ভাৰতত নিৰাপদ বিনিয়োগ বুলিলে আজিও সাধাৰণ মানুহৰ প্ৰথম পছন্দ ফিক্সড ডিপোজিট বা এফ ডি৷ ধন হেৰুওৱাৰ ভয় নাই, ৰিটাৰ্ণত সুদো নিশ্চিত৷ এই দুই কাৰণতেই সৰু ডাঙৰ বহু বিনিয়োগকাৰীয়ে এফ ডিক বিশ্বাস কৰে৷ বহুতৰে ধাৰণা বৃহৎ অংক নহলে এফ ডিত লাভ নাই৷ কিন্তু বাস্তৱত মাত্ৰ ৫ লাখ টকাৰ এফডিৰ পৰাও নিয়মিত মাহিলী আয় সম্ভৱ৷
বেংক বা পোষ্ট অফিচত ৫ লাখ টকা জমা ৰাখি যদি কোনোৱে স্থায়ী মাহিলী আয়ৰ পৰিকল্পনা কৰে তেন্তে নন-কিউমুলেটিভ এফ ডিক বাচি লব পাৰে৷ এই ধৰণৰ এফ ডিত মাহিলী, ত্ৰিমাহিলী বা বাৰ্ষিক ভিত্তিত সুদ দিয়া হয়৷ অৱসৰপ্ৰাপ্ত ব্যক্তি বা যিসকলে দৈনন্দিন খৰচ চলাবলৈ সুদৰ ওপৰত নিৰ্ভৰ কৰে তেওঁলোকৰ বাবে এই বিকল্প সুবিধাজনক৷
ধৰা হ’ল কোনোৱে ৫ বছৰৰ বাবে ৭শতাংশ বাৰ্ষিক সুদত ৫লাখ টকাৰ নন-কিউমুলেটিভ এফ ডি কৰে তেন্তে বছৰত সুদ পাব প্ৰায় ৩৫ হাজাৰ টকা৷ অৰ্থাৎ মাহিলী গড়ে প্ৰায় ২৯০০ টকা আয় কৰিব পাৰে৷ সুদৰ হাৰ বেংকভেদে পৃথক পৃথক হব পাৰে৷ সেয়ে চূড়ান্ত অংক সামান্য কমবেছি হব পাৰে৷
এফ ডিত ধন ৰখাৰ সময়ত সুদৰ ওপৰিও ৰেপো ৰেটৰ দিশত নজৰ ৰখা জৰুৰী৷ ৰেপো ৰেট বাঢ়িলে সাধাৰণতে বেংকৰ এফ ডিৰ সুদৰ হাৰো বাঢ়ে৷ ফলত সঠিক সময়ত এফ ডি কৰিলে তুলনামূলক ভাল ৰিটাৰ্ণ পোৱা সম্ভৱ৷ সাধাৰণ বিনিয়োগকাৰীৰ ক্ষেত্ৰত বছৰত যদি সুদ ৪০ হাজাৰতকৈ বেছি হয় তেন্তে ১০ শতাংশ টিডিএছ কটা হয়৷ ছিনিয়ৰ চিটিজেনৰ ক্ষেত্ৰত এই সীমা ৫০ হাজাৰ টকা৷ পেন কাৰ্ড নাথাকিলে টিডিএছ কটা হয় ২০ শতাংশ হাৰত৷
অৰ্থনৈতিক বিশেষজ্ঞৰ মতে, এফ ডি চিনাক্ত কৰাৰ পূৰ্বে মাহিলী আয়ৰ প্ৰয়োজন, কৰৰ সীমা আৰু ভৱিষ্যত আৰ্থিক পৰিকল্পনা ভালধৰণে বিচাৰ কৰা উচিত৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
