নিউয়ৰ্কৰ টাইমছ স্কোয়েৰৰ বিলবৰ্ডৰ দৰেই বিশ্বৰ অন্যতম বিজ্ঞাপনৰ স্থান হৈছে আৰব আমিৰশাহিৰ বুৰ্জ খালিফা৷ বিভিন্ন দেশৰ বিশেষ বিশেষ দিনত, নিশাৰ অন্ধকাৰত বিশেষ বিশেষ আলোকসজ্জাৰে সাজি উঠে বুৰ্জ খালিফা৷ ইয়াৰোপৰি বিশ্বৰ এই সৰ্বোচ্চ ভৱনৰ গাত ফুটি উঠে বিভিন্ন বিজ্ঞাপন৷ ভাৰতৰ স্বাধীনতা দিৱসৰ দিনা বুৰ্জ খালিফাত দেখা যায় ভাৰতীয় জাতীয় পতাকা৷ একেদৰে শ্বাহৰুখৰ জন্মদিনত বুৰ্জ খালিফাত দেখা যায় শ্বাহৰুখৰ ছবি৷ আপুনিও ইচ্ছা কৰিলে আপোনাৰ ছবি বুৰ্জ খালিফাত জিলিকাই তুলিব পাৰে৷ অৱশ্যে তাৰবাবে বিশেষ কেইটামান চৰ্ত মানি চলাটো খুবেই জৰুৰী৷
বুৰ্জ খালিফাৰ গাত ছবি লগাবলৈ প্ৰথমে বিজ্ঞাপনৰ বাবে আৱেদন কৰাটো জৰুৰী৷ পূৰ্বে ইমাৰ প্ৰপাৰ্টিজৰ অনুমতি লোৱাটো জৰুৰী৷ ইমাৰ প্ৰপাৰ্টিজেই বিশ্বৰ এই সৰ্বোচ্চ ওখ অট্টালিকা বুৰ্জ খালিফাৰ মালিক৷ তেওঁৰ সন্মতি অবিহনে এই বুৰ্জ খালিফাত কোনোৱে একো হেৰফেৰ কৰিব নোৱাৰে৷ তেওঁৰ সন্মতিৰ পাছতহে বিজ্ঞাপনটোৰ বাবে কিমান ধন লোৱা হ’ব সেই কথা পতা হয়৷ বিজ্ঞাপনটো কিমান সময় চলিব সেই কথাৰ ওপৰতেই খৰচ নিৰ্ভৰ কৰে৷
উদাহৰণস্বৰূপে ধৰা হ’ল প্ৰাইম টাইমত অৰ্থাৎ নিশা ৮ বজাৰ পৰা নিশা ১০ বজাৰ ভিতৰত প্ৰায় ৩ মিনিটৰ দীঘল বাৰ্তা বা বিজ্ঞাপন দিবলৈ প্ৰায় ৩.৫ ডিৰহাম লাগে৷ ভাৰতীয় টকাত এই ধনৰ পৰিমান হৈছে ৭৯.৬২ লাখ টকা৷ সাপ্তাহিকভাৱে এই বিজ্ঞাপন দিবলৈ খৰচ আৰু বৃদ্ধি পাব৷ সপ্তাহৰ বাবে বিজ্ঞাপন চলাবলৈ হ’লে ব্যয় কৰিব লাগিব ৫.৮ ডিৰহাম৷ ভাৰতীয় টকাত এই মুল্য ১ কোটি ৩২ লাখ টকা৷ আৰু বিজ্ঞাপনটো যদি সন্ধিয়া ৭ বজাৰ পৰা মাজনিশালৈ মুঠ ৫ বাৰ দেখুওৱা হয় তেন্তে আনুমানিক প্ৰায় ১০ লাখ ডিৰহাম খৰচ কৰিব লাগিব বিজ্ঞাপনদাতাই৷ ভাৰতীয় মুদ্ৰাত এই ধনৰ পৰিমান ২.২৭ কোটি টকা৷
বুৰ্জ খালিফাত দিয়া বিজ্ঞাপন পৰিচালনা কৰে ‘মুলেন ল মেনা’ নামৰ এক মাৰ্কেটিং সংস্থাই৷ তেওঁলোকৰ সদৰ দপ্তৰো ডুবাইতেই অৱস্থিত৷ যদি কোনোৱে বুৰ্জ খালিফাৰ গাত কোনো ব্ৰেণ্ড বা ব্যক্তিগত বাৰ্তা প্ৰচাৰ কৰিব খোজে তেন্তে সেই বিজ্ঞাপনৰ কপি মুলেন ল মেনা নামৰ সংস্থাটোক জমা দিব লাগিব৷ তেওঁলোকে বিজ্ঞাপনটো চালি জাৰি চাই তাৰপিছত সেই বিজ্ঞাপনটো চলাব পৰা হ’বনে সেই সন্দৰ্ভত বিজ্ঞাপনদাতাক তথ্য দিয়ে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
