‘মই চুৰিদাৰ পিন্ধাৰ বাবেই গাঁৱত আমাক এঘৰীয়া কৰিলে’
আধুনিক যুগত এগৰাকী বোৱাৰীয়ে চুৰিদাৰ পিন্ধাৰ বাবেই কাল হৈ নামিল পৰিয়ালটোৰ ওপৰত। এঘৰীয়া হব লগা হল এটা পৰিয়াল। যাৰ বাবে এতিয়া উপায়হীন পৰিয়ালটো কাষ চাপিছে আৰক্ষীৰ। এই ঘটনা এইখন অসমৰে ছিপাঝাৰৰ।
এগৰাকী বোৱাৰীয়ে চুৰিদাৰ পিন্ধাৰ বাবেই গাঁওবাসীয়ে এঘৰীয়া কৰিলে পৰিয়ালটোক। বৰ্তমানে সামাজিক সংকীৰ্ণতাৰ বলি হৈ স্বামীসহ ন্যায় বিচাৰি জিলা আয়ুক্ত, চক্ৰ বিষয়াৰ কাষ চাপিছে ভুক্তভোগী মেঘালী দাস নামৰ বোৱাৰীগৰাকী।
ছিপাঝাৰৰ গণেশকুঁৱৰীৰ পদ্মজানী গাঁৱত সংঘটিত হৈছে এই আজৱ ঘটনা। ঘটনা সন্দৰ্ভত জানিব পৰা অনুসৰি, কৰ্মসূত্ৰে মেঘালী দাসৰ স্বামী থাকে বহিঃৰাজ্যত। যাৰ বাবে মহিলাগৰাকীয়ে অকলেই পৰিয়াল চম্ভালি থকাৰ লগতে এখন সৰুকৈ দোকান চলাই আছে।
সেয়ে সকলো কামতে যাতে সুবিধা হয়, সহজ আৰু আৰামদায়ক হোৱা বাবে চুৰিদাৰ পিন্ধিয়ে দৈনন্দিন কাম-কাজ চলাবলৈ আৰম্ভ কৰে মেঘালী দাসে। ইয়াতে ক্ষুণ্ণ হৈ পৰে ছিপাঝাৰৰ পদ্মজানী গাঁৱৰ গাঁওবাসী।
কেৱল ক্ষুন্ন হোৱাই নহয়, গাঁওবাসীয়ে পাঁচ হেজাৰ টকাৰ জৰিমনাও বিহে পৰিয়ালটোক। লগতে চুৰিদাৰ পিন্ধাৰ ক্ষেত্ৰতো নিষেধাজ্ঞা জাৰি কৰে। অন্যথা চিৰদিনৰ বাবে গাঁওখনৰ পৰা বেলেগে এঘৰীয়া হৈ থাকিব লাগিব বুলি সদৰি কৰে গাঁওবাসীয়ে।
উল্লেখ্য যে, ইতিপূৰ্বে হেনো গাঁওখনৰ পৰা দুগৰাকী বোৱাৰী পলাই গৈছে পৰপুৰুষলৈ। তেওঁলোকেও এনেদৰে পিন্ধিছিল চুৰিদাৰ। সেইবাবেই মেঘালী দাসৰ ওপৰত এনে ধৰণৰ ব্যৱস্থা গ্ৰহণ কৰা হ’ল বুলি জানিবলৈ দিয়ে গাঁওখনৰ লোকে।
যাৰবাবে এতিয়া ন্যায় বিচাৰি প্ৰশাসনৰ ওচৰ চাপিল স্বামীসহ মেঘালী দাস নামৰ এইগৰাকী বোৱাৰী।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
