অসম লাইভ২৪ঃ শুকুৰবাৰে ৪২ বছৰ বয়সত ভৰি দিলে ভাৰতীয় ক্ৰিকেট দলৰ প্ৰাক্তন অধিনায়ক মহেন্দ্ৰ সিং ধোনীয়ে৷ নিজৰ যোগ্যতাৰ ভিত্তিতেই বিশ্ব ক্ৰিকেটতো সাফল্যৰ অন্য এক শৃঙ্গত ভৰি দিছিল ধোনীয়ে৷ এই সাফল্যৰ বাবেই ধোনীয়ে পদ্মভূষণ, পদ্মশ্ৰী আৰু ৰাজীৱ গান্ধী খেলৰত্ন পুৰস্কাৰেৰেও সন্মানিত কৰা হৈছে ধোনীক৷ মহেন্দ্ৰ সিং ধোনীক সকলোৱে মাহি বুলিয়েই কয়৷ তেওঁ একমাত্ৰ ভাৰতীয় ক্ৰিকেট অধিনায়ক যাৰ নেতৃত্বত টীম ইণ্ডিয়াই তিনিটাকৈ আইচিচি খিতাপ অৰ্জনো কৰিছে৷ আন্তৰ্জাতিক ক্ৰিকেটৰ পৰা অৱসৰ গ্ৰহণ কৰিলেও আইপিএলত এতিয়াও অংশগ্ৰহণ কৰি আছে মাহিয়ে৷ খেলৰ সমান্তৰালকৈ পত্নী সাক্ষীৰ সৈতে এখন সুখৰ সংসাৰো আছে ধোনীৰ৷
কিন্তু মাহিৰ জীৱনত সাক্ষীয়েই প্ৰথম মহিলা নহয়৷ সাক্ষীতকৈ পূৰ্বে মাহিৰ হৃদয়ত বসন্ত নমাইছিল আন এগৰাকী নাৰীয়েহে৷ কেইবা বছৰ আগৰ কথা৷ মহেন্দ্ৰ সিং ধোনীক লৈ এখন বায়োপিক ৰিলিজ হৈছিল৷ সেই বায়োপিকতেই এই কথা উল্লেখ আছে৷ ধোনীৰ জীৱনত প্ৰেমৰ অধ্যায় আধৰুৱাই হৈ ৰ’ল৷ মাহিৰ বয়স তেতিয়া মাত্ৰ ২০ বছৰ হৈছিল৷ ভাৰতীয় ক্ৰিকেট দলত তেওঁ তেতিয়া স্থান লাভ কৰিছিলহে৷ ধোনীৰ জীৱনত তেতিয়াই প্ৰেম আহিছিল৷ প্ৰিয়ংকা ঝা নামৰ এগৰাকী যুৱতীৰ সৈতে পৰিচিত হৈছিল মাহি৷ দুজনৰ মাজত ধীৰে ধীৰে প্ৰেমৰ সম্পৰ্ক গঢ়ি উঠে৷ এই ভালপোৱাৰ সম্পৰ্ক ইমানেই গভীৰ আছিল যে এসময়ত ধোনীয়ে প্ৰিয়ংকাক বিয়াও কৰাবলৈকো আগবাঢ়িছিল৷
২০০৩-২০০৪ চনত জিম্বাৱোয়ে আৰু কেনিয়াত ভাৰতীয় দলটোৰ হৈ খেলিবলৈ সুযোগ লাভ কৰিছিল ধোনীয়ে৷ সেই ত্ৰিদেশীয় টুৰ্ণামেণ্টত ৬ ইনিংছত ধোনীয়ে ৩৬২ ৰান কৰিছিল৷ আৰু এই বেটিঙৰ সুবাদতেই ভাৰতীয় ক্ৰিকেট দলটোৰ প্ৰাক্তন অধিনায়ক সৌৰৱ আৰু কোচ ৰবি শাস্ত্ৰীৰ দৃষ্টি কাঢ়িছিল ধোনীয়ে৷ তাৰপাছতেই ২০০৪ চনত বাংলাদেশৰ বিৰুদ্ধে খেলতো সুযোগ লাভ কৰে ধোনীয়ে৷ ধোনীৰ জীৱনলৈ এটাৰ পাছত আনটো সফলতা আহিবলৈ ধৰোতেই ধোনীলৈ আহিছিল অনাকাংশিত খবৰটো৷ ধোনীৰ প্ৰেয়সী প্ৰিয়ংকাই ইহসংসাৰ ত্যাগ কৰাৰ খবৰ৷ ২০০৪ চনত এটা পথ দুৰ্ঘটনাত মৃত্যুৰ আঁকোৱালি লৈছিল মাহিৰ প্ৰিয় নাৰীয়ে৷ টুৰ্ণামেণ্টৰ পৰা দেশলৈ উভতি আহিয়েই এই খবৰ লাভ কৰিছিল ধোনীয়ে৷
প্ৰিয়ংকাৰ মৃত্যুৱে মহেন্দ্ৰ সিং ধোনীক সম্পূৰ্ণৰূপে ভাঙি পেলাইছিল৷ কিন্তু জীৱন যুদ্ধত পৰাজিত হ’লে জানো এই খেলুৱৈজনক দেশে লাভ কৰিলহেতেন! মনোবল নেহেৰুৱাই ধোনীয়ে দেশৰ হকে খেলি গ’ল এখনৰ পাছত আনখন মেচ৷ কিন্তু ভিতৰি সম্পূৰ্ণৰূপে ভাঙি পৰিল মাহি৷ ইয়াৰ পাছতেই প্ৰিয়ংকাৰ মৃত্যুৰ ৬বছৰ পাছত ২০১০ চনত তেওঁৰ সৰুকালৰ বান্ধৱী সাক্ষী সিং ৰাওয়াতক বিয়া কৰায়৷ মাহিৰ ঘনিষ্ঠ এক সূত্ৰই জনোৱা অনুসৰি আজিও প্ৰিয়ংকাক পাহৰিব পৰা নাই মাহিয়ে৷ প্ৰিয়ংকাৰ স্মৃতি সজীৱ কৰি ৰাখিবৰ বাবেই ধোনীয়ে তেওঁৰ বায়োপিকত প্ৰিয়ংকাৰ প্ৰসংগটো আনিবলৈ অনুমতি দিছিল৷ প্ৰেয়সী নাথাকিলেও প্ৰেয়সীৰ কথাবোৰ সজীৱ কৰি ৰাখিবলৈ চেষ্টা কৰিছিল মাহিয়ে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
