পুনৰ অগ্নিগৰ্ভা বাংলাদেশ,প্ৰতিবাদী যুৱ নেতাৰ নিহতৰ পাছতে ক্ষোভৰ দাৱানল, প্ৰতিবাদকাৰীৰ লক্ষ্য নেতা-সাংবাদিক
পুনৰ এবাৰ অগ্নিগৰ্ভা হৈ পৰিছে ভাৰতৰ চুবুৰীয়া দেশ বাংলাদেশ। দেশ খনৰ চাৰিওফালে হিংসাত্মক পৰিস্থিতিৰ সৃষ্টি হৈছে যদিও এইবাৰৰ কাৰণ প্ৰাক্তন প্ৰধানমন্ত্ৰী শ্বেখ হাছিনা নহয়, বৰঞ্চ হাছিনাৰ প্ৰতিদ্বন্দ্বী নেতা তথা প্ৰতিবাদী যুৱ নেতা শ্বৰীফ ওছমান হাদী।
বৃহস্পতিবাৰে ছিংগাপুৰত যুৱ নেতা ওছমান হাদীৰ আকস্মিক মৃত্যুৰ পাছতে প্ৰতিবাদকাৰীৰ মাজত হিংসাত্মক পৰিস্থিতিৰ সৃষ্টি হৈছে। এইবাৰ এই হিংসাত্মক পৰিস্থিতিৰ বাবে প্ৰতিবাদকাৰীৰ লক্ষ্য হৈ পৰিছে নেতা-সাংবাদিক। যাৰ পৰিণতিত প্ৰতিবাদকাৰীয়ে ঢাকাত বাংলাদেশী বাতৰি কাকত প্ৰথম আলো আৰু ডেইলী ষ্টাৰ থকা অট্টালিকা ভাঙি ভাঙি লণ্ডভণ্ড কৰে। আক্ৰমণৰ সময়ত প্ৰায় ৩০ জন সাংবাদিক অট্টালিকাৰ ভিতৰত আছিল। পাছতে সেনাই কোনোমতে উদ্ধাৰ কৰে লোক কেইগৰাকীক।
উল্লেখ্য যে, ১২ ডিচেম্বৰত নিৰ্বাচনী প্ৰচাৰৰ সময়ত যুৱ নেতা ওছমান হাদীক কোনো মুখা পিন্ধা আততায়ীয়ে হঠাতে আক্ৰমণ কৰি হাদীৰ মূৰত গুলিয়াইছিল। এই আক্ৰমণৰ পিছত হাদীক ঢাকাৰ এখন চিকিৎসালয়ত ভৰ্তি কৰোৱা হৈছিল। কিন্তু অৱস্থা সংকটজনক হোৱাৰ বাবে হাদীক ছিংগাপুৰৰ এখন চিকিৎসালয়লৈ প্ৰেৰণ কৰা হয়।
কিন্তু কেইবাদিনো ধৰি মৃত্য়ুৰ সৈতে যুঁজ দি অৱশেষত ওছমান হাদীয়ে চিকিৎসালয়তে মৃত্যুবৰণ কৰে। ছিংগাপুৰৰ বৈদেশিক পৰিক্ৰমা মন্ত্ৰালয়ে তেওঁৰ মৃত্যু নিশ্চিত কৰাৰ লগে লগে বাংলাদেশত ইনকুইলাব মঞ্চৰ প্ৰতিবাদকাৰীসকল উন্মাদ হৈ পৰে।
প্ৰতিবাদকাৰীয়ে জ্বলাই দিয়ে আৱামী লীগৰ কাৰ্যালয়। লগতে শ্বেখ হাছিনাৰ পিতৃ মুজিবুৰ ৰহমানৰ ঘৰতো জুই লগাই দিয়ে। ইয়াৰ পূৰ্বে প্ৰতিবাদকাৰীয়ে শ্বেখ হাছিনাৰ ঘৰৰ ব্যাপক ক্ষতিসাধন কৰিছিল।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
