সুখবৰ! নতুনকৈ জন্ম হোৱা শিশুক চৰকাৰে দিব ১ গ্ৰাম ওজনৰ সোণৰ আঙঠি

২২ জুনৰ পিছত জন্মলাভ কৰা নৱজাতকৰ পিতৃ-মাতৃলৈ সুখবৰ কঢ়িয়াইছে চৰকাৰে ঘোষণা কৰিছে এক অভিলাষী আঁচনি। এই আঁচনিৰ অধীনত প্ৰতিটো নৱজাতকে জন্মৰ লগে লগেই লাভ কৰিব এটাকৈ সোণৰ আঙঠি। তামিলনাডু চৰকাৰে গ্ৰহণ কৰিছে এই অভিলাষী আঁচনি যাৰ অধীনত নৱজাতকক ১ গ্ৰাম ওজনৰ সোণৰ আঙুঠি উপহাৰ হিচাপে প্ৰদান কৰা হ’ব। মুখ্যমন্ত্ৰী জোছেফ বিজয়ৰ চৰকাৰে আৰম্ভ কৰিবলগীয়া এই আঁচনিৰ নাম হৈছে ‘থাইমামান থংগা মোধিৰাম থিট্টাম’। শেহতীয়াকৈ এই আঁচনিৰ ৰূপায়ণ, তদাৰক আৰু পৰিচালনাৰ বাবে চৰকাৰে এক বিশেষ কাৰ্যসূচী ব্যৱস্থাপনা ইউনিট গঠনৰ সিদ্ধান্ত গ্ৰহণ কৰিছে। এই ইউনিটে আঁচনিৰ সামগ্ৰিক কাৰ্যকলাপ পৰিচালনা কৰাৰ লগতে ইয়াৰ সফল বাস্তৱায়ন নিশ্চিত কৰিব। আঁচনি অনুসৰি তামিলনাডুৰ চৰকাৰী চিকিৎসালয়সমূহত জন্মগ্ৰহণ কৰা প্ৰতিগৰাকী নবজাতক শিশুক এক গ্ৰাম সোণৰ আঙুঠি প্ৰদান কৰা হ’ব। বৰ্তমানৰ বজাৰ মূল্য অনুসৰি এই আঙুঠিৰ মূল্য প্ৰায় ১৩,৬০০ টকা। পৰিয়াললৈ নতুন সদস্যৰ আগমনৰ আনন্দ উদযাপন আৰু শিশুটিক আশীৰ্বাদ জনোৱাৰ উদ্দেশ্যে এই উপহাৰ আগবঢ়োৱা হ’ব।

নৱজাতকক সোণৰ আঙঠি উপহাৰ দিয়াৰ উদ্দেশ্য কি?

তামিল সংস্কৃতিত ‘থাইমামান ছীৰ’ নামৰ এক বিশেষ পৰম্পৰা আছে, য’ত মাতৃৰ ভাই অৰ্থাৎ মামাই নবজাতক শিশুক উপহাৰ প্ৰদান কৰে। সেই পৰম্পৰাক সন্মান জনাই চৰকাৰে নিজেই ‘মামা’ৰ ভূমিকা গ্ৰহণ কৰাৰ কথা ঘোষণা কৰিছে। চৰকাৰী নিৰ্দেশনাত কোৱা হৈছে যে, চৰকাৰী স্বাস্থ্য প্ৰতিষ্ঠানত জন্ম হোৱা প্ৰতিগৰাকী শিশুৰ বাবে চৰকাৰে ‘মামা’ৰ দায়িত্ব পালন কৰি পৃথিৱীলৈ স্বাগতমৰ নিদৰ্শনস্বৰূপে সোণৰ আঙুঠি উপহাৰ দিব। ৰাষ্ট্ৰীয় পৰিয়াল স্বাস্থ্য সমীক্ষা (NFHS)-ৰ তথ্য অনুসৰি, তামিলনাডুত প্ৰতি বছৰে প্ৰায় ৭.৮ লাখ প্ৰসূতিয়ে সন্তান জন্ম দিয়ে। ইয়াৰে ৯৯.৯% প্ৰসূতিয়ে চিকিৎসালয়ত জন্ম দিয়ে সন্তান। এইসকলৰ ভিতৰত প্ৰায় ৪.২ লাখ অৰ্থাৎ ৫৩ শতাংশ প্ৰসূতি চৰকাৰী স্বাস্থ্য প্ৰতিষ্ঠানসমূহত হয়।

নিৰ্বাচনৰ পূৰ্বে দিয়া প্ৰতিশ্ৰুতি পালন

উল্লেখযোগ্য যে, বিধানসভা নিৰ্বাচনৰ পূৰ্বে মুখ্যমন্ত্ৰী বিজয়ে এই প্ৰতিশ্ৰুতি দিছিল যে ৰাজ্যখনত জন্মগ্ৰহণ কৰা প্ৰতিগৰাকী শিশুক ‘মামা’ হিচাপে তেওঁ সোণৰ আঙুঠি উপহাৰ দিব। নিৰ্বাচনত সফলতা লাভ কৰাৰ পিছত চৰকাৰে সেই প্ৰতিশ্ৰুতি বাস্তৱায়নৰ দিশত পদক্ষেপ গ্ৰহণ কৰিছে। চৰকাৰী নিৰ্দেশনাত উল্লেখ কৰা হৈছে যে, ‘থাইমামান থংগা মোধিৰাম থিট্টাম’ কেৱল এটা উপহাৰ বা আঁচনি নহয়; ই শিশুৰ জন্মৰ আনন্দ আৰু মাতৃত্বৰ গুৰুত্ব উদযাপনৰ এক বিশেষ প্ৰয়াস। লগতে ই কৃতজ্ঞতা, সন্মান আৰু স্মৃতিৰ প্ৰতীক হিচাপেও বিবেচিত হ’ব। চৰকাৰে জনোৱা মতে, এই আঁচনি আনুষ্ঠানিকভাৱে ১৫ ছেপ্টেম্বৰত তামিলনাডুৰ প্ৰাক্তন মুখ্যমন্ত্ৰী চি. এন. আন্নাদুৰাইৰ জন্মজয়ন্তীৰ দিনা শুভাৰম্ভ কৰা হ’ব। অৱশ্যে ২২ জুনৰ পৰা জন্মগ্ৰহণ কৰা শিশুসকলক এই আঁচনিৰ অন্তৰ্ভুক্ত বুলি গণ্য কৰা হ’ব।

এই আঁচনিৰ বাবে কিমান টকা ব্যয় হ’ব?

এই বৃহৎ পদক্ষেপৰ বাবে তামিলনাডু চৰকাৰে বছৰি প্ৰায় ৭৫৫.৮৩ কোটি টকাৰ বাজেট আবণ্টন কৰিছে। চৰকাৰৰ মতে, তামিল সমাজত সোণৰ বিশেষ সাংস্কৃতিক আৰু আবেগিক মূল্য আছে। নৱজাতকক সোণ উপহাৰ দিয়া মানে শিশুৰ আগমনক উদযাপন কৰাৰ লগতে মাতৃকো সন্মান জনোৱা। চৰকাৰী নিৰ্দেশনাত আৰু কোৱা হৈছে যে, এই পদক্ষেপে জনস্বাস্থ্য ব্যৱস্থাৰ প্ৰতি জনসাধাৰণৰ আস্থা বৃদ্ধি কৰিব আৰু চৰকাৰী স্বাস্থ্যসেৱাক সমাজৰ গৌৰৱৰ বিষয় হিচাপে প্ৰতিষ্ঠা কৰিব। লগতে এই উপহাৰ শিশুৰ বাবে এক স্থায়ী সম্পদ হিচাপে থাকিব আৰু চৰকাৰী স্বাস্থ্য প্ৰতিষ্ঠানসমূহৰ প্ৰতি ইতিবাচক ভাবমূৰ্তি গঢ়ি তোলাত সহায়ক হ’ব।
এই প্ৰতিবেদন যুগুতাইছে মানসজ্যোতিয়ে

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ