স্বাধীনতাৰ পাছৰে পৰা যিমানগৰাকী প্ৰধানমন্ত্ৰীৰ বিষয়ে পঢ়িছো আৰু মোৰ ৪৮ বছৰীয়া জীৱনকালত যিকেইগৰাকী প্ৰধানমন্ত্ৰীক দেখিছো বা শুনিছো সকলোৰে ঊৰ্ধ্বত বর্তমানৰ প্ৰধানমন্ত্ৰী নৰেন্দ্ৰ মোদী ডাঙৰীয়া। মই ঊৰ্ধ্বত বুলি এই কাৰণেই ক’ব বিচাৰিছো, কাৰণ কোনো প্ৰধানমন্ত্ৰীৰে একমাত্ৰ উদ্দেশ্য কেৱল ‘বিৰোধীমুক্ত’ ভাৰতবৰ্ষ গঢ়া নাছিল। বাকীসকলৰ কথা আজি নকওঁ। যি মুহূর্তত এগৰাকী গণতন্ত্ৰৰ সর্বোচ্চ পদাধিকাৰীৰ লক্ষ্য আৰু উদ্দেশ্য কেৱল বিৰোধীমুক্ত ভাৰত গঢ়া, তেতিয়াই আমি বুজিছিলো যে গণতন্ত্ৰৰ হত্যা আৰম্ভ হ’ল। ভাৰতৰ দৰে বৈচিত্ৰ্যৰ মাজত ঐক্য- ভিন্নতাক একতাৰ দোলেৰে একত্ৰিত কৰি বিশ্ব দৰবাৰত ভাৰতবর্ষক বাকী ৰাজনৈতিক নেতাসকলে সভ্যতাৰ নিদর্শন হিচাপে আজি ইমান বছৰে ৰাজনীতিৰ ঊৰ্ধ্বত পৰিচয় কৰাই আহিছিল। তেনে সন্ধিক্ষণত আজি কিন্তু মাননীয় প্ৰধানমন্ত্ৰীজনে বিশ্ব দৰবাৰত আৰু ভাৰবর্ষৰ জনসাধাৰণৰ মাজত এখন জিদভৰা, বিৰোধী বনাম বিজেপি বিদ্বেষেৰে মানুহক এক শংকা আৰু উত্তেজনাৰ মাজলৈ ঠেলি দিলে।
এতিয়া আহো মূল বিষয়লৈ। বিগত সময়বোৰতো আন আন প্ৰধানমন্ত্ৰীসকলো বিদেশলৈ গৈছিল। বৈদেশিক চুক্তি স্বাক্ষৰিত হৈছিল। কিন্তু কেমেৰা লৈ বিদেশত নিজৰ জনপ্ৰিয়তা বৃদ্ধিৰ বাবে কচৰৎ কৰা হোৱা নাছিল। ধৰি ল’লো, আমাৰ আগৰ প্ৰধামন্ত্ৰীসকল বিফল প্ৰধানমন্ত্ৰী আছিল। তেনেস্থলত গোটেই বিশ্বৰ প্ৰিয়ভাজন প্ৰধামন্ত্ৰী হিচাপে প্ৰতিষ্ঠা কৰিব বিচৰা প্ৰধানমন্ত্ৰীগৰাকীৰ দেশখনৰ চাৰিওসীমা কিয় আজি চীন, নেপাল, ম্যানমাৰৰ দৰে চুবুৰীয়া আটাইবোৰ দেশে আগুৰি ধৰিছে। য’ত আন আন দেশে ভাৰতৰ মেপ সলনি কৰি ভাৰতবর্ষক হুংকাৰ দিছে। তেনেস্থলত মোদী ডাঙৰীয়াই কেৱল চীনা app নিষিদ্ধ কৰি বাঃ বাঃ ল’লেই হ’বনে? সাধাৰণ কথা, পৃথিৱীত এনে এজন ব্যক্তিৰ উদাহৰণ নাই, যাক সকলোৱে সকলো সময়ৰ বাবে ভাল পায় বা গ্ৰহণযোগ্য হয়। তেনেস্থলত কেৱল ৰাইজৰ ধন খৰচ কৰি গোটেই বিশ্বৰ প্ৰিয়ভাজন বুলি প্ৰচাৰ চলোৱাৰ প্ৰয়োজন ক’ত?
চীনৰ ৰাষ্ট্ৰপতি জিং পিঙৰ লগত ৮/৯ বাৰ বৈঠক কৰাৰ পাছতো কিয় চীনে ভাৰতক ৰঙাচকু দেখাবলৈ সাহস কৰিলে? চীন নালাগে, নেপাল-ম্যানমাৰৰ দৰে সৰু দেশেও ভাৰতক ৰঙাচকু দেখুৱাবলৈ কুণ্ঠাবোধ নকৰা হ’ল। কাৰণ সকলোৱে বুজি উঠিছে। নৰেন্দ্ৰ মোদী ডাঙৰীয়াৰ ৫৬ ইঞ্চিৰ বহল বুকুত চোক কম, হাৱা বেছি!
প্ৰধানমন্ত্ৰী ডাঙৰীয়াই যেতিয়ালৈ কেৱল কেমেৰাৰ বাবে কাম কৰিব, সেই কামত দেশৰ ভৱিষ্যতৰ বাবে হ’বলগীয়া একো নাথাকিব। কাৰণ কেমেৰাৰৰ আগত Action আৰু কেমেৰাৰ পাছত Action ৰাইজে বুজে আৰু বুজিছেই।
আপুনি কৈছে, চীনা সামগ্ৰী বর্জন কৰক। চীনা সামগ্ৰী বজাৰত আমি জনাত মনে মনে আহিব নোৱাৰে। এই সামগ্ৰীসমূহ আনিবলৈ ভাৰত চৰকাৰৰ অনুমতিৰ প্ৰয়োজন। ভাৰত চৰকাৰে আমদানি কৰা বন্ধ কৰিলে আমি বজাৰত এই সামগ্ৰী পাম ক’ত আৰু কিনিম কেনেকৈ? কেৱল সাধাৰণ মানুহক আবেগিক কৰি হৈ-চৈ কৰিয়েই এখন দেশ চলাব নোৱাৰি। পাকিস্তানৰ দৰে দুৰ্বল দেশ এখনক ৰঙাচকু দেখাই বৈতৰণী পাৰ হোৱাৰ কথা ভাবিলে নহ’ব।
গোটেই দেশেই এতিয়া ভাবিবলৈ বাধ্য হৈছে যে আমাৰ প্ৰধানমন্ত্ৰীজনৰ Camera Crazeহে বেছি। আমেৰিকাৰ ৰাষ্ট্ৰপতি বাৰাক অ’বামা, ড’নাল্ড ট্ৰাম্প, চীনৰ ৰাষ্ট্ৰপতি জিং পিং আদি ৰাষ্ট্ৰপ্ৰধানসকল ভাৰত ভ্ৰমণলৈ আহিছিল। কিন্তু আমাৰ মাননীয় প্ৰধানমন্ত্ৰীৰ লেখীয়াকৈ ‘Howdy Modi’ৰ দৰে ‘জনপ্ৰিয়তা ৰেলী’ আয়োজন কৰাৰ মানসেৰে অহা নাছিল। তেওঁলোকৰ অন্তৰালত প্ৰধান বিষয়বস্তু আছিল বিশাল ভাৰতৰ বজাৰ দখল কৰা। ইয়াৰ পৰিৱর্তে আমাৰ প্ৰধানমন্ত্ৰীৰ প্ৰধান লক্ষ্য আৰু উদ্দেশ্য সুকীয়া- দেশ গৌণ, নিজৰ প্ৰচাৰ মুখ্য।
বর্তমান ক’ৰোনাৰ দোহাই দি দেশৰ আর্থিক অৱস্থা দুর্বল বুলি ক’লেই নহ’ব। ক’ৰোনাৰ আগতেই দেশৰ GDP-4.5 লৈ অৱনমিত হৈছিল।
চীনৰ লগত যুদ্ধ কৰিবলৈ পুনৰ যুদ্ধ বিমান ক্ৰয় কৰাৰ বিষয়ত আমাৰ আপত্তি কৰিবলগীয়া একো নাই। কাৰণ এখন দেশ নিৰাপত্তাৰ ক্ষেত্ৰত সদা সষ্টম হৈ থাকিব লাগিব। কিন্তু প্ৰধানমন্ত্ৰীৰ নামত ৫.৫ হাজাৰ কোটিটকীয়া বিমান ক্ৰয় কৰাটো আমাৰ দৰে বর্তমান GDP-2.2 লৈ অৱনমিত হোৱা দেশ এখনৰ বাবে কিমান সমীচীন?
ৰাইজ সজাগ নহ’লে আৰু কথাবোৰ বুজিবলৈ চেষ্টা নকৰিলে যেনেকৈ সকলো ৰাজহুৱা সম্পদৰ ব্যক্তিগতকৰণ হৈছে, তেনেকৈ ভাৰতৰ জনগণ মানসিকভাৱে বিকলাংগ হ’বলৈ বেছি দিন নালাগিব। দেশৰ প্ৰধানমন্ত্ৰীজনে দেশৰ নাগৰিকক বিৰোধী বুলি গণ্য কৰাৰ আগতে আপোন দেশৰ জনসাধাৰণ বুলি জনকল্যাণৰ হকে কাম কৰাৰ মানসিকতা গ্ৰহণ কৰক।
(লেখিকা মীৰা বৰঠাকুৰ এগৰাকী ৰাজহুৱা কৰ্মী)
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
