অসম লাইভ২৪ঃ গুৱাহাটীৰ চিকিৎসক দম্পতীৰ শিশু নিৰ্যাতনক লৈ ৰাজ্যজুৰি তীব্ৰ প্ৰতিক্ৰিয়া। শুকুৰবাৰে ডাঃ সংগীতা দত্ত আৰু তেওঁৰ স্বামী ডাঃ ৱালিউল ৰহমানক লৈ উত্থাপিত হৈছে শিশু নিৰ্যাতনৰ অভিযোগ। আৰক্ষীয়ে শুকুৰবাৰে নিশাই গ্ৰেপ্তাৰ কৰিছে চিকিৎসক ৱালিউল ৰহমানক। ইপিনে তোলনীয়া কণমানিজনীক উদ্ধাৰ কৰি স্বাস্থ্য পৰীক্ষাও কৰোৱা হৈছে। স্বাস্থ্য পৰীক্ষাৰ অন্তত GMCHৰ অধীক্ষক ডাঃ অভিজিত শৰ্মাই কয়, ‘বৰ্তমান তিনি বছৰীয়া কণমানিজনী সুস্থ। সকলো বিলাক পৰীক্ষা কৰা হৈছে কণমানিগৰাকীৰ। আঘাতৰ চিন পোৱা গৈছে। কিন্তু বৰ্তমান সম্পূৰ্ণ সুস্থ।’ ইপিনে আশ্ৰয়গৃহৰ এগৰাকী লোকে কয়, ‘কণমানিজনীৰ শৰীৰত আঘাতৰ চিন আছে। গোপন অংগতো জ্বলাই দিয়া চিন পোৱা গৈছে। বৰ্বৰভাৱেই এই দম্পতিহালে শিশুটিক অত্যাচাৰ কৰিছিল।’
ইফালে, বনকৰা মহিলাগৰাকীয়ে থানাৰ পৰা চি জে এম আদালতলৈ নিয়াৰ সময়ত কয়, ‘মই একো কৰা নাই। সংগীতাই কৈছে বাবেহে মই কৰিছিলো।’ আনহাতে, ডাঃ ৱালিউৰ ৰহমানক পল্টন বজাৰ থানাৰ পৰা চিকিৎসালয়লৈ নিয়া হয়। তাৰ পিছতে আদালতত হাজিৰ কৰোৱা হয়। এতিয়াও পলাতক হৈ আছে ডাঃ সংগীতা দত্ত। এডিচিপি চেন্ট্রেল নন্দিনী কাকতিয়ে কয়, ‘কেইবাটাও টীম বনাই মহানগৰ আৰক্ষীয়ে সংগীতা দত্তক বিচাৰি আছে। ৩ বছৰীয়া কণমানিগৰাকীৰ দেহত বহুতো গুৰুতৰ আঘাত চিন পোৱা গৈছে। পূৰণি আঘাতো পোৱা গৈছে কণমানিগৰাকীৰ দেহত। সকলো পৰীক্ষা কৰা হৈছে কণমানিগৰাকীৰ।’
উল্লেখ্য যে, সংগীতা দত্তৰ স্বামী ডাঃ ৱালিউল ৰহমানক ৫ দিনৰ আৰক্ষীয়ে জিম্মাত লোৱাৰ বিপৰীতে বনকৰা মহিলা লক্ষী ৰয়ক ৭ দিনৰ বাবে আৰক্ষীৰ জিম্মাত লৈছে। ইফালে পলাতক ডাঃ সংগীতা দত্তক বিচাৰি অভিযান আৰম্ভ কৰিছে মহানগৰ আৰক্ষীয়ে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
