‘‘স্বামী লাগিব নেকি? লাগিলে নিব পাৰিব৷ কিন্তু কোনোপধ্যেই সলনিযোগ্য নহয়৷ বিক্ৰী চূড়ান্ত৷’’
এইদৰে এক আমোদজনক বিজ্ঞাপনে চৰ্চা লাভ কৰিছে সংবাদ মাধ্যমৰ লগতে ইন্টাৰনেটৰ জগতত৷ এগৰাকী পত্নীয়ে নিজৰ স্বামীক নিলামৰ বাবে দিয়া এক বিজ্ঞাপনত এইদৰে প্ৰকাশ কৰি এইবাৰ সংবাদ মাধ্যমৰ চৰ্চালৈ আহিছে৷
কেৱল ইমানেই নহয়, মহিলাগৰাকীয়ে বিজ্ঞাপনটোত স্বামীৰ সম্পূৰ্ণ শাৰীৰিক আৰু পেচাগত বিৱৰণো দিছে৷ স্বামীৰ উচ্চতা, গাৰ বৰণ, বয়স, আৰু কি কাম কৰে আদি সকলো যাৱতীয় তথ্য ৱেবচাইটৰ বিজ্ঞাপনটোত দিছে মহিলাগৰাকীয়ে৷
ইয়াৰ পিছতে ইন্টাৰনেটৰ জগতত খলকনি তুলিছে এই বিজ্ঞাপনৰ প্ৰসংগই৷ আচলতে কিয় মহিলাগৰাকীয়ে এইদৰে নিজৰ স্বামীক নিলাম কৰাৰ বিজ্ঞাপন প্ৰকাশ কৰিলে?
আচলতে এটা সামান্য কাৰণত স্বামী আৰু পত্নীৰ মাজত এক বিবাদ আৰম্ভ হৈছিল৷ প্ৰকাশিত খবৰ অনুসৰি আয়াৰলেণ্ডৰ লিণ্ডা মেকয়ালিষ্টটাৰ নামৰ মহিলাগৰাকীয়ে গ্ৰীষ্ম বন্ধত ভ্ৰমণলৈ নিবলৈ স্বামীক কুটুৰি আছিল৷ কিন্তু জন মেকয়ালিষ্টাৰ নামৰ স্বামীগৰাকীয়ে দুই সন্তান আৰু পত্নীক এৰি অকলে গ্ৰীষ্ম বন্ধ উদযাপন কৰিবলৈ ঘৰৰ পৰা ওলাই যায়৷
এই কথাতে ক্ষুণ্ণ হৈ পত্নীয়ে এটা ৱেবচাইটত স্বামীক নিলাম কৰা হ’ব বুলি বিজ্ঞাপন প্ৰকাশ কৰে৷ বিজ্ঞাপনটো প্ৰকাশ কৰাৰ মাত্ৰকে ১২ গৰাকী গ্ৰাহকে স্বামীগৰাকীৰ বিৰুদ্ধে দৰ দাম কৰিবলৈ আৰম্ভ কৰে৷ মাত্ৰ কেইটামান ঘণ্টাৰ ভিতৰতে স্বামীৰ নিলামৰ দৰ পাঁচ হাজাৰ টকা অতিক্ৰম কৰে৷
বন্ধুৰ পৰা স্বামীগৰাকীয়ে তেওঁক পত্নীয়ে নিলাম কৰাৰ কথা জানিব পাৰে৷ ইয়াৰ পিছতে বিজ্ঞাপনটো ৱেবচাইটটোৰ পৰা আঁতৰাই দিয়া হৈছে৷
এই ঘটনাৰ পিছত এনেদৰে কোনো মহিলাই নিজৰ স্বামীক নিলাম কৰাৰ বিজ্ঞাপন প্ৰথমবাৰলৈ দেখা পোৱা বুলি মন্তব্য কৰিছে ৱেবচাইট পলিচি আৰু কমপ্লায়েন্স মেনেজাৰ জেমছ ৰায়ানে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
