ৰুছ ৰাষ্ট্ৰপতি ভ্লাদিমিৰ পুটিনৰ নিৰ্দেশত ইতিমধ্যে ৰাছিয়াই ইউক্ৰেইন আক্ৰমণ কৰিলে৷ ইউক্ৰেইনেও ৰাছিয়াৰ আক্ৰমণ প্ৰতিৰোধ কৰা লগতে প্ৰত্যাক্ৰমণ কৰিছে৷
আন্তঃৰাষ্ট্ৰীয় সংবাদ পত্ৰসমূহে প্ৰকাশ কৰা অনুসৰি এই যুদ্ধত দুয়োপক্ষৰে সেনা নিহত হৈছে৷ ইউক্ৰেইনৰ ৰাষ্ট্ৰপতি কাৰ্যালয়ৰ সূত্ৰই প্ৰকাশ কৰা অনুসৰি অতি কমেও ৪০ গৰাকী ইউক্ৰেইনৰ সেনা এই যুদ্ধত নিহত হৈছে৷ ইউক্ৰেইনৰ দাবী যে অতি কমেও ৫০ গৰাকী ৰাছিয়ান সেনাৰ ইউক্ৰেইনৰ প্ৰত্যাক্ৰমণত নিহত হৈছে৷
ৰুছ ৰাষ্ট্ৰপতি ভ্লাদিমিৰ পুটিনে যুদ্ধ ঘোষণা কৰাৰ পিছতে ইউক্ৰেইনে ভ্লাদিমিৰ পুটিনক খলনায়ক সজাইছে৷ ইমানেই নহয় আনকি, দ্বিতীয় বিশ্ব যুদ্ধৰ খলনায়ক এডলফ হিটলাৰেৰে তুলনা কৰি হিটলাৰৰ সৈতে পুটিনৰ এক মিম অৰ্থাৎ কাৰ্টনো প্ৰচাৰ কৰিছে৷
ইউক্ৰেইনৰ অফিচিয়েল টুইটাৰ হেণ্ডলত প্ৰচাৰিত উক্ত কাৰ্টন ছবিখনত ওপৰৰ পৰা হিটলাৰে ভ্লাদিমিৰ গালত চুই আদৰ কৰি থকা দেখা গৈছে৷
— Ukraine / Україна (@Ukraine) February 24, 2022
এই মিমটো সামাজিক মাধ্যমত ভাইৰেল হৈ পৰাৰ পিছতে বিশ্বজুৰি সামাজিক মাধ্যমত সমালোচনাৰ সন্মুখীন হৈছে ইউক্ৰেইন৷
সামাজিক মাধ্যমত ইউক্ৰেইনক সমালোচনা কৰি কোৱা হৈছে যে যুদ্ধৰ সময়ত এই ধৰণৰ মিম শ্বেয়াৰ কৰাতো উচিত হোৱা নাই৷
ইয়াৰ প্ৰত্যুত্তৰত ইউক্ৰেইন অন্য এক টুইট কৰি কয় যে ‘‘এইটো মিম নহয়, কিন্তু এয়া হৈছে আমাৰ আৰু আপোনাৰ বাস্তৱ৷’’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
