অসম লাইভ২৪ঃ প্ৰেমৰ টান। ভাৰতলৈ ফুৰিবলৈ আহি টুৰিষ্ট গাইড তথা অটো চালকৰ সৈতে ঘনিষ্ঠ হৈ পৰে বিদেশী পৰ্যটক। ঘনিষ্ঠতা ইমানেই বাঢ়িল যে ভাৰত এৰি যোৱাৰ কথা আৰু ভাৱিবই নোৱাৰা হ’ল পৰ্যটকগৰাকীয়ে। কিন্তু নাযাও বুলিয়েই নোযোৱাকৈ থাকিব নোৱাৰে। বিদেশী পৰ্যটকে ভাৰতলৈ ফুৰিবলৈ আহোতে বহুকেইটা নিয়মেই মানি চলিব লাগে। পৰ্যটকগৰাকী যিহেতু বেলজিয়ামৰ গতিকে ভৌগোলিক দূৰত্ব নিশ্বয়কৈ বহু বেছি। আনহাতে অটোচালকজনো দিল্লীৰ নহয়। তেওঁ প্ৰকৃততে কৰ্নাটকৰ বিজয় নগৰৰহে বাসিন্দা। কিন্তু প্ৰেমে জানো দূৰত্বৰ কথাবোৰ মানি চলে? নাই প্ৰেমে একো বাধাই নামানে! শেষত কৰ্ণাটক বিজয় নগৰৰ অনন্তৰাজু আৰু বেলজিয়ামৰ কেমিলিয়ে ২৫ নৱেম্বৰত বিবাহ পাশত আবদ্ধ হয়।
কেনেকৈ আৰম্ভ হৈছিল প্ৰেম?
ভাইৰেল খবৰ অনুসৰি কৰ্ণাটকৰ যুৱক অনন্ত এজন অটো ড্ৰাইভাৰেই নহয়, সমান্তৰালভাৱে তেওঁ এজন টুৰিষ্ট গাইডো। কেমিলিৰ সৈতে তেওঁ প্রথম চিনাকী হৈছিল ২০১৯ চনত। কেমিলি ভাৰত পৰিদৰ্শনৰ বাবে আহি দিল্লীত উপস্থিত হৈছিল। বেলজিয়ামৰ পৰা অহা কেমিলিৰ টুৰিষ্ট গাইড হৈছিল অনন্ত। কেমিলি পেছাত এগৰাকী সমাজকৰ্মী। কৰ্মৰ তাগিদাতেই কেমিলিয়ে বিভিন্ন মানুহৰ লগত বন্ধুত্বসুলভ সম্পৰ্ক ৰাখেই। তেওঁ কৰ্নাটকত থকা সময়ছোৱাতো অনন্তৰাজুৰ পৰিয়ালৰ সৈতেও মিলি পৰে। অনন্তৰ পৰিয়ালটোক বিভিন্নধৰণে সহায়ো আগবঢ়াই কেমিলিয়ে। অনন্তৰ আপ্যায়নেও কেমিলিৰ মনত বাৰুকৈয়ে প্ৰভাৱ পেলাই। কিছুদিন ভাৰতত থাকি কেমিলি ওভতি যায়। কিন্তু ভাৰতীয় যুৱক অনন্তক মনৰ পৰা মছি পেলাব নোৱাৰিলে কেমিলিয়ে। সামাজিক মাধ্যমত দুয়োৰে সম্পৰ্ক কিন্তু ঠিকেই থাকিল। এনেকৈ কথা বতৰা পাতি থকাৰ মাজতেই দুয়োৰে মাজত প্ৰেমৰ সম্পৰ্ক গঢ়ি উঠিল। তাৰ পাছতেই দুয়োৱে প্ৰেমৰ কথা পৰিয়ালৰ লোকসকলৰ আগত প্ৰকাশ কৰে। দুয়োটা পৰিয়ালেই এই সম্পৰ্কত সন্মতি দিয়াত বিগত ২৫ নৱেম্বৰত দুয়োৱে বিবাহপাশত আবদ্ধ হয়।
উ্ল্লেখ্য যে এই বিবাহক লৈ মন্তব্য কৰিছে দৰা অনন্তই। অনন্তই প্ৰকাশ কৰা মতে, ‘আমি বিগত বছৰতেই বিয়াৰ সিদ্ধান্ত লৈছিলো। কিন্তু কৰ’নাৰ বাবে বিয়াখন সম্ভৱ নহ’ল। আমাৰ বিয়া হিন্দু নিয়মমতেই হৈছে। পৰিয়ালৰ পৰা প্ৰায় ৪০ জনমান মানুহ উপস্থিত আছিল। ভালপোৱাই কোনো বাধা নামানে মই সেই কথা বাৰুকৈয়ে উপলব্ধি কৰিছো।’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
