অসম লাইভ২৪ঃ সমগ্ৰ বিশ্বৰ প্ৰায় ১০০ কোটি মানুহেই মানসিক সমস্যাত ভুগিবলৈ আৰম্ভ কৰিছে। শিশুৰ পৰা পৌঢ়লৈ সকলো বয়সৰ লোকেই মানসিক ৰোগৰ স্বীকাৰ হৈছে। মানসিক ৰোগত আক্ৰান্ত সৰহসংখ্যক লোকেই নিজকে মানসিক ৰোগী বুলি মানি ল’ব নোখোজাটোও মুখ্য সমস্যাবোৰৰ ভিতৰত এটা। বিশ্বত কিয় বৃদ্ধি হৈছে মানসিক ৰোগীৰ সংখ্যা। সমীক্ষাই কি কয়?
পেছাগত চাপ, সম্পৰ্কৰ তিক্ততা, অৰ্থনৈতিক সমস্যা, পাৰিবাৰিক কন্দল আদিয়ে মানুহক মানসিকভাৱে দুৰ্বল কৰি তোলে। জীৱনৰ এই সমস্যাসমূহৰ কোনো সমাধান বিচাৰি নাপায় অস্বস্তি, উদ্বেগেৰে সময় অতিবাহিত কৰিবলগা হয়। আধুনিক যুগত ডায়াবেটিছ, কলষ্টেৰল আদি ৰোগেও মানুহক মানসিকভাৱে ভাঙি পেলাইছে। সম্প্ৰতি মানুহৰ মানসিক স্বাস্থ্যক লৈ লনছেটৰ এটা ৰিপৰ্টত প্ৰকাশিত হৈছে ভয়ংকৰ তথ্য। ‘লনছেট কমিছন অন এণ্ডিং ষ্টিগমা এণ্ড ডিছক্ৰিমিনেশ্বন ইন মেণ্টেল হেল্থ’ ৰ মতে সমগ্ৰ বিশ্বৰ ১০০ কোটি মানুহ মানসিক সমস্যাত ভুগি আছে। গড় হিচাপত যদি চোৱা হয় তেন্তে বিশ্বৰ প্ৰতি ৮ গৰাকী মানুহৰ ভিতৰত এজন লোকে মানসিক সমস্যাত ভুগি আছে। বয়স্ক লোকই মানসিক সমস্যাত ভুগিছে এনে নহয়। ১০ৰ পৰা ১৯ বছৰ বয়সৰ ভিতৰৰ কিশোৰ-কিশোৰীৰ প্ৰতি ৭ জনৰ মাজৰ এজন মানসিক ৰোগত আক্ৰান্ত।
কৰ’নাৰ প্ৰথম ঢৌৱে বিশ্বক কোবাই যোৱাৰ পিছত বিশ্বৰ প্ৰায় ২৫ শতাংশ লোক মানসিক ৰোগত আক্ৰান্ত হৈ পৰিছিল। সাধাৰণ লোকসকলৰ মনত এতিয়াও মানসিক সমস্যা মানে পাগল। এই চিন্তাধাৰাৰ পৰা আঁতৰি অহাৰ বাবেই কভিডকালীন সময়ত বিভিন্ন সতৰ্কতামূলক প্ৰচাৰো আৰম্ভ হ’ল। এই প্ৰচাৰৰ মূল উদ্দেশ্যই মানুহৰ চিন্তাধাৰা উন্নত কৰা। কিন্তু এই প্ৰচাৰৰ মাজতেই বিশ্বত কিয় বাঢ়িছে মানসিক ৰোগীৰ সংখ্যা। মানসিক স্বাস্থ্য ভালে ৰখাৰ বাবে চিকিৎসা বিজ্ঞানে দিয়া পৰামৰ্শ অনুসৰি হৰমনৰ ভাৰসাম্য বজায় ৰখাটো অত্যন্ত গুৰুত্বপূৰ্ণ বিষয়। হৰমনৰ ভাৰসাম্য বিঘ্নিত হ’লেও মানসিক ৰোগে দেখা দিয়ে।
কোনকেইট উপসৰ্গই দেখা দিলে সতৰ্ক হোৱাটো প্ৰয়োজন? কোনো কথা ভাৱোতে সুস্থিৰৰূপত ভাৱিব নোৱাৰে, প্ৰতি সময়তে অৱসাদে আগুৰি থাকে, কাম কৰিবলৈ অনিহা, তেন্তে এইসমূহ লক্ষণ মস্তিস্কৰ পৰা ডোপমিনৰ পৰিমান কমি গৈছে। ছেৰটেনিনৰ নেতিবাচৰ প্ৰভাৱ ব্ৰেইনত বৃদ্ধি পাইছে। ছেৰটেনিনৰ পৰিমান বৃদ্ধিয়ে অপৰাধবোধত ভোগা, আত্মহত্যাৰ প্ৰৱণতা বাঢ়ি যোৱা আদি লক্ষণে দেখা দিয়ে। ইয়াৰোপৰি নিদ্ৰাহীনতা, যৌনইচ্ছা কমি যোৱা, শৰীৰত জ্বলা-পুৰা কৰা আদি লক্ষণো পৰিস্ফুত হৈ পৰে। এনে লক্ষণসমূহ ধৰা পৰাৰ লগে লগেই মনোৰোগ বিশেষজ্ঞৰ পৰামৰ্শ লোৱাটো জৰুৰী।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
