অসম লাইভ ২৪ঃ দেওবাৰে এক আচম্বিত খবৰে জোকাৰণি তুলিছিল ৰাজ্যৰ ৰাজনীতিত। সততে সৰৱ। সততে বিতৰ্কিত ভাষ্যৰে সংবাদ শিৰোনাম দখল কৰি অহা হোজাইৰ বিধায়ক শিলাদিত্য দেৱে বিজেপি দল ত্যাগৰ খবৰে চাঞ্চল্যকৰ সৃষ্টি কৰিছিল। সংবাদ মাধ্যমত বিশেষকৈ টিভি আৰু ৱেব মিডিয়াৰ বিগ ব্ৰেকিং হৈ পৰিছিল এই খবৰ। বিগ ব্ৰেকিঙৰ ক্ষন্তেক পাছতে লংকাৰ জোৰাপুখুৰীৰ নিজ বাসগৃহত এক সংবাদমেল আয়োজন কৰে বিধায়কজনে। সংবাদমেলত শিলাদিত্য দেৱে নিজ দলৰ একাংশ শীৰ্ষ নেতাৰ বিৰুদ্ধে ক্ষোভ উজাৰে। ডেৰ কুৰি বছৰ ভাৰতীয় জনতা পাৰ্টীৰ এজন নিষ্ঠাবান কৰ্মীৰূপে সংবাদমেল সম্বোধন কৰে বিধায়কজনে। পুৰণি দিনৰ স্মৃতি স্মৰণ কৰি বৰ্তমান আৰু অতীতৰ বিজেপি দলৰ মাজত বৃহৎ তফাৎ অহা বুলি মন্তব্য কৰি স্পষ্ট কৰি দিয়ে যে তেওঁ কোনো পদবীৰ প্ৰতি লালায়িত নহয়। ‘মন্ত্ৰিত্ব নোপোৱাৰ কাৰণে শিলাদিত্যই বিদ্ৰোহ কৰিছে নেকি?’ সাংবাদিকে কৰা এই প্ৰশ্নৰ উত্তৰত পুনৰ স্পষ্ট কৰি দিয়ে যে তেওঁ মন্ত্ৰিত্বৰ প্ৰতি আগ্ৰহী নহয়। কিন্তু দলত তেওঁক পদে পদে অপমান কৰাৰ অভিযোগ আনে। এইক্ষেত্ৰত ৰাজ্যিক বিজেপিৰ এগৰাকী বিশেষ নেতাক টাৰ্গেট কৰি লোৱা দেখা গ’ল শিলাদিত্য দেৱক। ‘মোনা লোৱা’ এজন নেতাৰ বিৰুদ্ধে ভয়ংকৰ অভিযোগ উত্থাপন কৰে। এই ‘মোনা লোৱা’ নেতাজনৰ বাবেই অনাগত দিনত দলৰ বহুত ক্ষতি হ’ব বুলি দলৰ অন্য নেতা-কৰ্মীসকলক একপ্ৰকাৰৰ সতৰ্কবাণী প্ৰেৰণ কৰে হোজাইৰ বিধায়কজনে। ১৪ জুলাইত ভাৰতীয় জনতা পাৰ্টীৰ পৰা অৱসৰ ল’ব বুলিও একেখন সংবাদমেলত ঘোষণা কৰে বহুবল্কী শিলাদিত্যই।
কোন এই ‘মোনা লোৱা’ নেতা?
দেওবাৰৰ সংবাদমেলেই নহয়, ইয়াৰ পূৰ্বেও ‘মোনা লোৱা’ নেতাজনৰ বিৰুদ্ধে সৰৱ হৈছিল শিলাদিত্য। মুখ্যমন্ত্ৰী সোণোৱাল, ৰাজ্যিক বিজেপিৰ সভাপতি ৰঞ্জিত দাসকে ধৰি একাংশ বিয়াগোম নেতাক অভিযোগো দিছিল। ৰাজ্যত চলি থকা অসংখ্য ছিণ্ডিকেটৰ নায়কৰূপে অভিহিত কৰি ‘মোনা লোৱা’ নেতাজনৰো এনে কু-কৰ্ম শিলাদিত্যৰ অভিযোগপত্ৰত সন্নিৱিষ্ট হৈছিল। পিছে, মেকুৰীৰ ডিঙিত টিলিঙা আঁৰিব কোনে? অভিযোগপত্ৰ দিয়াৰ পাছত দলৰ প্ৰাপ্য সন্মানৰ পৰা বঞ্চিত হ’বলগীয়া হ’ল বিধায়কজন। আনকি বিজেপি ত্যাগৰ পত্ৰখনো ৰাজ্যিক সভাপতিলৈ হোৱাট্ছএপতহে প্ৰেৰণ কৰিবলগীয়া হ’ল। ৰঞ্জিত দাসে ফোনেই নুঠায়। শিলাদিত্যই কোৱাৰ দৰে ‘মোনা লোৱা’ নেতাজন সঁচাকৈয়ে শক্তিশালী নেকি? যাৰ বাবে এজন দলীয় বিধায়কৰ ফোন উঠাবলৈ অপাৰগ হ’ল ৰঞ্জিত দাস। এতিয়া অকল হেঙেৰাবাৰীতে নহয়, ৰাজ্যৰ চুকে-কোণে উৎসুকতা বাঢ়িছে এই ‘মোনা লোৱা’ বিজেপি নেতাজন কোন? সকলোৱে জানে। পিছে, কোনেও মুখ খুলি নকয় ‘মোনা লোৱা’ নেতাৰ নাম। অসম লাইভ ২৪-এ অনুসন্ধান কৰিছিল হেঙেৰাবাৰীৰ ‘মোনা লোৱা’ নেতাজনৰ। কাষ চাপিছিল বিজেপিৰ প্ৰাক্তন বিদ্ৰোহী নেতা ৰামপ্ৰসাদ শৰ্মাৰ। শৰ্মায়ো স্পষ্টকৈ নক’লে যদিও আওপকীয়াকৈ ফণীন্দ্ৰ শৰ্মাৰেই নাম ল’লে। শিলাদিত্যই ইংগিতকৰা ‘মোনা লোৱা’ নেতাজন ফণীন্দ্ৰ শৰ্মাই হয় বুলি ইতিমধ্যে চৰ্চা আনত বাদ দিলেও খোদ বিজেপি কৰ্মী-নেতাৰ মাজতে চৰ্চিত হৈছে। কিয়নো অসম বিজেপিৰ এজন অখণ্ড প্ৰতাপী নেতা হ’ল ফণীন্দ্ৰ শৰ্মা।
পদত্যাগপত্ৰ গ্ৰহণ নকৰে বিজেপিয়ে
আমাৰ হাতত পৰা শেহতীয়া খবৰ মতে শিলাদিত্য দেৱৰ আচম্বিত পদত্যাগ ঘোষণাই ক্ষুণ্ণ কৰি তুলিছে গেৰুৱা দলৰ তৃণমূল পৰ্যায়ৰ কৰ্মীসকলক। এনে ক্ষোভে যাতে ভূমিকম্পৰ ৰূপ নলয় তাৰ বাবে তৎপৰ হৈ উঠে ৰাজ্যিক বিজেপিৰ নেতৃবৃন্দ। মুখ্যমন্ত্ৰীৰ হস্তক্ষেপত ইতিমধ্যে বুজাই-পৰাই পুনৰ দললৈ শিলাদিত্য দেৱক ওভতাই অনাৰ যৎপৰোনাস্তি চেষ্টা চলিছে। ক্ষোভ-অসন্তুষ্টি মৰিষণৰ বাবে ৰাজ্যিক নেতৃত্বই সঘনে যোগাযোগ স্থাপন কৰিছে বিধায়কজনৰে। শিলাদিত্য দেৱৰ ঘনিষ্ঠ সূত্ৰই জানিব দিয়া মতে ক্ষোভে শাম কাটিছে বিধায়কগৰাকীৰ। সেয়ে দুই-এদিনতে হয়তো পদত্যাগপত্ৰ উঠাই ল’ব হোজাইৰ বিদ্ৰোহী নেতাজনে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
