টকিঅ’ অলিম্পিকত ব্ৰঞ্জ লাভ কৰিছিল৷ তাৰপাছতেই বিশ্ব চেম্পিয়নশ্বিপ, এছিয়ান চেম্পিয়নশ্বিপতো সাফল্য লাভ কৰিছে৷ এইবাৰ পেৰিছ অলিম্পিকত সোণ জয়ৰ লক্ষ্য ভাৰতৰ অন্যতম তথা অসম কন্যা বক্সাৰ লাভলীনা বৰগোঁহাইৰ৷ অলিম্পিকৰ প্ৰস্তুতি সম্পৰ্কে পূৰ্বেই জনাইছে লাভলীনাই৷
প্ৰস্তুতি সন্দৰ্ভত লাভলীনাই এক সাক্ষাৎকাৰত কৈছিল, ‘অলিম্পিক আগুৱাই আহিছে৷ এতিয়া প্ৰতিদিনেই অনুশীলন চলিছে৷ অনুশীলনেই প্রধান কথা৷ লক্ষ্য স্থিৰ কৰা আৰু সেই লক্ষ্যপূৰণৰ বাবে চেষ্টা কৰি যোৱাটোৱেই মোৰ কাম৷ এক নিৰ্দিষ্ট পৰিকল্পনা আগত ৰাখি অনুশীলন চলাই গৈছো৷ প্ৰতিদিনৰ অনুশীলনত মোৰ লক্ষ্য এটাই৷ সেয়া হৈছে সোণ৷ সোণৰ পদক যাতে আনিব পাৰো তাৰ বাবেই যিমান পাৰো নিজৰ সকলোখিনি দি চেষ্টা কৰিছো৷’ ভাৰতীয় ক্ৰীড়াপ্ৰেমীৰ আশা, লাভলীনাৰ লক্ষ্য পূৰণ হ’ব৷
লাভলীনাই উঠি অহা প্ৰজন্মক পৰামৰ্শ দি কৈছিল, সাফল্য পাবলৈ হ’লে শৃংখলা, নিৰ্দিষ্ট লক্ষ্য স্থিৰ থকা আৰু আত্মত্যাগ জৰুৰী৷ এই যাত্ৰাপথত বহু চেলেঞ্জ আছে৷ কেতিয়াবা আঘাতো বাধা হৈ পৰে৷ বাধা বিপত্তি থকা সত্ত্বেও নিৰ্দিষ্ট লক্ষ্যৰ দিশে আগুৱাই যোৱাটোৱেই এজন খেলুৱৈৰ প্ৰধান কথা৷ সকলো বাধা অতিক্ৰম কৰিলেহে চেম্পিয়ন হ’ব পাৰিব৷ বিভাগ সলনি কৰি পেৰিছত যুঁজত নামিবলৈ সাঁজু হৈছে লাভলীনা৷ ৩১ জুলাইত অৰ্থাৎ আজি আবেলি খেলত নামিব লাভলীনা৷ পূৰ্বে লাভলীনাই ৬৯ কেজি শাখাত খেলিছিল৷ এইবাৰ তেওঁ ৭৫ কেজি শাখাত খেলিব৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
