জোহৰান মামদানি৷ নিউয়ৰ্কৰ মেয়ৰ হোৱাৰ পথত ভাৰতীয় বংশোদ্ভূত ডেমোক্ৰেটিক নেতা৷ ৫০ শতাংশ ভোট লাভ কৰি ৩৪ বছৰ বয়সীয়া মামদানি নিৰ্বাচিত হৈছে নিউয়ৰ্কৰ মেয়ৰ পদত৷ আমেৰিকাৰ ৰাজনীতিত বামপন্থী ডেমোক্ৰেট বুলি পৰিচিত এইগৰাকী তৰুণ ৰাজনীতিবিদক লৈ বিশ্বজুৰি আৰম্ভ হৈছে চৰ্চা৷
মঙলবাৰে নিউয়ৰ্কৰ মেয়ৰ নিৰ্বাচনত জয়লাভ কৰি ইতিহাস ৰচনা কৰিছে মামদানিয়ে৷ ১০০ বছৰৰ ব্যৱধানত সৰ্বকনিষ্ঠ মেয়ৰ হিচাপে নিৰ্বাচিত হৈছে তেওঁ৷ মেয়ৰৰ আসন দখল কৰিলে আমেৰিকাৰ ইতিহাসত মামদানি হব প্ৰথম মুছলমান মেয়ৰ৷ ১০ লাখ ৩৬ হাজাৰ ৫১ টা ভোট লাভ কৰিছে এই কমিউনিষ্ট প্ৰাৰ্থীয়ে৷
মামাদিনৰ মাতৃ মীৰা নায়াৰ এগৰাকী চলচ্চিত্ৰ পৰিচালক৷ পিতৃ শিক্ষাবিদ আৰু খ্যাতনামা লেখক মাহমুদ মামদানি৷ কলম্বিয়া বিশ্ববিদ্যালয়ৰ অধ্যাপকো মাহমুদ৷ ১৯৯১ চনত আফ্ৰিকা মহাদেশৰ উগাণ্ডাৰ কেম্পালাত জোহৰান মামদানিৰ জন্ম হলেও পাছলৈ তেওঁ পিতৃ মাতৃৰ সৈতে আমেৰিকালৈ যায়গৈ৷ ১৯৯৮ চনত ৭ বছৰ বয়সৰ পৰা নিউয়ৰ্ক চিটিত বসবাস কৰিবলৈ আৰম্ভ কৰে তেওঁ৷ ২০২০ চনত প্ৰথম বাৰৰ বাবে নিউয়ৰ্ক এছেম্বলিত নিৰ্বাচিত হয় মামদানি৷ কুইন্সৰ এখন জিলাক প্ৰতিনিধিত্ব কৰিছিল তেওঁ৷ বিগত অক্টোবৰত যেতিয়া মামদানিয়ে মেয়ৰ পদৰ বাবে প্ৰতিদ্বন্দিতা কৰাৰ কথা ঘোষণা কৰিছিল তেতিয়া তেওঁ আছিল প্ৰাদেশিক আইন প্ৰণেতা৷
নিউয়ৰ্কৰ বেছিভাগ বাসিন্দাৰ ওচৰতেই তেওঁ অপৰিচিত আছিল৷ জুন মাহত প্ৰাইমাৰী নিৰ্বাচনত নিউয়ৰ্কৰ প্ৰাক্তন গৱৰ্নৰ তথা এইবাৰৰ নিৰ্বাচনত নিৰ্দলীয় প্ৰাৰ্থী এণ্ডুৰ কুয়োমোক বিপুল ভোটত হৰুৱাই তেওঁ সংবাদ শিৰোনামলৈ আহে এইগৰাকী ভাৰতীয় বংশোদ্ভূত প্ৰাৰ্থী৷ নিৰ্বাচনী প্ৰচাৰত মামদানিয়ে ঘোষণা কৰে নিৰ্বাচিত হ’লে তেওঁ নিয়ন্ত্ৰিত ভাড়াত এপাৰ্টমেণ্টসমূহৰ ভাৰাবৃদ্ধি ৰোধ কৰিব৷
আগন্তুক ১০ বছৰত নিউয়ৰ্কত দুই লাখ সাশ্ৰয়ী বাসস্থান নিৰ্মাণৰ প্ৰতিশ্ৰুতিও দিছে মামদানিয়ে৷ শান্ত আৰু আত্মবিশ্বাসী মামদানিৰ নিৰ্বাচনী প্ৰতিশ্ৰুতিয়ে তৰুণ ভোটাৰক আকৰ্ষিত কৰিছিল৷ ডেমোক্ৰেটিক শিবিৰৰ প্ৰাৰ্থী হোৱাৰ কথা ঘোষণা কৰোতেই আমেৰিকাৰ প্ৰেছিডেণ্ট ডোনাল্ড ট্ৰাম্পৰ টাৰ্গেট হৈ পৰিছিল মামদানি৷ তেওঁৰ বিৰুদ্ধে ধাৰাবাহিকভাৱে বিভিন্ন বেয়া খবৰ প্ৰচাৰো কৰিছিল৷ কমিউনিষ্ট প্ৰাৰ্থী মামদানি ভোটত জিকিলে নিউয়ৰ্ক চিটিৰ চৰকাৰী অনুদান বন্ধ কৰি দিয়া হব বুলিও ভাবুকি দিছিল ট্ৰাম্পে৷
ট্ৰাম্পৰ সেই ধমকিক গুৰুত্ব নিদিলে নিউয়ৰ্কবাসীয়ে৷ নিউয়ৰ্কৰ পৰা মামদানিৰ বিপৰীতে ট্ৰাম্পৰ দল ৰিপাব্লিকান পাৰ্টীৰ পৰা প্ৰতিদ্বন্দিতা কৰিছিল কুৰ্টিছ শ্লিওৱাই৷ নিৰ্বাচনী প্ৰতিদ্বন্দিতাত মামদানিক হৰুৱাব নোৱাৰিলে ট্ৰাম সমৰ্থিত প্ৰাৰ্থীয়ে৷ ১০ শতাংশতকৈয়ো কম ভোট লাভ কৰিলে কুৰ্টিছ শ্লিউৱাই৷
মাৰ্কিন প্ৰেছিডেণ্টৰ ধমকিৰ পাছতেই মামদানিয়ে কৈছে, ‘ট্ৰাম্পে বুজি উঠিছে, নিউয়ৰ্কবাসীয়ে এইবাৰ পৰিবৰ্তন বিচাৰিছে৷ এই ধমকি মোৰ বিৰুদ্ধে নহয়, বৰং নিউয়ৰ্কবাসী মানুহৰ অধিকাৰ কাঢ়ি লোৱাৰহে চেষ্টা এয়া৷’ মামদানিৰ হাতত বৈধ নাগৰিকত্ব থকা সত্ত্বেও মাত্ৰ ৭ বছৰৰ নাগৰিকত্বক লৈ বাৰে বাৰে প্ৰশ্নও কৰা হৈছিল৷ পেলেষ্টাইনৰ অধিকাৰক লৈ বাৰে বাৰে সৰৱ হোৱাক লৈয়ো আক্ৰমণ কৰিছিল মাৰ্কিন প্ৰেচিডেণ্ট ডোনাল্ড ট্ৰাম্পসহ ৰিপাব্লিকানসকল৷
মেয়ৰ নিৰ্বাচনত তেওঁৰ দলৰ শোচনীয় পৰাজয়ৰ পাছত মুখ খুলিছে প্ৰেছিডেণ্ট ট্ৰাম্পে৷ নিৰ্বাচনী সমীক্ষক সংস্থা পোলষ্টাৰৰ এক সমীক্ষাত উদাহৰণ তুলি সামাজিকমাধ্যমত হাৰৰ কাৰণ বাখ্যা কৰিছে ট্ৰাম্পে৷ তেওঁ জনায়, তেওঁলোকৰ প্ৰাৰ্থীৰ পৰাজয় ঘটিছে কাৰণ ট্ৰাম্পে নিজে এই নিৰ্বাচনৰ প্ৰাৰ্থী নাছিল৷ দ্বিতীয় কাৰণ আমেৰিকাৰ শাটডাউন৷ ট্ৰাম্পৰ দাবী, এই দুই কাৰণত তেওঁৰ দলে আঞ্চলিক নিৰ্বাচনত জিকিব নোৱাৰিলে৷ ৰাজধানী কেম্পালাৰ কাষৰ এক অভিজাত এলেকা বুজিগা হিলত প্ৰাসাদোপম বাসগৃহ আছে মামদানি পৰিয়ালৰ৷ দক্ষিণ আফ্ৰিকাৰ কেপটাউনত কিছুদিন বসবাস কৰিছিল এই পৰিয়ালে৷ উগাণ্ডাত কিছু দিন থকাৰ পাছত তেওঁলোকে আমেৰিকালৈ গুচি আহে৷ কলেজৰ পৰা স্নাতক হোৱাৰ পাছত ২০১৮ চনত আমেৰিকাৰ নাগৰিকত্ব লাভ কৰে মামদানিয়ে৷
মামদানিৰ শিক্ষাগত অৰ্হতা যদি চোৱা হয় তেন্তে তেওঁ ব্ৰঙ্কছ হাইস্কুল অফ চায়েন্সত পঢ়াশুনা কৰিছিল৷ ২০১৪ চনত মেইনৰ বোডোইন কলেজৰ পৰা স্নাতক ডিগ্ৰী অৰ্জন কৰে তেওঁ৷ নিউয়ৰ্কৰ হবলগীয়া মেয়ৰ মামদানিয়ে বিবাহ কৰোৱাইছে এগৰাকী চিত্ৰশিল্পীক৷ ডুবাইত বিগত বৰ্ষৰ ডিচেম্বৰত বিবাহপাশত আৱদ্ধ হৈছে তেওঁলোক৷ চলিত বছৰৰ ফেব্ৰুৱাৰীত নিউয়ৰ্কত আইনী বিবাহ কৰাইছে৷ চলিত বছৰৰ জুলাই মাহত উগাণ্ডাত পাৰিবাৰিকভাৱে জাকজমকতাৰে অনুষ্ঠিত হৈছিল মামদানি আৰু চিত্ৰশিল্পী ৰমা ডুৱাজিৰ বিবাহৰ অনুষ্ঠান৷ মামদানিৰ এয়াই চমু পৰিচয়৷ কিন্তু মেয়ৰ নিৰ্বাচনত এজন নিৰ্ভেজাল কমিউনিষ্ট জয়ী হ’ব সেয়া ট্ৰাম্পৰ বাবেও অকল্পনীয় আছিল৷ সেই সপোন যেন লগা কথাবোৰ এতিয়া বাস্তৱ৷ তাৰ জ্বলন্ত প্ৰমাণ এই তৰুণ ৰাজনীতিবিদ জোহৰান মামদানি৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
