গ্ৰেজুৱেট এপ্টিটিউড টেষ্ট ইন ইঞ্জিনিয়াৰিং এক্সাম চমুকৈ GATE পৰীক্ষাৰ সূচী পিছুৱাব নোৱাৰিব ৷ এই নিৰ্দেশ দিছে দেশৰ সৰ্বোচ্চ ন্যায়ালয়ে৷
বুধবাৰে উচ্চতম ন্যায়ালয়ে GATE পৰীক্ষাৰ সূচী স্থগিত ৰখাৰ সন্দৰ্ভত এক শুনানি গ্ৰহণ কৰি এই নিৰ্দেশনা দিয়ে৷ ন্যায়াধীশ ডি ৱাই চন্দ্ৰচূড়, ন্যায়াধীশ সূৰ্য কান্ত আৰু ন্যায়াধীশ বিক্ৰম নাথৰ এক বিচাৰপীঠে পৰীক্ষালৈ মাত্ৰ ৪৮ ঘণ্টা সময় থকাৰ আগতে এই গুৰুত্বপূৰ্ণ নিৰ্দেশ দিছে৷
বিচাৰপীঠখনে কয় যে হঠাতে পৰীক্ষা পিছুৱাই দি প্ৰস্তুতি চলাই থকা পৰীক্ষাৰ্থীসকলৰ কেৰিয়াৰ সৈতে কোনোধৰণৰ খেলা কৰিব নোৱাৰি৷
‘‘যিসকল পৰীক্ষাৰ্থীয়ে পৰীক্ষাৰ বাবে প্ৰস্তুতি সম্পূৰ্ণ কৰিছে তেওঁলোকৰ কেৰিয়াৰ সৈতে ন্যায়ালয়ে খেলা কৰিব নোৱাৰে৷’’ সৰ্বোচ্চ ন্যায়ালয়ে কয়৷
বিচাৰপীঠখনে লগতে কয় যে একাডেমিক নীতি অনুসৰি পৰীক্ষা সঠিক সময়সূচীৰ মতেই হ’ব আৰু ন্যায়ালয়ে ইয়াত কোনো হস্তক্ষেপ নকৰে৷
উল্লেখ্য যে প্ৰায় ৯ লাখ পৰীক্ষাৰ্থীৰ মাজৰ ২০ হাজাৰ পৰীক্ষাৰ্থীয়ে স্বাক্ষৰ কৰি পৰীক্ষা পিছুৱাই দিয়াৰ দাবীৰে উচ্চতম ন্যায়ালয়ত এখন অনলাইন আবেদন দাখিল কৰিছিল৷ সমগ্ৰ দেশজুৰি ২০০ টা পৰীক্ষা কেন্দ্ৰত প্ৰায় ৯ লাখ পৰীক্ষাৰ্থীয়ে অৱতীৰ্ণ হ’ব লগীয়া পৰীক্ষাৰ বাবে কৰ্তৃপক্ষই এতিয়াও কোনো কোভিড বিধি প্ৰস্তুত কৰা নাই বুলি আবেদনখনত দাবী কৰা হৈছিল৷
উক্ত আবেদনৰ শুনানি গ্ৰহণ কৰি দেশৰ সৰ্বোচ্চ ন্যায়ালয়ে এই পৰীক্ষা পূৰ্বৰ সূচীৰ মতেই অনুষ্ঠিত হ’ব বুলি নিৰ্দেশ দিছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
