শুকুৰবাৰে অভিনেতা আল্লু অৰ্জুনক গ্ৰেপ্তাৰ কৰিছে আৰক্ষীয়ে৷ পুষ্পা-২ৰ প্ৰিমিয়াৰলৈ আহি ভীৰৰ মাজত পদপিষ্ট হৈ মৃত্যু হৈছিল এগৰাকী মহিলাৰ৷ সেই ঘটনাৰ প্ৰেক্ষিতত আজি তেলেগু অভিনেতা আল্লুৰ ঘৰত উপস্থিত হয় আৰক্ষী৷ তেওঁক ঘৰৰ পৰা আৰক্ষীয়ে লৈ আনে হায়দৰাবাদৰ চিক্কাদপল্লী থানালৈ৷
কিন্তু সেইদিনা কি ভুল কৰিছিল আল্লু অৰ্জূনে? কি ভুলৰ বাবে থানাত আহিবলগা হৈছে আল্লু? মহিলাৰ মৃত্যুৰ সৈতে আল্লু গ্ৰেপ্তাৰৰ সংযোগ কি? একাধিক প্ৰশ্নৰ উত্তৰ বিচাৰি নেটিজেনে চাৰ্ছ কৰিছে গুগল৷ প্ৰকৃততে সেইদিনা পুষ্পা-২ৰ প্ৰিমিয়াৰ শ্ব’ আছিল৷ প্ৰিমিয়াৰ চাবলৈ হায়দৰাবাদত সেই সন্ধিয়া থিয়েটাৰত বিপুল ভিৰ হৈছিল৷ উপস্থিত আছিল খোদ ছবিৰ নায়ক আল্লু৷ তাৰকাক দেখাৰ আগ্ৰহতে দৰ্শ আৰু অনুৰাগীসকলে হেঁতাউপৰা লগাইছিল৷ ৩৯ বছৰ বয়সীয়া ৰেৱতীয়েও তেওঁৰ সন্তানক লৈ প্ৰিমিয়াৰ চাবলৈ আহিছিল৷ ভিৰত পদপিষ্টৰ দৰে পৰিস্থিতি হ’ল৷ ফলত সেই স্থানতেই উশাহবন্ধ হৈ মৃত্যু হয় ৰেৱতী নামৰ সেই মহিলাগৰাকীৰ৷ গুৰুতৰভাৱে অসুস্থ অৱস্থাত হাস্পতালত ভৰ্তি কৰোৱা হয় তেওঁলোকৰ ৮বছৰীয়া সন্তানক৷ ঘটনাটিত গুৰুতৰভাৱে আঘাতপ্ৰাপ্ত হৈছে কেইবাগৰাকীও লোক৷ ঘটনাস্থলত উপযুক্ত নিৰাপত্তাৰ গাফিলতিৰ অভিযোগ আনিছে মৃতকৰ পৰিয়ালে৷
ইয়াৰপাছতেই সংশ্লিষ্ট প্ৰেক্ষাগৃহ কৰ্তৃপক্ষ, আল্লু আৰু তেওঁৰ নিৰাপত্তাৰ দায়িত্বত থকা টিমৰ বিৰুদ্ধে একাধিক ধাৰাত গোচৰ ৰুজু কৰা হয়৷ সেই গোচৰৰ ভিত্তিতেই পুষ্পাৰ অভিনেতা আল্লুক গ্ৰেপ্তাৰ কৰা হৈছে৷ যদিও এই দুৰ্ঘটনাৰ পাছত শোকপ্ৰকাশ কৰি এটা ভিডিঅ’ বাৰ্তা দিছিল আল্লু অৰ্জুনেও৷ তেওঁ কৈছিল, ‘ঘটনাত মানসিকভাৱে ভাঙি পৰিছিলো৷ এই প্ৰতিক্ৰিয়া দিয়াত কিছু পলম হৈছে৷ স্থিতাবস্থাত উভতি আহিবলৈ মোৰো সময় লাগিছে৷ বিষয়টো মই এতিয়াও বিশ্বাস কৰিব পৰা নাই৷ যি ঘটিছে সেয়া জনাৰ পাছত নিজকে বুজাব পৰা নাই৷ অত্যন্ত মৰ্মাহত হৈ পৰিছো৷’ এই দুখবাৰ্তা শ্বেয়াৰ কৰিও কিন্তু শেষৰক্ষা নহ’ল আল্লু অৰ্জূনৰ৷ তেওঁৰ বিৰুদ্ধে BNS ১০৫ আৰু ১১৮ৰ গোচৰ ৰুজু হৈছে৷ শুকুৰবাৰে হায়দৰাবাদ আৰক্ষীয়ে গ্ৰেপ্তাৰ কৰিছে অভিনেতাজনক৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
