অসম লাইভ২৪ঃ ৯ মাৰ্চত আহিছিল সেই দুখবৰটো। ৭ আৰু ৮ মাৰ্চত হোলীৰ ৰঙো বেৰঙী হৈ পৰিছিল কৌশিক পৰিয়ালত। সকলোৰে মাজৰ পৰা হঠাতেই বিদায় মাগিছিল অভিনেতা সতীশ কৌশিকে। হৃদৰোগত আক্ৰান্ত হৈ মৃত্যুৰ শীতল কোলাত ঢলি পৰিছিল অভিনেতাগৰাকী। তেওঁৰ মৃত্যুৰ এই খবৰক লৈ আৰম্ভ হৈছিল বিতৰ্কও। একাংশই দাবী কৰিছিল এই মৃত্যু স্বাভাৱিক নহয়। তেওঁক হত্যা কৰা হৈছে! সতীশ কৌশিকৰ বন্ধু তথা ব্যৱসায়ী বিকাশ মালুক বহুতেই অভিযুক্ত সজোৱাৰ মাজতেই অৱশেষত এই মৃত্যুক লৈ মুখ খুলিছে ব্যৱসায়ী বিকাশে। ইনষ্টাগ্ৰামত হোলি পাৰ্টীৰ ভিডিঅ’ পোষ্ট কৰিছে বিকাশ মালুৱে। ব্যৱসায়ী বিকাশ মালুৱে শ্বেয়াৰ কৰা ভিডিঅ’ত বিকাশ মালুৰ সৈতে একেলগে নাচি থকা দেখা গৈছে সতীশ কৌশিকক।
ৰঙেৰে ৰঙীন হৈ থকা সতীশৰ জীৱনৰ এয়াই শেষ হোলি কোনেনো ভাৱিছিল? বিকাশ মালুৱে বিশেষ ভিডিঅ’টো শ্বেয়াৰ কৰি কেপশ্ব্যনত লিখিছে, ‘মোৰ আৰু সতীশৰ বন্ধুত্ব প্ৰায় ৩০ বছৰ পুৰণি। আমি পাৰিবাৰিক বন্ধু। কম সময়তে মানুহে মোক সতীশৰ মৃত্যুৰ বাবে জগৰীয়া কৰিছে। হোলিৰ বিশেষ দুটা দিন আনন্দৰে পাৰ হোৱাৰ পাছতেই এই দুঃখবৰটো আহিল। এই দুৰ্ঘটনা খুবেই বেদনাদায়ক হৈ পৰিছে মোৰবাবেও।’ লগতে বিকাশ মালুৱে তেওঁৰ ওপৰত অহা অভিযোগ নস্যাৎ কৰি কয়, ‘মোৰ বিৰুদ্ধে বহু মিছা প্ৰচাৰ চলি আছে। দুৰ্ঘটনা কাকো সুধি নাহে। দুৰ্ঘটনাত কাৰো নিয়ন্ত্ৰণো নাথাকে। মই এটাই অনুৰোধ জনাম যে আপোনালোকও প্ৰত্যেকেই প্ৰত্যেকৰ আৱেগ অনুভূতিক সন্মান জনাওক। জীৱনত আহিবলগা প্ৰতিটো সুখৰ মুহূৰ্ত বা উৎসৱতেই মই সতীশৰ অভাৱ অনুভৱ কৰিম।’
উল্লেখ্য যে ব্যৱসায়ী বিকাশ মালুৰ পত্নীয়ে স্বামীৰ বিৰুদ্ধেই আনিছিল গুৰুত্বৰ অভিযোগ। বিকাশৰ পত্নীৰ অভিযোগ মতে তেওঁৰ স্বামীয়ে ১৫ কোটি টকা সতীশক উভতাই দিবলৈ আছিল যাৰ বাবে তেওঁক হত্যা কৰিলে। কালিৰ দিনটোত ভাইৰেল হৈ পৰা এই অভিযোগ মিছা বুলি প্ৰকাশ কৰিছে সতীশ কৌশিকৰ পত্নী শশীয়ে।
প্ৰয়াত অভিনেতাৰ পত্নীয়ে কয় যে তেওঁৰ স্বামী সতীশে কাকো এটকাও ধাৰ দিয়া নাছিল। সম্পূৰ্ণ মিছা অভিযোগ আনিছে সেইগৰাকী মহিলাই। ইয়াৰোপৰি সতীশৰ পত্নী শশীয়ে কয়, ‘মোৰ স্বামীয়ে কাৰো সৈতে কেতিয়াও বিবাদত সোমাই পৰা নাছিল। সেই মহিলাগৰাকীয়ে একেবাৰেই ভুৱা অভিযোগ আনিছে। সতীশজীৰ পোষ্ট মৰ্টেম ৰিপৰ্টত ৯৮ শতাংশ ব্লকেজ পোৱাৰ কথা চিকিৎসকে উল্লেখ কৰিছে।’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
