৩৭ বছৰীয়া পুৰণি দেশ কঁপাই যোৱা ৰূপ কোঁৱৰ ঘটনাৰ ৰায়দান, সকলো অভিযুক্তক দোষমুক্ত
আজিৰ পৰা ৩৭ বছৰ পূৰ্বে ৰাজস্থানৰ ছিকাৰ জিলাৰ ডিৱৰালাত সংঘটিত হৈছিল এক দেশ কঁপাই যোৱা ঘটনা। যি ঘটনাত এগৰাকী ১৮ বছৰীয়া নৱবিবাহিতাই সতীদাহ গৈছিল। সেই ঘটনাৰেই আজি ৰায়দান দিয়ে। জয়পুৰৰ সতী প্ৰতিৰোধৰ বিশেষ আদালতে দ্বিতীয়টো ৰায়দান কৰাৰ সময়তে মহিলা মণ্ডলৰ সতী প্ৰথাৰ ৮জন অভিযুক্ত আটাইকেইজনকে দোষমুক্ত কৰে।
জয়পুৰ নিবাসী ৰূপ কোঁৱৰৰ বিবাহ হৈছিল মাল সিং শ্বেখাৱতৰ সৈতে। পাছে বিবাহৰ মাথো ৪ মাহৰ পাছতে মৃত্যু হয় মাল সিঙৰ। তেতিয়া ৰূপ কোঁৱৰৰ বয়স আছিল মাত্ৰ ১৮ বছৰ। মাল সিঙৰ মৃত্যুৰ ঠিক পিছদিনাই ৰূপ কোঁৱৰে স্বামীৰ চিতাত বহি সতী কৰিবলৈ বাধ্য হোৱা বুলি অভিযোগ উত্থাপন হৈছিল।
১৯৮৭ চনৰ ৪ ছেপ্টেম্বৰত সংঘটিত হোৱা এই ঘটনাই সমগ্ৰ দেশতে উত্তাল কৰি তুলিছিল। গোচৰটোৰ তদন্তত দেখা গৈছিল যে ৰূপ কোঁৱৰে ইচ্ছাকৃতভাৱে সতী যোৱা নাছিল। আনহাতে পৰিয়ালৰ লোকে কৈছিল যে ৰূপে নিজেই সতী হোৱাৰ ইচ্ছা প্ৰকাশ কৰিছিল। এই গোচৰৰ মূল অভিযুক্ত আছিল ৰূপৰ শহুৰেক সুমেৰ সিং।
তথ্য অনুসৰি মাল সিঙৰ মৃত্যুৰ সময়ত ৰূপ আছিল তেওঁৰ মাতৃগৃহত। মাল সিঙৰ পূৰ্বৰে পৰা কোনো বেমাৰ হৈ আছিল, খবৰ পাই পত্নী ৰূপ স্বামীৰ কাষলৈ আহিছিল। পাছে ২ দিনৰ পাছতে প্ৰাণ হেৰুৱাইছিল মাল সিঙে।
স্বামীৰ মৃত্যুৰ পাছতে উৰাবাতৰি বিয়পি পৰে যে ৰূপ সতী যাব বিচাৰিছে। পৰিয়ালৰ অন্য লোক তথা গাঁৱৰ ৰাইজে এই কথাত বাধা দিয়াৰ সলনি নথৈ আনন্দিত হে হৈছিল। অৱশেষত হাতত এটা নাৰিকল তুলি দি কইনাৰ দৰে সজাই জোৰকৈ স্বামী মাল সিঙৰ চিতাত বহিবলৈ দিয়া হৈছিল। স্বামীৰ মৃতদেহৰ লগতে জীৱন্তে জ্বলি গৈছিল ৰূপ কোঁৱৰো।
সেই ঘটনাৰেই ৮ অভিযুক্তক আজি দোষমুক্ত ঘোষণা কৰে। ইয়াৰ পূৰ্বে ২০০৪ চনৰ ৩১ জানুৱাৰীত আদালতে ১১জন অভিযুক্তক দোষমুক্ত কৰিছিল। কোনো এজন অভিযুক্তৰ বিৰুদ্ধে কোনো সঠিক প্ৰমাণ নথকাৰ বাবেই এইদৰে ৰেহাই পাই সকলো অভিযুক্তই।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
