অসম লাইভ২৪ঃ এলন মাস্কে টুইটাৰ ক্ৰয় কৰাৰ পাছতেই আনিছে এটাৰ পাছত আনটো পৰিবৰ্তন। চলিত বৰ্ষৰেই এপ্ৰিল মাহত ৪ হাজাৰ ৪০০ কোটি ডলাৰত টুইটাৰ ক্ৰয় কৰিছিল মাস্কে৷ কিন্তু বিগত সপ্তাহৰ বৃহস্পতিবাৰেহে টুইটাৰ সম্পূৰ্ণৰূপে অধিগ্ৰহণ কৰিছে এলনে। এলনে দায়িত্ব লোৱাৰ পিছতেই বহুকেইটা সাল-সলনি কৰাৰ লগতে শেহতীয়াকৈ ব্লু টিকক লৈ চৰ্চা চলিছে সমগ্ৰতে। টুইটাৰ একাউণ্টত ব্লু টিক পাবৰ বাবে এতিয়াৰে পৰা দিব লাগিব মাহিলী মাছুল। ব্লু টিক লাভৰ বাবে ৩০ দিনত দিব লাগিব ৮ ডলাৰ। অৰ্থাৎ ভাৰতীয় টকাত এই ধন হ’ব ৬৬৩.৩৬ টকা।
এই বাৰ্তা টুইটযোগে শ্বেয়াৰ কৰিছে এলন মাস্কে। তেওঁ শ্বেয়াৰ কৰা বিশেষ ফটোখনত বহুতেই হাঁহিৰ খোৰাক পাইছে যদিও ফটোখনৰ জৰিয়তে তেওঁ বুজাব বিচাৰিছে অন্য এক কথাহে। ফটোখনত আছে টুইটাৰৰ ব্লু টিক আৰু ষ্টাৰবাক্সৰ একাপ কফি। ষ্টাৰবাক্সৰ কফি কাপৰ কাষতো লিখা আছে ৮ডলাৰ আৰু সময় ৩০ মিনিট। অৰ্থাৎ একাপ কফি খাবলৈ সৰ্বাধিক সময় লাগে ৩০ মিনিট আৰু এই ৩০ মিনিটৰ বাবেই আমি খৰছ কৰো ৮ ডলাৰ অৰ্থাৎ ভাৰতীয় টকাত ৬৬৩.৩৬ টকা। আনহাতে ব্লুটিকৰ কাষতো লিখা আছে ৩০ দিন আৰু ৮ ডলাৰ। অৰ্থাৎ ব্লু-টিকৰ বাবে ৩০ দিনত দিব লাগিব ৮ ডলাৰ ধন।
উল্লেখ্য যে টুইটাৰৰ নতুন স্বত্বাধিকাৰী মাস্কে ফটোখনেৰে বুজাব বিচাৰিছে যে আমাৰ প্ৰায়সংখ্যক লোকেই একাপ কফিৰ বাবেই ৮ ডলাৰ দিবলৈ চিন্তিত নহয় কিন্তু টুইটাৰৰ ব্লু টিক ল’বলৈ ৮ ডলাৰ দিয়াতহে আপত্তি কৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
