অসমৰ এগৰাকী সাধাৰণ কনিষ্টবলৰ অসাধাৰণ কামৰ বিষয়ে ক’বলৈ উলাইছো৷ ২ লাখ টকাৰ ঘোচ প্ৰত্যাখ্যান কৰাই নহয় প্ৰায় ১.৫০ কোটি টকা ধৰা পেলাই চৰ্চালৈ অহা এই সাধাৰণ কনিষ্টব গৰাকী হৈছে হৰেন্দ্ৰ বৰ্মন৷ তেওঁ গুৱাহাটী ৰে’লৱে ষ্টেশ্যনত ৰে’ল আৰক্ষী কনিষ্টবলৰূপে কৰ্মৰত৷
যোৱা মংগলবাৰে গুৱাহাটী ৰে’লৱে ষ্টেশ্যনত কনিষ্টবল এই হৰেন্দ্ৰ বৰ্মনেই ধৰা পেলাইছিল ১ কোটি ৪৮ লাখ ৩০ হাজাৰ ৬০০ টকা৷
কনিষ্টবল হৰেন্দ্ৰ বৰ্মনে নিয়মীয়া তালাচীত এই বৃহৎ পৰিমাণৰ ধনৰাশি ধৰা পেলাইছিল৷ ইয়াৰ পিছতে তিনিজন লোকৰপৰা ৰে’ল আৰক্ষীয়ে এই ধনৰাশি উদ্ধাৰ কৰিছিল৷
তালাচীত ধনখিনি ধৰা পেলোৱাৰ পিছতে হৰেন্দ্ৰ বৰ্মনলৈ ২ লাখ টকা আগবঢ়োৱা হৈছিল৷ অৰ্থাৎ ধৰা পেলোৱা ধনখিনিসহ তিনিজন লোকে তেওঁলোকক এৰি দিবলৈ হৰেন্দ্ৰ বৰ্মনলৈ ভেটি মানে ঘোচ আগবঢ়াইছিল৷ কিন্তু কনিষ্টবল হৰেন্দ্ৰ বৰ্মনে সততাৰ পৰিচয় দি সেই ধন প্ৰত্যাখ্যান কৰি সমগ্ৰ ধনখিনি জব্দ কৰে৷
ধনখিনি অৰুণাচল প্ৰদেশৰ পৰা অভিশেষ শর্মা নামৰ উত্তৰ প্ৰদেশৰ এজন লোকে লৈ আহিছিল৷ আৰক্ষীয়ে অভিশেষ শৰ্মাৰ লগতে আৰু দুজন লোকক ধনখিনিৰ সৈতে জড়িত থকাৰ অভিযোগত আটক কৰে৷
আটকাধীন লোক দুজন ক্ৰমে উত্তৰ প্ৰদেশৰ উমেশ চান্দ শৰ্মা আৰু দিল্লীৰ পৱন কুমাৰ৷ এই আটাইকেইজন লোককে আৰক্ষীয়ে আটক কৰি তিনিওজনৰ বিৰুদ্ধে ভাৰতীয় দণ্ডিবিধ আইনৰ GRP 20/2022/ 120B/417/420/379/34 নম্বৰত গোচৰ ৰুজু কৰিছে৷
ইফালে কনিষ্টবল হৰেন্দ্ৰ বৰ্মনে ২ লাখ টকা ঘোচ প্ৰত্যাখ্যান কৰি প্ৰায় ১.৫০ কোটি টকা জব্দ কৰাৰ বাবে ৰে’লৱে আৰক্ষী অধীক্ষক মায়ংক কুমাৰ ঝাই ধন্যবাদ জ্ঞাপন কৰিছে৷
আনহাতে সততাৰে কৰ্তব্য পালন কৰি জনতাৰ দৃষ্টিত এগৰাকী প্ৰকৃত নায়কৰূপে পৰিচিত হৈ পৰিছে কনিষ্টবল হৰেন্দ্ৰ বৰ্মন৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
