অসম লাইভ২৪ঃ সকলোকে লজ্জানত কৰা যোৰহাট কাণ্ডৰ নতুন মোৰ৷ কেৱল মনোৰঞ্জনৰ কাৰণেই এই ঘটনা সংঘটিত হৈছে বুলি যোৰহাট আৰক্ষীয়ে সমগ্ৰ ঘটনা গাপ দিবৰ চেষ্টা কৰিছে নেকি বুলিও অভিযোগ উত্থাপিত কৰিছে একাংশই৷
কেৱল মনোৰঞ্জনৰ বাবেই এই ঘটনা সংঘটিত হৈছে বুলি মানি লব পৰা নাই স্থানীয় ৰাইজে৷ স্থানীয় ৰাইজে পুলিবৰ আৰক্ষী থানাত দিয়া এজাহাৰৰ কপি ইতিমধ্যে ভাইৰেল হৈ পৰিছে৷ সমগ্ৰ ৰাজ্য কঁপাই যোৱা যোৰহাটৰ ভিডিঅ’ কাণ্ডৰ তিনিজন অভিযুক্তক ইতিমধ্যে যোৰহাট আদালতে ন্যায়িক জিম্মালৈ প্ৰেৰণ কৰিছে৷
উল্লেখযোগ্য যে, বিগত ৫ মে ২০২৩ তাৰিখে যোৰহাটৰ এখন স্থানীয় থানাত স্থানীয় ৰাইজ আৰু ভুক্তভোগী পৰিয়ালে এখন এজাহাৰ দিছিল য’ত যুৱতীগৰাকীৰ লগতে তেওঁৰ সমন্ধীয় ভিনিহীয়েক পলাশ প্ৰতীম শৰ্মাৰ নামো উক্ত কাণ্ডৰ লগত জড়িত বুলি স্পষ্টকৈ উল্লেখ আছে৷
স্থানীয় ৰাইজে এই ভিডিঅ’ কাণ্ডৰ মূল নায়ক হিচাপে যুৱতীগৰাকীৰ ভিনীয়েককেই চিহ্নিত কৰিছে৷ তাৰ পাছতো যোৰহাট আৰক্ষীৰ তদন্তৰ আওতালৈ বি৷য়টো অহা দুৰৰে কথা, সাধাৰণ সোধপোছৰ বাবেও যোৰহাট আৰক্ষীয়ে মাতিবলৈ সাহস নকৰাটো অতি ৰহস্যজনক বুলিও জনাইছে স্থানীয় ৰাইজে৷ পলাশ শৰ্মা নামৰ যুৱকজন প্ৰায় দুই বছৰ মানৰ আগলৈকে সাধাৰণ নিবনুৱা হিচাপেই আছিল৷ কিন্তু হঠাতেই পলাশ শৰ্মাই এনে কি আলাউদ্দিনৰ চাকি পালে যে অতি কম সময়ৰ ভিতৰতে অগাধ ধন সম্পত্তিৰ মালিক হ’ল বুলি সাধাৰণ ৰাইজে অভিযোগ কৰিছে৷
যোৰহাট আৰক্ষীয়ে উক্ত ঘটনাটো সঠিক দিশত সূক্ষ্মভাৱে তদন্ত কৰিলে ভিডিঅ’ নিৰ্মাণ কৰি সহজেই ধন ঘটাৰ পথ মুকলি কৰি দিয়া আৰু নতুন প্ৰজন্মৰ কম বয়সীয়া ছাত্ৰ ছাত্ৰীক লক্ষ্য কৰি লোৱা এক বৃহৎ চক্ৰ উৎখাত কৰিব পাৰিলে হেতেন বুলিও অভিযোগ আনিছে৷ কিন্তু কি ৰহস্যজনক কাৰণত যোৰহাট আৰক্ষীয়ে কেৱল মনোৰঞ্জনৰ বাবেই এই ঘটনা সংঘটিত হোৱা বুলি কৈ কোনো শক্তিশালী লবীৰ ওচৰত সেও মনিছে নেকি বুলিও ৰাইজে প্ৰশ্ন উত্থাপন কৰিছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
