অসম লাইভ২৪ঃ গড়চুক পামোহীৰ এখন বিশেষ বিদ্যালয়৷ বিদ্যালয়খনে দেশ বিদেশত চৰ্চা লাভ কৰিছে৷ প্লাষ্টিকৰে বিভিন্ন সামগ্ৰী প্ৰস্তুত কৰা, বিভিন্ন ধৰণৰ কাঠৰ আচবাব যেনে চকী, টেবুল নিৰ্মাণ আৰু বিভিন্ন ধৰণৰ শাক-পাচলি ৰূপনৰ পদ্ধতি বিষয়ৰ শিক্ষা দিয়ে।
আজি গড়চুক পামহীত নলবাৰী বিধানসভা সমষ্টিৰ প্ৰাক্তন বিধায়িকা ড০ অলকা দেশাই শৰ্মাৰ Akshar Forum বিদ্যালয় পৰিদৰ্শন কৰে বিধানসভাৰ অধ্যক্ষ বিশ্বজিত দৈমাৰীয়ে৷ বিদ্যালয়খনলৈ যোৱাৰ পাছতেই অধ্যক্ষ বিশ্বজিৎ দৈমাৰীয়ে বিদ্যালয়খন সন্দৰ্ভত সামাজিক মাধ্যমত লিখিছে, ‘আজি মই গড়চুক পামহীত নলবাৰী বিধানসভা সমষ্টিৰ প্ৰাক্তন বিধায়িকা ড০ অলকা দেশাই শৰ্মা ডাঙৰীয়ানিৰ Akshar Forum বিদ্যালয় পৰিদৰ্শন কৰি আনন্দিত হৈছোঁ। আচৰিত আৰু প্ৰশংসনীয় কথাটো হ’ল এই বিদ্যালয়খনত বিভিন্ন ধৰণৰ বঞ্চিত ছাত্ৰ ছাত্ৰীসকলক আনুষ্ঠানিক শিক্ষা লগতে ভিন্ন বিষয়ত বৃত্তিমুলক শিক্ষা প্ৰদান কৰি অহা হৈছে। প্লাষ্টিকৰে বিভিন্ন সামগ্ৰী প্ৰস্তুত কৰা, বিভিন্ন ধৰণৰ কাঠৰ আচবাব যেনে চকী, টেবুল নিৰ্মাণ আৰু বিভিন্ন ধৰণৰ শাক-পাচলি ৰূপনৰ পদ্ধতি বিষয়ৰ শিক্ষা দিয়ে। উল্লেখনীয় দিশটো হ’ল জেষ্ঠ ছাত্ৰ ছাত্ৰীসকলে নিজৰকৈ নিম্ন শ্ৰেণীৰ কনিষ্ঠ ছাত্ৰ ছাত্ৰীসকলক শিক্ষা দিয়া হয়। আজি মই অক্সফোৰ্ড বিশ্ববিদ্যালয়ৰ ইণ্টাৰ্নশ্বিপ কৰিবলৈ অহা ছাত্ৰ ছাত্ৰীসকলক ইয়াত লগ পাইছোঁ আৰু তেওঁলোকে এই বিদ্যালয়খনত আহি জীৱনৰ উৎকৃষ্ট মানৰ অভিজ্ঞতা লাভ কৰিবলৈ সক্ষম হোৱা বুলি অৱগত কৰিছে। আমাৰ বিদ্যালয় সমূহতো যদিহে এই পদ্ধতিৰে শিক্ষা দানৰ ব্যৱস্থা কৰে, সকলো ছাত্ৰ ছাত্ৰীয়ে বিদ্যালয়ত শিক্ষা গ্ৰহণৰ সময়ৰে পৰা নিজৰ জীৱন গঢ়াৰ সকলো জ্ঞান আৰু অভিজ্ঞতা লাভ কৰিবলৈ সক্ষম হ’ব। মই ভাবো শিক্ষাৰ সৈতে জড়িত থকা আৰু এই দিশত ইচ্ছুক সকলো ব্যক্তিয়ে সেই বিদ্যালয় খনলৈ যদি যায়, শিক্ষাৰ ক্ষেত্ৰত ছাত্ৰ ছাত্ৰীৰ বাবে নতুন দিশ উদ্ভাৱন কৰিবলৈ সক্ষম হ’ব । মাননীয় প্ৰাক্তন বিধায়িকা ড০ অলকা দেশাই শৰ্মা ডাঙৰীয়ানী আৰু তেখেতৰ ফাউণ্ডেশ্যনৰ লগত জড়িতহৈ মানৱ সমাজলৈ সেৱা আগবঢ়োৱা সকলোলৈ ধন্যবাদ জ্ঞাপন কৰিলোঁ । তেওঁলোক যেন সকলোৰে আদৰ্শ আৰু প্ৰেৰণা হৈ ৰয়।’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
