বলীউডৰ জনপ্ৰিয় অভিনেতা গোবিন্দাৰ পত্নী সুনীতা আহুজাই বিভিন্ন সময়ত স্বামীৰ বিৰুদ্ধে বিবাহ বহিৰ্ভূত সম্পৰ্ক আৰু বিশ্বাসঘাতকতাৰ অভিযোগ উত্থাপন কৰি আহিছে। এনে চৰ্চাৰ মাজতে গোবিন্দাক অভিনেত্ৰী কোমল ৰাণী স্বৰ্ণকাৰৰ সৈতে বিমানবন্দৰত দেখা পোৱা গৈছে। উল্লেখযোগ্য যে, সুনীতাই কিছুদিন পূৰ্বে গোবিন্দাৰ সৈতে জড়িত কথাবোৰত ‘কোমল’ নামটো উল্লেখ কৰি কৈছিল যে তেওঁ এই নামটোকেই ঘৃণা কৰে।
শুকুৰবাৰে ঝাৰখণ্ডৰ এটা বিমানবন্দৰত গোবিন্দাক কোমলৰ সৈতে দেখা যায়। ক’লা জেকেট আৰু ক’লা ছানগ্লাছ পৰিহিত গোবিন্দা গাড়ীৰ পৰা নামি আহি পাপাৰাজিৰ সন্মুখত প’জ দিয়ে। কিছু সময়ৰ পাছতে অভিনেত্ৰী কোমল ৰাণী স্বৰ্ণকাৰকো গোবিন্দাৰ সৈতে একেলগে বিমানবন্দৰৰ ভিতৰলৈ সোমাই যোৱা দেখা যায়।
প্ৰায় ৭ বছৰৰ বিৰতিৰ অন্তত গোবিন্দাই বলিউডলৈ পুনৰ উভতি আহিবলৈ সাজু হৈছে। নিজৰ প্ৰযোজনাৰে নিৰ্মাণ হ’বলগীয়া ‘ৰূপা’ নামৰ ছবিখনৰ জৰিয়তে অভিনেত্ৰী কোমল স্বৰ্ণকাৰকো বলিউডত অভিষেক কৰোৱাৰ কথা জানিব পৰা গৈছে। ইয়াৰ উপৰিও গোবিন্দাৰ আন এখন ছবি ‘দুনিয়াদাৰী’তো কোমল ৰাণী স্বৰ্ণকাৰক দেখা যাব বুলি চৰ্চা চলিছে। যোৱা জুলাই মাহত ‘ৰূপা’ ছবিখনক লৈ অনুষ্ঠিত এখন সংবাদমেলত গোবিন্দাই কোমলক সংবাদ মাধ্যমৰ সৈতে পৰিচয় কৰাই দিছিল। সেই সময়ত তেওঁ অভিনেত্ৰীগৰাকীৰ প্ৰশংসাও কৰিছিল। গোবিন্দাই কৈছিল যে ছবিখন চোৱাৰ পাছত দৰ্শকে কোমলক এগৰাকী ভাল অভিনেত্ৰী হিচাপে গ্ৰহণ কৰিব।
কিছুদিন পূৰ্বে এক সাক্ষাৎকাৰত সুনীতাই গোবিন্দাৰ সৈতে জড়িত এফেয়াৰ সম্পৰ্কীয় চৰ্চাৰ বিষয়ে মুকলিকৈ কথা পাতিছিল। তেওঁ কৈছিল যে যৌৱনকালত মানুহে ভুল কৰিব পাৰে, কিন্তু ৬৩ বছৰ বয়সত এনেধৰণৰ কথাৰ সৈতে নিজৰ নাম জড়িত কোনো কাৰণতে উচিত নহয়। সাক্ষাৎকাৰটোত গোবিন্দাৰ পত্নী সুনীতাই লগতে কয়- “এই কোমল নামটো অলপ গণ্ডগোলীয়া। মোৰ কোমল নামটোৱেই ঘৃণা লাগে। এগৰাকী কোমল আছে, কোনো এগৰাকী এক্স-ৱাই-জেড। মই তাইক ঘৃণা কৰোঁ।” একেটা সাক্ষাৎকাৰতে গোবিন্দাৰ পত্নী সুনীতাই বলিউডলৈ অভিনয়ৰ সপোন লৈ অহা কিছুমান নতুন যুৱতীক লৈ তীব্ৰ মন্তব্য কৰি কৈছিল ‘নতুন ছোৱালীবোৰক শ্বুগাৰ ডেডী লাগে’ তেওঁৰ ভাষ্য অনুসৰি, বৰ্তমান বহু নতুন যুৱতীয়ে সংগ্ৰামৰ সময়ত নিজৰ খৰচ বহন কৰিবলৈ ‘শ্বুগাৰ ডেডী’ বিচাৰে। সুনীতাই অভিযোগ কৰিছিল যে কিছুমানে অভিনেত্ৰী হোৱাৰ আকাংক্ষাত প্ৰভাৱশালী পুৰুষৰ সৈতে সম্পৰ্ক গঢ়ি তোলে আৰু পিছত তেওঁলোকক ব্লেকমেইল কৰাৰ চেষ্টা কৰে।
গোবিন্দাৰ সন্দৰ্ভত তেওঁ লগতে কৈছিল যে–গোবিন্দা অলপ ‘বুৰ্বক’ ধৰণৰ, কিয়নো তেওঁৰ এই বয়সত এগৰাকী সুন্দৰ পত্নী আৰু সন্তান আছে। সুনীতাৰ মতে, যৌৱনকালত মানুহে ভুল কৰিব পাৰে, কিন্তু ৬৩ বছৰ বয়সত এনে কাম কৰা উচিত নহয়।
অৱশ্যে, গোবিন্দা আৰু কোমল ৰাণী স্বৰ্ণকাৰৰ মাজত কোনো ব্যক্তিগত বা ৰোমাণ্টিক সম্পৰ্ক আছে নে নাই, বিমানবন্দৰত একেলগে দেখা পোৱাটোৱেই তাৰ কোনো নিশ্চিত প্ৰমাণ নহয়।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
