অসম লাইভ২৪ঃ শনিবাৰে নিশা ৰাখী ছাৱন্তৰ মাতৃৰ বিয়োগৰ পাছতেই বলীউডৰ প্ৰায়সংখ্যক চেলিব্ৰিটিয়েই খবৰ লৈছে ৰাখী ছাৱন্তৰ৷ মাতৃৰ শেষকৃত্যৰ পূৰ্বেই ৰাখীক এবাৰ দেখা কৰিবৰ বাবেই ৰাখীৰ বাসভৱনত উপস্থিত হৈছে ফাৰাহ খান, ৰশ্মি দেশাইকে ধৰি বহুকেইজন চেলিব্ৰিটি৷ সকলো উপস্থিত নহ’লেও ফোনযোগে খবৰ লোৱাৰ কথা প্ৰকাশ কৰিছে ৰাখীয়ে৷ তাৰমাজতেই ৰাখীয়ে শ্বাহৰুখ খানক জনাইছে বিশেষ ধন্যবাদ৷
মাতৃৰ বিয়োগৰ পাছতেই ভাঙি পৰা ৰাখীক সকলোৱে সান্তনা দিছে৷ শ্বাহৰুখেও পাঠানৰ ব্যস্ততাৰ মাজতেই খবৰ লৈছে ৰাখীৰ৷ সংবাদমাধ্যমৰ যোগেদি ৰাখীয়ে সকলোকে ধন্যবাদ জ্ঞাপনো কৰিছে৷ তাৰমাজতেই ৰাখীয়ে সকলোৰে নাম উল্লেখ কৰিব নোৱাৰাৰ বাবে ক্ষমাও বিচাৰিছে৷ ৰাখীয়ে ধন্যবাদ জনাবলৈ গৈ কয়, ‘মই কেনেকৈ ধন্যবাদ জনাও৷ মোৰ এই দুখৰ সময়ত সকলোৱে মোৰ খবৰ লৈছে৷ ছলমান ভাই, ফাৰাহ খানকে ধৰি সকলোৱেই খবৰ ৰাখিছে৷ তেওঁলোকক ধন্যবাদ৷ ইয়াৰোপৰি শ্বাহৰুখ জীক মই কেনেকৈ ধন্যবাদ দিওঁ? তেওঁ ইমান ব্যস্ত তাৰ মাজতো মোৰ খবৰ লৈছে৷’
উল্লেখ্য যে খ্ৰীষ্টিয়ান ৰীতি-নীতিৰে সম্পন্ন হৈছে ৰাখীৰ মাতৃৰ অন্তেষ্টিক্ৰিয়া৷ কান্দোনত ভাঙি পৰিলেও সকলো যাৱতীয় কাম-কাজত নজৰ দিছে ৰাখীয়ে৷ শেষকৃত্য অনুষ্ঠানত ৰাখীৰ কাষে কাষে দেখা গৈছে তেওঁৰ স্বামী আদিল ডুৰানীকো৷ সদায়ে হাঁহি থকা ৰাখীয়ে ফুল চটিয়াই কান্দি কান্দি মাতৃক বিদায় দিয়াৰ দৃশ্যই সেমেকাই তুলিছে বহুতৰেই দুচকু৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ