এজন ১৯ বছৰীয়া যুৱকে ছ’চিয়েল মিডিয়া প্লেটফৰ্ম ইনষ্টাগ্ৰামত জাকজমক লাইফষ্টাইল, বিলাসী বাহনৰ ভিডিঅ দি এতিয়া বিপদত পৰিছে। যুৱকজনৰ ইনষ্টাগ্ৰামৰ এই ৰীলবোৰ দেখি সকলোৱে তেওঁক আৰ্থিকভাৱে প্ৰতিপত্তিশালী ঘৰৰ সন্তান বুলি ভাবিছিল। সকলোৱে ভবাৰ দৰে কেইজনমান দুষ্টবুদ্ধিৰ লোকেও যুৱকজনক ধনী ঘৰৰ ল’ৰা বুলি ভাবি কৰিলে অপহৰণ আৰু দাবী কৰিলে ১০ লাখ টকাৰ মুক্তিপণ। ছ’চিয়েল মিডিয়াত দামী মোবাইল, বিলাসী জীৱন-শৈলী দেখুৱাই ভাইৰেল হোৱাৰ নিচাও যে কেতিয়াবা কিমান ভয়ংকৰ হ’ব পাৰে, তাৰেই উদাহৰণ এই ঘটনা। এই ঘটনা সংঘটিত হৈছে মধ্যপ্ৰদেশৰ পন্না জিলাৰ পৱৈ অঞ্চলত।
ঘটনাৰ সবিশেষ…
মাত্ৰ ১৯ বছৰীয়া অংশুল নামৰ এজন যুৱকৰ ইনষ্টাগ্ৰাম ৰীল চাই তিনি দুৰ্বৃত্তই তেওঁক কোনো কোটিপতি লোকৰ সন্তান বুলি ধাৰণা কৰি লয়। ইয়াৰ পিছতেই ৩ দুৰ্বৃত্তই অংশুলক অপহৰণ কৰাৰ ষড়যন্ত্ৰ ৰচনা কৰে। ভবা মতেই কাম, ২৭ জুনত একেবাৰে চিনেমাৰ কাহিনীৰ দৰে এই দুৰ্বৃত্তকেইটাই অংশুলক অপহৰণ কৰি পৰিয়ালৰ ওচৰত ১০ লাখ টকাৰ মুক্তিপণ দাবী কৰে। অংশুল পৱৈৰ এজন স্থানীয় কাপোৰ ব্যৱসায়ীৰ পুত্ৰ। ছ’চিয়েল মিডিয়াত দামী গেজেট, ষ্টাইলিছ জীৱনশৈলী আৰু আকৰ্ষণীয় ৰীল পোষ্ট কৰাটো তেওঁৰ অভ্যাস আছিল। এই ৰীলসমূহ দেখি অংশুলক অপহৰণ কৰা ৩ অভিযুক্ত মধ্যপ্ৰদেশৰ পান্না জিলাৰ ৰাজকমল ৰজক, ৰাজকুমাৰ পাল আৰু শিৱেন্দ্ৰ সিং।
আৰক্ষীৰ অভিযান
অপহৰণৰ পিছতে অভিযুক্তই অংশুলৰ পৰিয়াললৈ ফোন কৰি মুক্তিপণ বিচাৰে। পুত্ৰৰ জীৱনৰ শংকাত আতংকিত হৈ পিতৃয়ে অভিযুক্তই দিয়া বেংক একাউণ্টত তৎক্ষণাত ১ লাখ ৪৮ হাজাৰ টকা স্থানান্তৰ কৰে আৰু সমান্তৰালভাৱে আৰক্ষীকো খবৰ দিয়ে। ঘটনাৰ খবৰ পোৱাৰ লগে লগে পন্না আৰক্ষী সক্ৰিয় হৈ উঠে। চাইবাৰ টীমে প্ৰথমে সংশ্লিষ্ট বেংক একাউণ্টটো ফ্ৰিজ কৰায়। তাৰ পিছত অভিযুক্তসকলৰ অৱস্থান চিনাক্ত কৰি অভিযান চলায়। অৱশেষত আৰক্ষীয়ে অংশুলক সুস্থ-সবল অৱস্থাত উদ্ধাৰ কৰাৰ লগতে ৩ অপহৰণকাৰীক গ্ৰেপ্তাৰ কৰে। আৰক্ষীয়ে অভিযুক্তসকলৰ পৰা এটা পিষ্টল আৰু দুখন মটৰচাইকেল জব্দ কৰিছে। এই ঘটনাই ছ’চিয়েল মিডিয়াত বিলাসী জীৱন, দামী সামগ্ৰী আৰু ব্যক্তিগত তথ্য প্ৰদৰ্শন কৰি অহাসকলৰ বাবে এক কঠোৰ সতৰ্কবাণী হিচাপে ধৰা দিছে। অনলাইনত দেখুওৱা জাকজমকতাও কেতিয়াবা আপোনাৰ বাবে হ’ব পাৰে ডাঙৰ বিপদৰ কাৰণ।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
