অসম লাইভ ২৪ঃ মানুহৰ মলৰ পৰাও বিদ্যুত শক্তি উৎপাদন কৰিব পাৰি? মল বুলিলেই নাক ঢাকো তেনেক্ষেত্ৰত মলক লৈ কি গৱেষণা কৰিছে বিজ্ঞানীয়ে? বহুসংখ্যকেই এই গৱেষণাক লৈ আচৰিত হৈছে। গৱেষণাগাৰত মানুহৰ মল আনি পৰীক্ষা কৰাটোও সম্ভৱনে?
মানুহৰ মল সাৰ হিচাপে ব্যৱহাৰ হয় সেই বিষয়ে আমি সকলোৱেই জ্ঞাত। কিন্তু এই বৰ্জিত পদাৰ্থ শক্তিৰ উৎস হিচাপে কেনেকৈ ব্যৱহাৰ হ’ব পাৰে? কিন্তু এই কথা সত্য প্ৰতিপন্ন কৰি দেখুওৱালে বিজ্ঞানীমহলে। কেৱল মানুহৰ মলেই নহয় কুকুৰা আৰু টাৰ্কী চৰাইৰ মলৰ পৰাও বিদ্যুত উৎপন্ন হ’ব পাৰে সেই কথা গৱেষণাত সত্য প্ৰমাণিত হৈছে। এই গৱেষণা চলাইছে বেন গুৰিয়ন ইউনিভাৰ্চিটিত এটা গৱেষক দলে। বিস্তাৰিতভাৱে এই পৰীক্ষা চলাবৰ বাবে গৱেষণাগাৰৰ লগত এটা শৌচাগাৰো সাজিছে বিজ্ঞানীৰ দলটোৱে।
বিজ্ঞানীৰ দলটোৱে প্ৰথম গৱেষণা আৰম্ভ কৰিছিল কুকুৰাৰ মলেৰে। কুকুৰাৰ মলত প্ৰচুৰ পৰিমানে কাৰ্বন আৰু নাইট্ৰজেন থাকে যি শক্তি উৎপাদনৰ বাবে অত্যন্ত জৰুৰী। কুকুৰাৰ মল পৰীক্ষাৰ পিছত বিজ্ঞানীকেইজনে মানুহৰ মলো গৱেষণাৰ বিষয় কৰি লয়। অটোক্লেভৰ জৰিয়তে মলখিনি শুকুৱাই তাত থকা জীৱাণুসমূহ মাৰি শুকান মলখিনি গুৰি কৰি লোৱা হয়। পাউডাৰত পৰিণত কৰি লোৱা মলখিনি পুনৰ পানীত ঘুটি লৈ ১৮০-২৪০ ডিগ্ৰী চেলছিয়াছলৈ তাপমাত্ৰা দিয়া হয়। বিজ্ঞানৰ ভাষাত ইয়াক HTC বা হাইড্ৰথাৰ্মেল কাৰ্বনজেশ্ব্যন বুলি কোৱা হয়। পানী থাকিলেও অক্সিজেনৰ অনুপস্থিতিতহে এই পৰীক্ষা কৰে বিজ্ঞানীৰ দলটোৱে। এই পৰীক্ষাত পানী আৰু পুৰি যোৱা জৈৱ অনু মিলি এটা বাদামী ৰঙৰ পদাৰ্থ উৎপন্ন হয় যাক বিজ্ঞানীসকলে নামকৰণ কৰিছে হাইড্ৰোচাৰ।
উল্লেখ্য যে এই হাইড্ৰোচাৰক কয়লাৰ দৰে ব্যৱহাৰ কৰিব পাৰি। কয়লা জ্বলাই যেনেকৈ শক্তি উৎপাদন কৰিব পাৰি তেনেকৈ হাইড্ৰোচাৰ জ্বলাই শক্তি উৎপাদন কৰিব পাৰি। কয়লা জ্বলাই বিদ্যুৎ প্ৰকল্প চলোৱাৰ দৰেকৈ হাইড্ৰোচাৰৰ জৰিয়তেও বিদ্যুত প্ৰকল্প চলাব পাৰি। বিজ্ঞানীয়ে গৱেষণাৰ অন্তত প্ৰকাশ কৰিছে যে হাইড্ৰোচাৰেৰে পৃথিৱীত বিদ্যুত উৎপাদনৰ বাবে ব্যৱহৃত কয়লাৰ পৰিমান ১০ শতাংশ হ’লেও কমাব পাৰি। পৃথিৱীৰ পৰা কমি অহা এইসমূহ অনৱীকৰণযুক্ত সামগ্ৰীৰ ব্যৱহাৰ কমোৱাত এইসমূহেই এদিন বিকল্প হৈ উঠিব বুলি প্ৰকাশ কৰিছে বিজ্ঞানীমহলে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
