মানৱেন্দ্ৰ কুমাৰ দাসঃ শিৱসেনাৰ গৰিষ্ঠসংখ্যক বিধায়কৰ বিসম্বাদৰ পৰিণতিত ৰাজনৈতিক সংকট সৃষ্টি হৈছিল মহাৰাষ্ট্ৰত৷ পৰৱৰ্তী সময়ত বাধ্য হৈ মুখ্যমন্ত্ৰী পদৰ পৰা পদত্যাগ কৰে শিৱসেনাৰ সভাপতি তথা তদানীন্তন মুখ্যমন্ত্ৰী উদ্ধৱ থাকৰে৷
কিন্তু মুখ্যমন্ত্ৰী পদৰ পৰা পদত্যাগ কৰাৰ পাছত সদ্যপদত্যাগী মুখ্যমন্ত্ৰীগৰাকীয়ে প্ৰকাশ কৰিছে বহু বিস্ফোৰক তথ্য৷ ৰাজহুৱাভাৱে প্ৰশ্ন উত্থাপন কৰিছে বিজেপি নেতৃত্বৰ ওচৰত৷ চাওক উদ্ধৱ থাকৰেৰ প্ৰশ্ন৷
প্ৰশ্ন ১ – ২০১৯ত শিৱসেনাক মুখ্যমন্ত্ৰী পদ দিয়া নহৈছিল কিয়? প্ৰশ্ন ২ – ২০২২ত অবিজেপি নেতাক মুখ্যমন্ত্ৰী পদ দিয়া হ’ল কিয়?
শিৱসেনাৰ সভাপতি উদ্ধৱ থাকৰে বিজেপিৰ শীৰ্ষ নেতৃত্বৰ ওচৰত উত্থাপন কৰিছে প্ৰশ্ন৷ সেই অনুসৰি ২০১৯ত শিৱসেনাই বিজেপিৰ সমৰ্থনত মহাৰাষ্ট্ৰত চৰকাৰ গঠন কৰিব বিচাৰিছিল৷ কিন্তু তেতিয়া অবিজেপি নেতাক মুখ্যমন্ত্ৰী পদ দিবলৈ সন্মত হোৱা নাছিল বিজেপি৷
সেইবাবে সকলো বিকল্প বন্ধ হোৱাত শিৱসেনাই NCP আৰু কংগ্ৰেছৰ সহযোগত গঠন কৰিছিল চৰকাৰ৷ কিন্তু এতিয়া পুনৰ বিজেপিয়ে অবিজেপি নেতা অৰ্থাৎ শিৱসেনাৰ বিসম্বাদী বিধায়ক একনাথ সিন্দেক মুখ্যমন্ত্ৰী পদ দিলে কিয়?
বিজেপিয়ে ভংগ কৰিছিল ৩০ বছৰীয়া মিত্ৰতা। মিত্ৰতা ভংগৰ আঁৰত কি ৰহস্য আছিল? ২০১৯ চনত ভংগ হৈছিল বিজেপি আৰু শিৱসেনাৰ ৩০ বছৰীয়া ৰাজনৈতিক মিত্ৰতা৷
তাৰ বাবেও উদ্ধৱ থাকৰে বিজেপি নেতৃত্বকে দোষী আখ্যা দিছে- বলিৰ পঠা হ’ল নেকি একনাথ সিন্দে? মহাৰাষ্ট্ৰত জনপ্ৰিয়তা বাঢ়িছে দেৱেন্দ্ৰ ফাড়নাৱিছৰ। মহাৰাষ্ট্ৰত অধিক ক্ষমতাশালী হ’ব কোন? একনাথ সিন্দেক ‘কাগজৰ বাঘ’ সজোৱা হ’ল নেকি?
একে সময়তে প্ৰাক্তন মুখ্যমন্ত্ৰী উদ্ধৱ থাকৰেই শিৱসেনাৰ বিসম্বাদী গোটৰ নেতা তথা মহাৰাষ্ট্ৰৰ মুখ্যমন্ত্ৰী একনাথ সিন্দে সম্পৰ্কতো যোৱা ২ জুলাইত বহু বিস্ফোৰক আৰু তাৎপৰ্যপূৰ্ণ মত প্ৰকাশ কৰিছে৷
শিৱসেনাৰ সভাপতিগৰাকীয়ে সংবাদ মাধ্যমৰ ওচৰত অকপটে স্বীকাৰ কৰিছে যে সম্প্ৰতি মহাৰাষ্ট্ৰৰ ৰাজনীতিত দেৱেন্দ্ৰ ফাড়নাৱিছৰ জনপ্ৰিয়তা আৰু ক্ষমতা যথেষ্ঠ বৃদ্ধি হৈছে৷
সেইবাবে মুখ্যমন্ত্ৰী একনাথ সিন্দেৰ শপতগ্ৰহণ অনুষ্ঠান চলি থাকোতে গৃহমন্ত্ৰী অমিত শ্বাহে উপমুখ্যমন্ত্ৰী পদৰ দায়িত্ব ল’বলৈ দেৱেন্দ্ৰ ফাড়নাৱিছক হঠাৎ নিৰ্দেশ দিছিল৷
এই নিৰ্দেশৰ আঁৰত বিজেপিৰ বৃহৎ ৰাজনৈতিক লক্ষ্য থকা বুলিও উদ্ধৱ থাকৰে আৰু মহাৰাষ্ট্ৰ নৱ নিৰ্মাণ সেনাৰ সভাপতি ৰাজ থাকৰে ৰাজহুৱাভাৱে মত প্ৰকাশ কৰাতো যথেষ্ঠ গুৰুত্বপূৰ্ণ৷ বিজেপিৰ সেই গোপন লক্ষ্য কি?
লক্ষ্য ১ – একনাথ সিন্দে গোটক বিজেপিত চামিল কৰা হ’ব। লক্ষ্য ২ – আঁৰত থাকি দেৱেন্দ্ৰ ফাড়নাৱিছে চলাব চৰকাৰ। লক্ষ্য ৩ – সিন্দে সম্প্ৰদায়ক বিজেপিৰ প্ৰতি আকৃষ্ট কৰি তোলা।
মাৰাঠী সমাজত বিশেষ প্ৰভাৱ থকা ২ নেতা ক্ৰমে উদ্ধৱ থাকৰে আৰু ৰাজ থাকৰেই ৰাজহুৱাভাৱে প্ৰকাশ কৰা মতত এইটো স্পষ্ট হৈছে যে ৩টা বিশেষ লক্ষ্য লৈ বিজেপিয়ে হয়তো একনাথ সিন্দেক মুখ্যমন্ত্ৰীত্বৰ পদ দিছে৷ সেই অনুসৰি আগন্তুক সময়ছোৱাত একনাথ সিন্দে আৰু তেওঁৰ অনুগামী বিধায়কসকল বিজেপিত চামিল হোৱাৰ সম্ভাৱনা আছে৷
দ্বিতীয় লক্ষ্য হ’ল উপ মুখ্যমন্ত্ৰী হ’লেও দেৱেন্দ্ৰ ফাড়নাৱিছে হয়তো চৰকাৰ পৰিচালনা কৰিব৷ এই সম্পৰ্কত উদ্ধৱ থাকৰে কি কৈছে চাওক৷
মহাৰাষ্ট্ৰত মুঠ জনসংখ্যাৰ ৩০ শতাংশ লোক সিন্দে সম্প্ৰদায়ৰ৷ সেইবাবে এই বৃহৎ সম্প্ৰদায়টোৰ মাজত বিজেপিৰ সাংগঠনিক শক্তি মজবুত কৰিবলৈও হয়তো একনাথ সিন্দেক মুখ্যমন্ত্ৰীত্বৰ পদ দিয়া হৈছে৷ অন্য অৰ্থত একনাথ সিন্দে মুখ্যমন্ত্ৰী হোৱাৰ আঁৰত যে বিজেপিৰ বৃহৎ লক্ষ্য আছে সেইটো স্পষ্ট হৈ উঠিছে৷
অন্য অৰ্থত বঙহৰ যুঁজত জয়ী হৈ একনাথ সিন্দে কাগজৰ বাঘত পৰিণত হ’ল নেকি? অৱশ্যে আগন্তুক সময়তহে এই দৃশ্য অধিক স্পষ্ট হৈ উঠিব৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
