চিকিৎসকে আশা প্ৰায় এৰিয়েই দিছিল৷ হাস্পতাল কৰ্তৃপক্ষই আওঁপকীয়াকৈ চিকিৎসা নাই বুলিয়েই জনাইছিল৷ সেয়ে নিথৰ পত্নীক লৈ কান্দি কান্দি ঘৰলৈ উভতিছিল কুলদীপ শুল্ক৷ ঘৰত ফোন কৰি সকলোকে দুঃসংবাদো দিছিল৷ আনকি শেষকৃত্যৰো আয়োজন আৰম্ভ হৈ গৈছিল৷ কিন্তু বৰেলী-হৰিদ্বাৰৰ ৭৮ নং ৰাষ্ট্ৰীয় ঘাইপথত বাহন উঠোতেই মিৰাকল৷ জাগি উঠিল মৃত বুলি ঘৰলৈ উভতাই অনা পত্নী৷
৫০ বছৰ বয়সীয়া বিনীতা শুল্ক বৰেলীৰ হাস্পতালত ভৰ্তি হৈ আছিল৷ বিগত ২৪ ফেব্ৰুৱাৰীত চিকিৎসকে তেওঁৰ ব্ৰেইন ডেড’ ঘোষণা কৰিছিল৷ হৃদযন্ত্ৰই কাম কৰি আছিল যদিও ব্ৰেইন ডেড হোৱা মহিলাগৰাকীৰ অইন কোনো চিকিৎসা নাই বুলিয়েই জনাইছিল চিকিৎসকে৷ সেয়ে হাস্পতালৰ পৰা তেওঁলোকক ঘৰলৈ উভতাই দিয়া হৈছিল৷ এম্বুলেঞ্চেৰে ব্ৰেইন ডেড পত্নীক লৈ ঘৰলৈ উভতিছিল কুলদীপ৷ হঠাৎ ৰাষ্ট্ৰীয় ঘাইপথৰ ওপৰত থকা এটা গাঁতত সোমাই এম্বুলেঞ্চৰ চকা৷ গাঁতত সোমাই পাৰ হৈ যোৱা তীব্ৰবেগী এম্বুলেঞ্চত পত্নীৰ নিথৰ হৈ থকা শৰীৰৰ কাষত বহি যোৱা স্বামীয়ে লক্ষ্য কৰে যে পত্নীৰ শৰীৰে লৰচৰ কৰিবলৈ আৰম্ভ কৰিছে৷ আকৌ স্বাভাৱিক হ’ব ধৰিছে তেওঁৰ শ্বাসপ্ৰশ্বাস৷ আনকি চকুও মেলিছে৷
দ্বিতীয়বাৰ হাস্পতাললৈ লৈ যোৱাৰ পাছত যি চিকিৎসকে মহিলাক চাইছিল সেই চিকিৎসক ৰাকেশ সিংহই টাইমছ অফ ইণ্ডিয়াক জনাইছে যে বৰেলীৰ হাস্পতালত মহিলাৰ ব্ৰেইনষ্টেম ৰিফ্লেক্স নাছিল৷ গ্লাছগো ক’মাৰ মাত্ৰাও তিনি পয়েণ্টলৈ নামি গৈছিল৷ স্বাভাৱিক অৱস্থাত যি ১৫ পয়েণ্টত থাকে৷ ফলত মহিলাৰ ব্ৰেইনে কোনো ইংগিতেই দিয়া নাছিল৷ তেওঁৰ চকু পৰীক্ষা কৰিও মস্তিষ্কৰ মৃত্যুৰ ইংগিতেই পোৱা গৈছিল৷ তাৰপিছত এয়া কেনেকৈ হ’ল সেয়া সঁচাকৈয়ে অস্বাভাৱিক বুলি ধাৰণা কৰিছে চিকিৎসকেও৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
