বলীউডৰ বহু ঘটনাই আজিও সকলোকে আচৰিত কৰে। কিছুমান কথা বিশ্বাস কৰিবলৈ টান যদিও সেয়াই সত্য হয়। সকলোৱে জানে বলীউডক অভিনেত্ৰী ৰেখাৰ জীৱন বিতৰ্কৰে ভৰা। প্ৰেমৰ পৰা আৰম্ভ কৰি বিয়ালৈকে তেওঁক লৈ বহু উৰাবাতৰি ওলাইছিল। কিন্তু আটাইতকৈ বিতৰ্কিত কথাটো হৈছে বিশ্বজিতৰ লগত অভিনেত্ৰীগৰাকীৰ চুম্বন। এতিয়া বিশ্বজিতৰ জীয়ৰীয়ে ক’লে এই কথা।
‘অঞ্জনা ছাফৰ’ ছবিখনত বিশ্বজিত আৰু ৰেখাৰ মাজত বিতৰ্কিত চুম্বনৰ দৃশ্যটো এতিয়াও উদ্যোগটোত চৰ্চা চলি আছে। সেই সময়ত বলীউডৰ ছবিত চুম্বনৰ দৃশ্যটো প্ৰায় নাছিল। ফলত এই দৃশ্যটোক লৈ যথেষ্ট হুলস্থুলীয়া পৰিৱেশৰ সৃষ্টি হৈছিল। যিহেতু ৰেখাক আগতীয়াকৈ কোৱা নাছিল, সেয়ে তেওঁ অপ্ৰস্তুত আছিল। এই বিষয়ে বহুদিন ধৰি চৰ্চা চলি আহিছে।
ৰেখা-বিশ্বজিতৰ চুম্বন দৃশ্যক লৈ কি বিতৰ্ক? ‘ৰেখা: দ্য অনটল্ড ষ্ট’ৰী’ নামৰ কিতাপখনত উল্লেখ আছে যে “পৰিচালকে ‘একচন’ কোৱাৰ লগে লগে বিশ্বজিতে ৰেখাৰ বাহুত ধৰি চুমা খাবলৈ আহে। ৰেখাই আগতীয়াকৈ খবৰ নোপোৱাৰ বাবে থতমত খায়। পৰিচালকে ‘কাট’ বুলি নক’লে, আৰু বিশ্বজিতে অভিনেত্ৰীগৰাকীক এৰি নিদিলে।” কোৱা হয় যে এই চুম্বনটো প্ৰায় পাঁচ মিনিট সময় ধৰি চলিছিল। এই সময়ছোৱাত ছবিৰ দলটোৱে হাত চাপৰি বজাইছিল আৰু হুইচেল মাৰিছিল, যিটোৱে ৰেখাক ইমানেই আঘাত দিছিল যে তেওঁ কান্দি উঠিছিল।
অভিনেতাগৰাকীৰ কন্যা পল্লৱ চেটাৰ্জীয়ে এই ঘটনা সন্দৰ্ভত মুকলিকৈ কৈছে। তেওঁ স্পষ্টকৈ কৈছে যে সেই সময়ত যি হৈছিল সেয়া সম্পূৰ্ণ ভুল আছিল। পল্লৱীৰ মতে ১৫ বছৰীয়া কিশোৰীক এনে কাম কৰাটো অত্যন্ত বিৰক্তিকৰ আৰু তেওঁৰ সন্মতি অবিহনে হ’ব নালাগিছিল।
এক সাক্ষাৎকাৰত পল্লৱীয়ে সেই সময়ৰ পৰিচালকসকলৰ কৰ্মশৈলীৰ বিষয়ে বিশদভাৱে কয়। তেওঁ কয় যে পৰিচালকে প্ৰায়ে অভিনেতাসকলৰ পৰা সবিশেষ লুকুৱাই ৰাখিছিল যাতে তেওঁলোকৰ প্ৰকৃত প্ৰতিক্ৰিয়া কেমেৰাত বন্দী কৰিব পৰা যায়।
পল্লৱীয়ে কয়, “তেতিয়া কিছুমান পৰিচালকে দৃশ্যটোৰ বিষয়ে চমুকৈ এজন অভিনেতাক ক’লেও আনজন অভিনেতাৰ পৰা সবিশেষ আঁতৰাই ৰাখিছিল, কাৰণ তেওঁলোকে কেমেৰাত এটা নিৰ্দিষ্ট প্ৰতিক্ৰিয়া বিচাৰিছিল। মোৰ বিশ্বাস যে যদি কোনো কাণ্ড সংঘটিত হৈছিল, য’ত কোনোবাই সমগ্ৰ ইউনিটৰ সন্মুখত কেইবা মিনিটমান আন এজনক চুমা খাইছিল, তেন্তে পৰিচালকৰ সন্মতি বা অনুমোদন অবিহনে সেয়া হ’ব নোৱাৰিলেহেঁতেন। ইয়াৰ উপৰিও পৰিচালকে নিজেই কৈছিল, ‘মই এই শ্বটটো বিচাৰো’।” কিন্তু সেই সময়ত ছবিত চুম্বনৰ দৃশ্য বৰ বেছি সাধাৰণ নাছিল।”
তেওঁ জোৰ দি কয় যে সেই সময়ত ৰেখা অতি সৰু আছিল, যাৰ বাবে তিক্ত অভিজ্ঞতাটো আৰু বেছি কষ্টদায়ক হৈ পৰিছিল। তেওঁ কয়, “সেই সময়ত তেওঁ শিশুৰ দৰে আছিল। আপোনাক নোকোৱাকৈয়ে যদি আপোনাৰ লগত এনেকুৱা কিবা এটা ঘটে তেন্তে আপুনি কি কৰিব পাৰে?”
পল্লৱীয়ে আন এক চাঞ্চল্যকৰ তথ্য প্ৰকাশ কৰিলে যে দুয়োটা পৰিয়ালৰ মাজত আছিল অতি ঘনিষ্ঠ সম্পৰ্ক। তেওঁৰ মতে এই কথাই চাগে ৰেখাক আৰু অধিক স্তম্ভিত কৰি তুলিছিল। পল্লৱীয়ে স্মৰণ কৰি কয়, “ৰেখা আমাৰ ঘৰলৈ আহিছিল আৰু আমি সৰুতে একেলগে খেলিছিলো। আমাৰ পৰিয়ালবোৰ বৰ ঘনিষ্ঠ আছিল। হয়তো পৰিয়ালৰ বন্ধনৰ বাবে তেওঁৰ বাবে ই অধিক কষ্টদায়ক আছিল। যেতিয়া আপুনি কাৰোবাক আপোনাৰ পৰিয়ালৰ অংশ বুলি গণ্য কৰে আৰু তাৰ পিছত সেই ব্যক্তিজনে এনেকুৱা কিবা এটা কৰে, তেতিয়া সঁচাকৈয়ে হৃদয় বিদাৰক হয়।”
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
