স্কুল বাছত হঠাতে লাগিল জুই, জপিয়াই কোনোমতে প্ৰাণ ৰক্ষা ছাত্ৰ-ছাত্ৰীৰ
হঠাতে ৰাজপথৰ ওপৰত এখন বিদ্যালয়ৰ বাছত জুই লাগি যায়। ছাত্ৰ-ছাত্ৰীৰে ভৰা বাছখনত তেনেদৰে জুই লাগি যোৱাত হাহাকাৰময় পৰিস্থিতিৰ সৃষ্টি হয়। ছাত্ৰ-ছাত্ৰীৰ মাজত হুৱাদুৱা লাগি যায়।
বাছৰ চালকে লগে লগে কোনোমতে বাছ ৰাজপথৰ পৰা কাষলৈ নি ৰখাই দিয়ে। ততাতৈয়াকৈ যিয়ে যেনেকৈ পাৰে ছাত্ৰ-ছাত্ৰীসকলক বাছখনৰ পৰা উদ্ধাৰ কৰে।
এই ঘটনা পাটনাৰ। আজি বিয়লি বেলা এই ঘটনা সংঘটিত হয়। একমাত্ৰ চালকৰ বুদ্ধি বিবেচনাৰ বাবেই প্ৰাণ ৰক্ষা পাই সকলো কন কন ছাত্ৰ-ছাত্ৰীৰ।
ঘটনা সন্দৰ্ভত জানিব পৰা অনুসৰি বিদ্যালয়ৰ পৰা ছুটিৰ পাছত ঘৰলৈ বুলি ওলোৱাৰ পাছতে হঠাতে বাছ খনত ৰাজপথৰ ওপৰতে জুই লাগিবলৈ ধৰে। সেই জুই বাছখনত আৰু অধিক আগুৰি ধৰাৰ পূৰ্বেই লগে লগে চালকে পথৰ কাষলৈ বাছখন নি ৰখাই দিয়ে।
বাছখন ৰখাইয়ে চালকে নিজে জপিয়াই নমাৰ লগতে ছাত্ৰ-ছাত্ৰী সকলকো যেনেকৈ পাৰে নমাবলৈ ধৰে, সেই দেখি স্থানীয় লোক সকলো আগবাঢ়ি আহি খিৰিকিৰে ছাত্ৰ-ছাত্ৰী সকলক কোনোমতে নমাই সকলোৰে প্ৰাণ ৰক্ষা কৰে।
আনহাতে অগ্নিনিৰ্বাপক বাহিনীকো ঘটনা সন্দৰ্ভত খবৰ কৰা হয়, লগতে আৰক্ষীকো খবৰ কৰা হয়। অগ্নিনিৰ্বাপক বাহিনীয়ে আহি জুই নুমুৱাই যদিও তেতিয়ালৈ বাছখনৰ আধাৰো অধিক জ্বলি যায়।
বৰ্তমানলৈ বাছখনত কিয় সেই জুই লাগি যায় , সেই সন্দৰ্ভত জানিব পৰা হোৱা নাই। যদিও সন্দেহ কৰা অনুসৰি বাছখনৰ বেটাৰীৰ শ্বৰ্ট-চাৰ্কিটৰ ফলতে তেনেদৰে জুই লাগি যায়।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
