অসম লাইভ২৪ঃ খেয়ালী মন৷ শিল্পী তেওঁ৷ পশ্চিমবংগৰ অসম ভৱনত দিপালী বৰঠাকুৰক দেখিয়েই প্ৰেমত পৰিছিল শিল্পী নীলপৱন৷ সেইদিনা শান্তি নিকেতনৰ পৰা তেওঁ ফাইন আৰ্টচত ডিগ্ৰী শেষ কৰি ওলাই আহিছিল৷ তেওঁ তেতিয়া কেৱল নীলপৱন নাছিল, তেতিয়ালৈ তেওঁ শিল্পী নীলপৱন হৈ পৰিছিল৷ সন্মুখত সম্ভাৱনাময় এক ভৱিষ্যত৷ সম্ভাৱনাময় ভৱিষ্যত জানো প্ৰেমৰ আগত হেঙাৰ হ’ব? হ’বই নোৱাৰে৷ দিপালী বৰঠাকুৰৰ অসুস্থতাও হেঙাৰ হ’ব নোৱাৰে৷ শিল্পী মন, বহেমিয়ান মন, ঘৰ-সংসাৰ এইবোৰ তেওঁৰ বাবে তেতিয়ালৈ কল্পনাৰো অগোচৰ৷
কিন্তু দিপালীক পাবলৈ সলনি হ’ব লাগিব৷ দায়িত্বশীল হ’ব লাগিব৷ অসুখীয়া প্ৰেয়সীক আলৈ-আথানি কৰিব নোৱাৰি৷ দিপালীৰ বাবেই নীলপৱন সলনি হৈছিল৷ ঘৰবন্ধাৰ হেঁপাহ এটাই মনত উক দি উঠিছিল৷ ভাৱিলেই যেতিয়া ৰৈ থকাৰ জানো সময় আছে? লগে লগেই বিবাহৰ প্ৰস্তাৱ লৈ দিপালী বৰঠাকুৰৰ জ্যেষ্ঠ ভাতৃৰ কাষলৈ গৈছিল নীলপৱন বৰুৱা৷
পোনতে দিপালী বৰঠাকুৰৰ ভাতৃয়ে এই বিবাহত সন্মতি দিবলৈ টান পাইছিল যদিও নীলপৱনৰ জেদ কিন্তু নকমিল৷ দিপালী বৰঠাকুৰক তেওঁ বিয়া কৰাবই৷ কথামতেই ১৯৭৬ চনৰ ৭ মাৰ্চত বিবাহৰ দিন ধ্যাৰ্য হ’ল দিপালী-নীলপৱনৰ৷ বিয়াৰ দিনটোৰ এটা বিশেষ কথাই সকলোকে হাঁহিৰ খোৰাকো দিছিল৷ বিয়াত হোমৰ গুৰিতেই সেইদিনা শুই পৰিছিল নীলপৱন বৰুৱা৷ নীলপৱন বৰুৱাৰ নৱগ্ৰহত অন্তেষ্টিক্ৰিয়া সম্পন্ন হোৱাৰ সময়তে তেওঁৰ বহেমিয়াম মনটোৰ কথা প্ৰকাশ কৰিলে শিক্ষাবিদ গংগাপদ চৌধুৰীয়ে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
