অসম লাইভ২৪ঃ নতুন সংসদ ভৱনত প্রথমবাৰ বক্তব্য ৰাখিলে ৰাহুল গান্ধীয়ে। পোনতে ৰাহুল গান্ধীৰ ভাষণক প্ৰশংসা কৰিবলৈ বাধ্য হৈ পৰিল শাসক দলেও। ৰাহুলে কয়, ‘মই মহিলা সংৰক্ষণ বিলক সমৰ্থন কৰিছো৷ ভয় নকৰিব মই আজি আদানীৰ কথা নকও৷ এই বিল্ডিঙৰ প্ৰশংসা কৰিবই লাগিব৷ সুন্দৰকৈ ইয়াৰ ডিজাইন কৰা হৈছে৷ মোৰ দুখ লাগিছে এটা কথাতেই৷ য’ত বহি আমি মহিলা সংৰক্ষণৰ কথা কৈ আছো এই সংসদ ভৱন উদ্বোধন কৰোতে কিন্তু দেশৰ প্ৰথম মহিলাক মতা নহ’ল। দেশৰ ৰাষ্ট্ৰপতিক এই সংসদ ভৱন উদ্বোধনীত ভাগ ল’বলৈ দিয়া নহ’ল৷
ৰাহুলে লগতে কয়, ‘ব্ৰিটিছে ভাৰতীয়ৰ হাতত ক্ষমতা হস্তান্তৰ কৰোতেও সুধিছিল৷ কাৰ হাতত আমি ক্ষমতা এৰি দিম? স্বাধীনতা আন্দোলনকাৰীয়ে তেতিয়া কৈছিল, ভাৰতৰ নাগৰিকৰ হাতত দিয়ক৷ জন্মলগ্নৰে পৰা আমাৰ দেশত পুৰুষে মহিলাক সমৰ্থন জনোৱা পৰম্পৰা আছে। নিৰ্বাচনত সংৰক্ষণ কৰাটো ক্ষমতা হস্তান্তৰৰ এটা পদ্ধতিহে। মহিলাৰ হাতত প্ৰথম ক্ষমতা দিয়া পদ্ধতি আৰম্ভ হৈছিল পঞ্চায়তীৰাজ ৱ্যৱস্থাৰ মাধ্যমেৰে। তেতিয়াই মহিলাক ৰাজনীতিত ভৰি দিবলৈ সুযোগ দিয়া হৈছিল। সেই পদক্ষেপ আছিল বৃহৎ এক পদক্ষেপ। মহিলা পুৰুষতকৈ আগত চলে সেই কথা তেতিয়াই প্ৰতীয়মান হৈছিল। বিৰোধী শাসক সকলোৱে এই কথা জানে।’
এই বিলক সমৰ্থন জনাইয়ো ৰাহুলে উত্থাপন কৰে কেইটামান প্ৰশ্ন, ‘অবিচি সংৰক্ষণৰ কথা এই বিলত কিয় দিয়া নহ’ল? আধৰুৱা বিল এখনে দেশৰ জনগণক কেনেকৈ আগুৱাই নিব? ভাষণৰ শেষত ৰাহুলে কয়, ‘জাতিগত লোকপিয়ল কিয় হোৱা নাই দেশত? দেশত অবিচি গোষ্ঠীৰ সংখ্যা কিমান? দেশত দলিত, আদিবাসীৰ সংখ্যা কিমান?’
মোদী চৰকাৰলৈ ৰাহুল গান্ধীৰ অনুৰোধ, ‘এই বিল পাছ কৰক। মহিলাৰ বাবে ৩৩ শতাংশ আসন সংৰক্ষণো কৰক। কেৱল অবিচিক বিশেষকৈ এই বিলত সামৰি লওক। যদি মোদী চৰকাৰে এই কাম নকৰে তেন্তে কংগ্ৰেছে এই কাম কৰি পেলাব।’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
