্যৰ ভোটগ্ৰহণৰ পূৰ্বে ৰাহুলে কেদাৰনাথ ধামত উপস্থিত হোৱাক লৈ ৰাজনৈতিক বিতৰ্ক বৃদ্ধি কৰিছে। উত্তৰাখণ্ডৰ বিজেপি মিডিয়া ইন-চাৰ্জ মনবীৰ সিঙ চৌহানে ৰাহুলক আক্ৰমণ কৰি কৈছে, ‘আমি আশা কৰিম যে কেদাৰনাথে ৰাহুলজিক সদ বুদ্ধি দিয়ক আৰু দেশৰ স্বাৰ্থত তেওঁৰ দলৰ নেতাই দুৰ্নীতি বিৰোধী নীতি গ্ৰহণ কৰিব।’ ইয়াৰোপৰি বিজেপিৰ অভিযোগ যে, ‘ভোটৰ স্বাৰ্থতেই ৰাহুলে কেদাৰনাথ দৰ্শন কৰিছে। বিজেপিক ওলোটাই আক্ৰমণ কৰি কংগ্ৰেছৰ তৰফৰ পৰা কোৱা হৈছে, ‘প্ৰকৃত সদবুদ্ধি বিজেপিৰেই প্ৰয়োজন। বিজেপিয়ে ভাৱিছে, তেওঁলোকৰ দৰে আমিও দুৰ্নীতিপৰায়ণ। প্ৰকৃততে দুৰ্নীতিগ্ৰস্থ ব্যক্তিসকলেহে এতিয়া বিজেপিত আশ্ৰয় লৈছে।’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
