গাজা দখল কৰাৰ ধমকি পূৰ্বেই দিছিল মাৰ্কিন প্ৰেছিডেণ্ট ড’নাল্ড ট্ৰাম্পে৷ এইবাৰ যুদ্ধজৰ্জৰ গাজাৰ পৰা ১০ লাখ পেলেষ্টাইনী নাগৰিকক লিবিয়ালৈ পঠিয়াই দিব আমেৰিকাই৷ চলিছে তেনে পৰিকল্পাই৷ সম্প্ৰতি এক ভিডিঅ’ সামাজিক মাধ্যমত শ্বেয়াৰ কৰিছিল ট্ৰাম্পে৷ তাতেই মৃত্যুপুৰী গাজা হৈ উঠিছে মায়ানগৰী৷ বতাহত উৰিছে টকা৷ আৰু চহৰজুৰি কেৱল ট্ৰাম্পৰেই প্ৰতিমূৰ্তি৷ এই নতুন গাজা ট্ৰাম্পৰেই৷ ফলত এই খবৰক লৈ জল্পনা বাঢ়িছে যে গাজা খালী কৰাৰ কাম আৰম্ভ কৰিছে আমেৰিকাই৷
বিগত দুদিনত ১২০গৰাকী মানুহৰ মৃত্যু হৈছে গাজাত৷ ইয়াৰ মাজতে দক্ষিণ গাজাৰ খান ইউনিছত বৃহস্পতিবাৰৰ নিশা বোমাবৰ্ষণত মৃত্যু হৈছে ৫৪জনৰ৷ তাৰ পূৰ্বেও বুধবাৰে উত্তৰ আৰু দক্ষিণ গাজা মিলি প্ৰাণ হেৰুৱাইছে অন্তত ৭০গৰাকী লোকে৷ এই পৰিস্থিতিত বিগত শুকুৰবাৰে মাৰ্কিন চেনেল এন বি চি নিউজে এক ৰিপৰ্টত দাবী কৰিছে, ট্ৰাম্প প্ৰশাসনে এটা বিশেষ পৰিকল্পনা কৰিছে৷ আমেৰিকাই ১০ লাখ পেলেষ্টাইনীক গাজাৰ পৰা লিবিয়াত স্থায়ীভাৱে পঠিয়াই দিব৷ ইয়াৰ সলনি ট্ৰাম্প চৰকাৰে লিবিয়াৰ প্ৰাপ্য কোটি কোটি ডলাৰৰ ফাণ্ড দিব৷ যি প্ৰায় এক দশক ধৰি ৰখাই থৈছে আমেৰিকাই৷ ইতিমধ্যেই দুই দেশৰ মাজত আলোচনাও হৈছে এতিয়াও অৱশ্যে চূড়ান্ত চুক্তি হোৱা নাই৷
এই বিষয়টো ইজৰাইলকো জনোৱা হৈছে৷ মাৰ্কিন চৰকাৰৰ এগৰাকী মুখপাত্ৰই এন বি চি নিউজক জনাইছে যে এই ৰিপৰ্ট সঠিক নহয়৷ এতিয়া যি পৰিস্থিতি চলি আছে তাত এইধৰণৰ পৰিকল্পনা বাস্তবায়ন কৰাটো সম্ভৱপৰ নহয়৷ বিগত ফেব্ৰুৱাৰীত আমেৰিকালৈ গৈছিল ইজৰায়েলৰ প্ৰধানমন্ত্ৰী বেঞ্জামিন নেতানিয়াহু৷ সেই সময়তেই তেওঁক কাষত লৈ ট্ৰাম্পে হুংকাৰ দিছিল, ‘আমেৰিকাই গাজা দখল কৰিবই৷ পেলেস্তাইনীসকলক অন্যস্থানলৈ পুননিৰ্বাসন দিয়া হব৷ আমি গাজাৰ উন্নতি কৰিম, সংস্কাৰ কৰিম৷ গাজাত যি বোমা, বিস্ফোৰক এতিয়াও আছে সেইসমূহ ধ্বংস কৰিম৷ তাৰপিছতেই কৰ্মস্থানৰ ব্যৱস্থা আৰু আৰ্থিক উন্নতিৰ বাবে কাম কৰিম৷ মানুহৰ মূৰৰ ওপৰত ছাদ দিয়াৰ কাম কৰিম৷ মুঠতে গাজা সম্পূৰ্ণ আমাৰেই হব৷’
তাৰপিছতেই ট্ৰাম্পে শ্বেয়াৰ কৰে বিশেষ এটা ভিডিঅ’৷ এই ভিডিঅ দেখাৰ পাছতেই গাজাৰ ভৱিষ্যতক লৈ প্ৰশ্ন উঠিছে৷ আমেৰিকাৰ এই খবৰে নতুন সমীকৰণ তৈয়াৰ কৰিছে মধ্যপ্ৰাচ্যত৷ বিশ্লেষকসকলৰ মতে, ট্ৰাম্পে গাজাক লৈ যি ধমকি দিছে সেয়া মুঠেও ভালধৰণে নলয় ইৰাণে৷ গাজাত জেহাদৰ কঁকাল ভাঙি দখল কৰি লোৱা মানেই পাৰমাণৱিক শক্তিধৰ তেহৰাণকো বাৰ্তা দিয়া৷ কাৰণ হামাছ, লেবাননৰ হিজবুল্লা, য়েমেনৰ হাউথিসকলক সহায় কৰাৰ অভিযোগ আছে ইৰাণৰ বিৰুদ্ধে৷ য়েমেনতো আক্ৰমণ তীব্ৰ কৰিছে আমেৰিকাই৷ ইজৰাইলক লগত লৈ এইবাৰ মুকলিকৈ যুদ্ধত নামিব পাৰে ৱাছিংটন বুলি বহুতেই ধাৰণা কৰা পৰিলক্ষিত হৈছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
