আজিৰে পৰা টীম ইণ্ডিয়াৰ T20 সংস্কৰণৰ এক নতুন যুগ আৰম্ভণি হ’ব। T20 বিশ্বকাপৰ পিছত এয়া টীম ইণ্ডিয়াৰ প্ৰথমটো T20 আন্তঃৰাষ্ট্ৰীয় শৃংখলা য’ত প্ৰথমবাৰৰ বাবে সূৰ্যকুমাৰ যাদৱৰ স্থানত পূৰ্ণাংগ অধিনায়কৰ দায়িত্ব ল’ব শ্ৰেয়াছ আয়াৰে। টীম ইণ্ডিয়াৰ নিৰ্বাচক মণ্ডলীয়ে দলটোৰ সহ অধিনায়কৰ দায়িত্ব অৰ্পণ কৰিছে আন এজন যুৱ ক্ৰিকেটাৰ তিলক বৰ্মাক। ইয়াৰ উপৰিও টীম ইণ্ডিয়াৰ ১৫জনীয়া দলটোৰ T20 সংস্কৰণৰ পোছাক প্ৰথমবাৰৰ বাবে পিন্ধিব আন দুজন যুৱ ক্ৰিকেটাৰে। সেয়া হৈছে শ্ৰুয়াংশ শ্ৰেগ্ৰে আৰু প্ৰিন্স যাদৱে। বিগত IPLত আগবঢ়োৱা প্ৰশংসনীয় প্ৰদৰ্শনৰ বাবে এই দুজন ক্ৰিকেটাৰে নিৰ্বাচকৰ পৰা লাভ কৰিছে আমন্ত্ৰণ। কিন্তু শৃংখলাটোৰ মুখ্য আকৰ্ষণ হ’ব ১৫ বছৰীয়া বৈভৱ সূৰ্যবংশী। কেৱল অনুৰাগীয়েই নহয়, প্ৰাক্তন ক্ৰিকেটাৰ, ক্ৰিকেট বিশেষজ্ঞৰ লগতে ব্ৰডকাষ্টাৰৰ দৃষ্টি নিবদ্ধ থাকিব একমাত্ৰ বৈভৱ সূৰ্যবংশীৰ ওপৰত। আয়াৰলেণ্ডৰ বিৰুদ্ধে দুখন মেচৰ শৃংখলটোৰ দ্বিতীয় তথা অন্তিমখন মেচো বেলফেষ্টৰ ষ্টৰমণ্ট ষ্টেডিয়ামতেই দেওবাৰে অনুষ্ঠিত হ’ব। শৃংখলাৰ এই দুয়োখন মেচৰ যিকোনো এখনৰে প্লেয়িং ইলিভেনত বৈভৱে স্থান লাভ কৰিলেই শচীন তেণ্ডুলকাৰৰ ভাৰতৰ কনিষ্ঠ ক্ৰিকেটাৰ হিচাপে টীম ইণ্ডিয়াৰ ছিনিয়ৰ দলটোত অভিষেক ঘটোৱা ৰেকৰ্ডটো ভংগ কৰিবলৈ সক্ষম হ’ব। শচীন তেণ্ডুলকাৰে নিজৰ ১৬ বছৰ ২০৫ দিন বয়সত আন্তঃৰাষ্ট্ৰীয় ক্ৰিকেটত অভিষেক ঘটাইছিল। পাকিস্তানৰ বিৰুদ্ধে ১৯৮৯ৰ ১৫ নৱেম্বৰত টেষ্ট অভিষেক ঘটাইছিল তেণ্ডুলকাৰে। আজি বৈভৱ সূৰ্যবংশীয়ে ভৰি দিছে ১৫ বছৰ ৯১ দিনত।
আন্তঃৰাষ্ট্ৰীয় ক্ৰিকেটত অভিষেক ঘটোৱা কনিষ্ঠ ক্ৰিকেটাৰ নহয় বৈভৱ
আজি ১৫ বছৰ ৯১ দিনত আন্তঃৰাষ্ট্ৰীয় ছিনিয়ৰ ক্ৰিকেটত অভিষেক ঘটালেও কণিষ্ঠ ক্ৰিকেটাৰৰ ৰেকৰ্ডৰ গৰাকী নহ’ব বৈভৱ সূৰ্যবংশী। বৈভৱতকৈও কম বয়সতে আন্তঃৰাষ্ট্ৰীয় ছিনিয়ৰ ক্ৰিকেটত অভিষেক ঘটাইছিল ৰোমানিয়াৰ এজন ক্ৰিকেটাৰে। ৰোমানিয়াৰ মাৰিয়ান ঘেৰাছিম নামৰ পেচাৰজনে ২০২০ৰ ১৬ অক্টোবৰত বুলগেৰিয়াৰ বিৰুদ্ধে নিজৰ ১৪ বছৰ ১৬ দিন বয়সত আন্তঃৰাষ্ট্ৰীয় ক্ৰিকেটত অভিষেক ঘটাইছিল।
ইপিনে ICCৰ পূৰ্ণাংগ সদস্যৰ দেশসমূহৰ ভিতৰত কনিষ্ঠ ক্ৰিকেটাৰ হিচাপে আন্তঃৰাষ্ট্ৰীয় ক্ৰিকেটত অভিষেক ঘটোৱা ৰেকৰ্ডৰ গৰাকী হৈছে পাকিস্তানৰ বেটাৰ হাছান ৰাজা। হাছান ৰাজাই নিজৰ ১৪ বছৰ ২৩৩ দিন বয়সত ১৯৯৬ চনৰ ২৪ অক্টোবৰত জিম্বাবুৱেৰ বিৰুদ্ধে টেষ্টত অভিষেক ঘটাইছিল। ইয়াৰ ঠিক ৬ দিন পিছতেই জিম্বাবুৱেৰ বিৰুদ্ধেই হাছান ৰাজাই এদিনীয়া আন্তঃৰাষ্ট্ৰীয় ক্ৰিকেটতো অভিষেক ঘটাইছিল।
অৱশ্যে আজি বৈভৱ সূৰ্যবংশীয়ে আন্তঃৰাষ্ট্ৰীয় ছিনিয়ৰ ক্ৰিকেটত অভিষেক ঘটালে T20Iত অভিষেক ঘটোৱা ICCৰ পূৰ্ণাংগ সদস্যৰ দেশসমূহৰ ভিতৰত কনিষ্ঠ ক্ৰিকেটাৰ হিচাপে পৰিগণত হ’ব। সম্প্ৰতি এই ৰেকৰ্ডৰ গৰাকী হৈছে আয়াৰলেণ্ডৰ পেচাৰ জচুৱা লিটিল। লিটিলে ১৬ বছৰ ৩০৯ দিন বয়সত ২০১৬চনৰ ৫ ছেপ্টেম্বৰত হংকঙৰ বিৰুদ্ধে T20Iত অভিষেক ঘটাইছিল। জছুৱা লিটিলে IPLৰ বিগত ছিজনবোৰত গুজৰাট টাইটানছৰ হৈও উজ্জীৱিত প্ৰদৰ্শন আগবঢ়াবলৈ সক্ষম হৈছিল।
আন্তঃৰাষ্ট্ৰীয় ক্ৰিকেটত অভিষেক ঘটোৱা কনিষ্ঠ ক্ৰিকেটাৰ হিচাপে নিজৰ নাম সন্নিৱিষ্ট কৰিব নোৱাৰিলেও বৈভৱ সূৰ্যবংশীৰ প্ৰদৰ্শনৰ ফলতে ইতিমধ্যে ক্ৰিকেট বিশ্বত সবাটোকৈ চৰ্চিত নামত পৰিণত হৈছে। ক্ৰিকেটৰ অনুৰাগীসকলৰ উপৰিও সাধাৰণ লোকৰ মাজতো এতিয়া বৈভৱ সূৰ্যবংশীয়ে জনপ্ৰিয়তা লাভ কৰিবলৈ সক্ষম হৈছে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
