অসম লাইভ২৪ঃ আজি মানুহ বিহু। অসমীয়াৰ বাপতি সাহোন বিহুৰ ভিতৰত ৰঙালী বিহু অন্যতম। ৰঙালী বিহুৰ দ্বিতীয় দিনটোত মানুহ বিহু উদযাপন কৰা হয়।
অতীজৰে পৰাই অসমীয়া চহা সমাজত গো-ধনৰ স্থান উৰ্ধত সেয়ে বিহুৰ প্ৰথম দিনটোতেই গৰু বিহু উদযাপন কৰা হয়। কৃষিভিত্তিক সমাজখনত কেৱল হাল বাবলৈয়ে নহয় বৰং আন ক্ষেত্ৰসমূহতো গো-ধনৰ ব্যৱহাৰ হয়। সেয়ে মানুহ বিহুৰো পূৰ্বে উদযাপন কৰা হয় গৰু বিহুৰ।
ৰঙালী বিহুৰ দ্বিতীয় দিনা উদযাপন কৰা মানুহ বিহুত ৰাতিপুৱা গা-পা ধুই কনিষ্ঠজনে জ্যেষ্ঠজনৰ আশীৰ্বাদ লোৱাৰ প্ৰথা প্ৰচলিত। অসমীয়া বছৰটোৰ প্ৰথমটো দিনত পৰিয়ালৰ জ্যেষ্ঠজনে সমগ্ৰ বছৰটো কুশলে পাৰ হ’বলৈ আশীৰ্বাদ দিয়াৰ লগতে সেইদিনাই আপোনজনে বিহুৱান দি চেনেহ যাচে। ইয়াৰ সৈতে অসমীয়া বছৰটোৰ প্ৰথমটো দিনত ৰাতিপুৱাৰ জলপান পৰিয়ালৰ সকলোৱে একেলগে খাই। আবেলিৰ ভাগত ডেকা-গাভৰু, কিশোৰ-কিশোৰীসকল বিহু মাৰিবলৈ অথবা মূলতঃ হুচৰি গাবলৈ যায়।বৰ্তমান আধুনিকতাৰ হাতত ধৰি বহু প্ৰথা হেৰাই গৈছে যদিও নগৰ হওক অথবা চহৰ হওক, বিহু অসমীয়াৰ প্ৰাণৰো প্ৰাণ।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
