অসম লাইভ২৪ঃ নেইমাৰৰ দৰেই কান্দি কান্দি কাটাৰ বিশ্বকাপৰ পৰা বিদায় ল’লে ৰোনাল্ডোয়েও। প্ৰত্যেকবাৰৰ দৰে এই বিশ্বকাপৰ সৈতে জড়িত হৈ আছে বিশ্ববাসীৰ আৱেগ, অশ্ৰু আৰু স্বস্তিৰ নিশ্বাস। এই বিশ্বকাপ বহুকেইজন তাৰকা খেলুৱৈৰ বাবে শেষ বিশ্বকাপ। বিদায়ী খেলুৱৈৰ তালিকা দীঘলীয়া। শেহতীয়াকৈ এই তালিকাত নাম সন্নিৱিষ্ট হৈছে পৰ্টুগালৰ তাৰকা খেলুৱৈ ৰোনাল্ডোৰ নাম। শেষ নিশা মৰক্কোৰ হাতত পৰাস্ত হৈ কোৱাৰ্টাৰ ফাইনেলৰ পৰা বিদায় লোৱা পৰ্টুগালৰ খেলুৱৈ ৰোনাল্ডোৰ কান্দোনে অনুৰাগীৰ মহলৰো চকু সেমেকাই তুলিছে। কিয়নো ৩৭ বছৰীয়া ৰোনাল্ডোৰ এইয়া শেষ বিশ্বকাপ।
কেৱল ৰোনাল্ডোই নহয় বৰং ব্ৰাজিলৰ খেলুৱৈ নেইমাৰ আৰু ডানি আলভেজ, উৰুগুৱেৰ ছুৱাৰেজ, পোলেণ্ডৰ লিৱান’দস্কী, জাৰ্মানীৰ মেনুৱেল নেইৱাৰ, থমাছ মুলাৰ তথা সৰ্বকালৰ শ্ৰেষ্ঠ খেলুৱৈ সকলৰ অন্যতম বুলি গণ্য কৰা আৰ্জেন্টিনাৰ মেছিৰো এইখন শেষ বিশ্বকাপ।
মেছিৰ বাহিৰে আন সকলো খেলুৱৈয়ে ইতিমধ্যে পৰাস্ত হৈ বিদায় মাগিলে ২০২২ ৰ বিশ্বকাপৰ পৰা। আৰ্জেন্টিনাৰ দলটো এতিয়াও টিকি আছে। ছেমি-ফাইনেলত মেছিৰ দলে মুখামুখি হ’ব ক্ৰৱেছিয়াৰ সৈতে। এতিয়া সকলোৰে দৃষ্টি নিমগ্ন মেছিৰ ওপৰত। ফুটবলৰ প্ৰায় সকলো অভিলেখ স্পৰ্শ কৰা মেছিৰ শিৰত নাই কেৱল বিশ্বকাপৰ খিতাপ। এইবাৰ বিশ্বকাপৰ খিতাপ মেছিয়ে কাঢ়িবলৈ সক্ষম হ’বনে, বিশেষ খেলখন চাবলৈ এতিয়া উদগ্ৰীৱ হৈ আছে ফুটবল অনুৰাগীসকল।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
