ডিজিটেল ডেস্কঃ বহু বাধা-বিঘিনিৰ সত্ত্বেও উত্তৰ-পূবত ৰাহুল গান্ধীৰ ভাৰত জোড়ো ন্যায় যাত্ৰাই জনতাৰ যথেষ্ট সহাঁৰি বুটলিবলৈ সক্ষম হৈছে। বহু স্থানত ৰাহুল গান্ধীয়ে প্ৰৱেশ বা জনসভা অনুষ্ঠিত কৰিবৰ বাবে অনুমতি লাভ নকৰিলেও যতেই সুবিধা পাইছে, তাতেই জনসভা সম্বোধন কৰিছে কংগ্ৰেছৰ যুৱৰাজগৰাকীয়ে।
মঙলবাৰে ৰাহুল গান্ধীয়ে মেঘালয়ৰ পৰা অসমলৈ প্ৰৱেশ কৰাৰ পথত কেইবাস্থানটো পথতেই জনসভা সম্বোধন কৰি চৰকাৰৰ বিৰুদ্ধে অধিক কঠোৰ হোৱা দেখা গ’ল। কেন্দ্ৰীয় গৃহমন্ত্ৰী, প্ৰধানমন্ত্ৰীৰ লগতে অসমৰ মুখ্যমন্ত্ৰীয়ে তেওঁক জনতাৰ কাষলৈ যাব নোৱাৰাকৈ কুটিল ষড়যন্ত্ৰ কৰিছে বুলি অভিযোগ উত্থাপন কৰে ৰাহুল গান্ধীয়ে।
ৰাহুল গান্ধীয়ে কয় যে, মই মৰম বিলাবলৈ আহিছো। তাতো ইমান ভয় কৰিবলৈ কি আছে! ভয় মোৰ তেজত নাই, গতিকে কোনোবাই যিমান ষড়যন্ত্ৰ কৰিলেও আমি ভয় নকৰো। মৰমেৰে সকলোৰে সৈতে যুঁজি যাম। আমাৰ এই মৰমৰ দুৱাৰ সকলোৰে বাবে খোলা আছে। মোৰ বিশ্বাস এই মৰমৰে এদিন সকলোৰে মন জয় কৰিবলৈ সক্ষম হম।”
উল্লেখ্য যে, মঙলবাৰে USTMত প্ৰৱেশত বাধা প্ৰদান কৰাৰ পাছতো ৰাহুল গান্ধীয়ে পথৰ কাষতেই এখন জনসভা সম্বোধন কৰি চৰকাৰক তীব্ৰ কটাক্ষ কৰা দেখা গৈছিল। অমিত শ্বাহে ফোন কৰি হিমন্ত বিশ্ব শৰ্মাক হেঁচা প্ৰদান কৰি আছে বুলিও অভিযোগ উত্থাপন কৰি ক্ষোভ উজাৰিছিল ৰাহুল গান্ধীয়ে।
মঙলবাৰৰ ৰাহুল গান্ধীৰ ন্যায় যাত্ৰা খানাপাৰা পৰা ৰাষ্ট্ৰীয় ঘাইপথেৰে গতি কৰিব। এই সময়চোৱাত প্ৰদেশ কংগ্ৰেছৰ সভাপতি ভূপেন বৰাৰ লগতে বহুকেইখন ৰাজ্যিক শীৰ্ষ পৰ্যায়ৰ কংগ্ৰেছ নেতাই সহযোগ কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
