অসম লাইভ২৪ঃ বহুদিনৰ অন্তত আমেৰিকাত হাড়কপোঁৱা জাৰ। বৰফে ঢাকিছে আমেৰিকা। হাজাৰ হাজাৰ মানুহ দুৰ্যোগৰ সন্মুখীন হোৱাৰ বিপৰীতে বিদ্যুত সংযোগো সম্পূৰ্ণৰূপে কৰ্তন হৈছে বহুকেইটা এলেকাত। বৰ্তমানলৈ এই ছাইক্লনত ৩৪ জনৰো অধিক লোক নিহত হোৱা বুলি প্ৰকাশ কৰিছে আমেৰিকাৰ বিশেষ সংবাদ সংস্থাই। কৰোবাত যদি ভুপৃষ্টৰ পৰা ৮ ফুট ওপৰলৈকে বৰফৰ তৰপ আন কৰোবাত ১০ ফুটলৈকে বৰফেই ঢাকি ধৰিছে। বৰদিনৰ সময়তেই এই বিপৰ্যয়ত সমগ্ৰ আমেৰিকাতে শোকৰ ছাঁ পৰা পৰিলক্ষিত হৈছে।
আমেৰিকাৰ এই ভয়ংকৰ তুষাৰপাতত ‘চাইক্ল’ন বম’ বুলি নামকৰণ কৰা হৈছে। ইপিনে এই ছাইক্লনৰ বাবেই আমেৰিকাৰ বহু এলেকাৰ তাপমাত্ৰা মাইনাছ ৪০ ৰ পৰা মাইনাছ ৪৫ ডিগ্ৰীলৈ নামিছে তাপমাত্ৰা। তুষাৰপাত আৰু অত্যাধিকভাৱে কমি অহা তাপমাত্ৰাৰ বাবেই উদ্ধাৰকাৰী দলেও উদ্ধাৰ কাৰ্যত বাধাৰ সন্মুখীন হোৱা বুলি প্ৰকাশ কৰিছে ৱাছিংটন টাইমছে।
এই ছাইক্লনৰ বাবেই এই অঞ্চলৰ ব্যক্তিসকলক বাহিৰলৈ ওলোৱাত বাধা আৰোপ কৰা হৈছে। অত্যাধিক প্ৰয়োজনীয় কাম নাথাকিলে ঘৰৰ বাহিৰলৈ ওলোৱা সম্পূৰ্ণ নিষেধ বুলি জনাইছে আমেৰিকাৰ প্ৰশাসনে। এই ছাইক্ল’নৰ বাবেই প্ৰায় ২ লাখ মানুহৰ বিদ্যুত কৰ্তন কৰা হৈছে। পৰিস্থিতি স্বাভাৱিক হ’বলৈ কিমান দিনৰ প্ৰযোজন হ’ব সেই সম্পৰ্কেও নিশ্চিত হ’ব পৰা নাই বতৰ বিজ্ঞান কেন্দ্ৰই। বহুঠাইত বিদ্যুতৰ পষ্টসমূহ বৰফে ঢাকি ধৰাৰ বাবেই বিদ্যুত কৰ্তন কৰা বুলি প্ৰকাশ কৰিছে আমেৰিকাৰ প্ৰশাসনে। আনহাতে বিপৰ্যস্ত হৈ পৰিছে যাতায়াত ব্যৱস্থাও। কেৱল ঠাণ্ডাতেই আমেৰিকাৰ কলোৰাডোত মৃত্যু হৈছে ৪ জনকৈ লোকৰ। নিউৱৰ্কতো মৃত্যু ঘটিছে ১২ জনকৈ লোকৰ। বৰ্তমানলৈ আমেৰিকাৰ মুঠ ৯ খন প্ৰদেশৰ পৰা আহিছে মৃত্যুৰ খবৰ।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
